Putara leh Kei!!!

A khuhhawnna

Kawt nilum chu putar chuan a ai a. A khat tawkin a thutna atanga lang thei ral lehlam tlang chu a thlir leh zauh thin a. Thil engemaw ngaihtuah nei niawm tak hian a han en leh vang vang thin a; chutah le, a mit atangin mittui a rawn hnam tiam tiam a, tuma velh lovin a mittui a sur ta zung zung a…

Kha putar kha

Kha putar kha tunah chuan a khualzin kawng hi thui a zawh tawh dawnlo tih chu a hmel atangin a hriat theih tawh a. Hnuhma tam tak pawh a lo hnutchhiah tawh. Kha putara khan tunah chuan han titi pui a, nunhlui han sawipui tur a nei tawh lo. A thian thenkhat chuan an kumkhaw hmun tur an pan tawh a, thenkhat chu amah ang bawkin pawnah nilum an ai thei ve tawk tawh a. A then chu thih sualin natna khumah an mu mek thung. Hmana thian ngaina em em kha tunah erawh thian kawm turin a tha leh bengin a daih tawh lo!

Vanglai nite chuan..

Kha putara vanglai hun kha han ngaihtuah teh ang le. Mi tlawmngai leh mite tana malsawmna nih tumna chu a pianchhuah pui ve reng emaw tih mai tur khawpa mi thothang tha a ni a. Zualko kal te, satlak nikhua leh tanpui ngai an awm apiangin a che hmasa ber pawl leh a tawp thlenga taima taka thawk thin a ni. A ram a hmangaih a, a tul chuan a ram tan chuan a nun pawh hlan mai thei turin a inpeih reng a ni.

A vanglai chuan ramvah nuam a ti em em bawk a. A thiante nen chuan ramvakin hmun hla tak takah zan riakin an chhuak fo thin. A tan chuan ramhnuai chu a in ang maia ngaiin ram pilril berah pawh hlauhnain a tibuai ve ngailo emaw tih hial tur khawpin a awm hial thin a ni.

Khatiang khawpa pasaltha kha chu khawtlang pawhin an ngaisanga, nula rimnaah pawh midang chuan an zah ru hle thin. Meichher nen nula rim turin a thianpa nen an han kal a, kawtkaia thawm an han neih tawh chuan an thutna tur an lo kian lawk hial thin. Chutiang khawpa vanglai nun sawitur nei tha a ni.

Vanglai parmawi a chuai ta..

He leilung hian keini a chhunga chengte hi min lo her pui nasa khawp mai. Kha putara pawh kha a vanglai chuan mi thothang tha leh mahni inzo tak ni mahse tunah erawh a che vel reng reng chu en zui reng a ngai tawh a. Engemaw hleka chhe rup thei a ni tawh tlat.

A tha chaknate chu engtiklaia bo nge tih pawh hriattheih a ni tawh lo a. A beng hriatna tha em em, thil ri hlek chu lo hre hman zung zung thin kha tunah chuan a bula ring taka tawng pawhin a hre hleithei tawh lo. A vun leh a taksa han en teh; a vanglaia sa tha leh chak tak ni thin kha tunah chu a tihrawl a bo zo a, tisa pawh a nei tawh manglo. A mit kha a var thin tehrengnen tunah chuan khua pawh a hmu hleithei tawhlo! Hringhniang a chul zo ta.

Suangtuahna beiseibo si chu..

Putara chuan a vanglai hun a la hriat ve reng avangin a lung a leng thei em em a. A mitthlaah chuan an ramvahlai lei an vanglai hun an hman dan kha chiang takin a la hmu thin. Chu nunhlui ngaihna chuan a ni vel thin tu chu!

A ngaihtuahnaah chuan a silai hlui banga intung chu han ah a, a uipa nena ral lehlam tlang vela han vah leh chu a lungkham ber a ni a. Kawrte tui han in a, lungpui chunga han thut a zial han zuk vang vangte kha a thil chak ber a ni a, a tha chaknain a tlin tawh si lo. A changleh a uipa nen a hma nia an sazuk kah hliam hnu an han chhui a, kawr ruamah an han chhuichhuak a, a uipa chuan a tlanna lam turah a lo tlan khalh a, a han bauh a. Chutihlai tak chuan ani chuan a lo kap a. A uipa nen chuan hlim takin an han chan thin angte hian a han inhre thin a. Chu pawh chu suangtuahna mai mai a lo ni leh thin si.

A vanglaia a ram kalna thinte kha a mitthlaah a lo langa, a tlangdung kal dan zawngte pawh kha a la hre ruai ruai a. A ngaw te kha tunah eng ang takin la awm ang maw? tiin a ngaihtuah thin. Han kal leh pawh duh viau mah se tunah chuan a tha chakna kha vawmbo ang mai a nih tawh avangin a rilruin tlin mah se a thain a tlin tawh si lo! He khawvel hi a tan chuan lung ti lengtu a ni a, tunlai thiamna chi hrang hrangte hi ninawm mai a ni tawh. Ni e, Hringhniang an chul zo ta!