Rose Par Sen

Tlailam dar 3 a ri tep tawh a. Ka dawhkanah chuan thil ziah fel ngai tam tak a la awm hnur mai a. Chutia ka buai em em lai chuan ka phone a lo ri ral ral a, ka han en chuan ka ngaihzawng a lo ni a. Ka han chhang a, ani chuan thiltih tur a neih avangin a chhungte ina hruai lawk turin min lo sawm a. Hna ka la neih avangin ka hmanloh thu ka hrilh a, ani pawh chuan min hrethiam a, a nau a inhruaitir mai tur thu min hrilh a.

Ka thil ziah fel ngai chu ka ziak zui mawlh mawlh a, a hnu deuha chuan ka phone a lo ri leh a. Nakin lawka ka Pizawn la ni mai tur chuan mangang tih hriat tak hian min lo phone a, ka ngaihzawng chu a nau nen an chhuak chu an chesual a, taxi nen an lo insu a ni awm a; a nau zawk chu a hmunah a boral a, ka ngaihzawng chu ICU lamah a awm mek tih min hrilh a.

Ka dawhkan hnawk nuai chu ka Peon ka ko lut a, lo tifel turin ka ti a, ka hmanhmawh em avang chuan motor pawh keiman khalhin damdawiin lam pan chuan ka driver nen chuan kan tlan phei ta a. Damdawiin kawt kan thleng a, side pawh side hman lovin ka chhuk a, ka driver chuan a lo ddah fel a.

Ka lut phei a. A chhungte chu an lo awm teuh a. A hmel ka hmuh duh avangin en an phalna atang chuan ka va en zawk a. A hmel ka hmu chiah chu ka tliak hnawp a ni ber mai. Rei a awm theih loh avangin min ko chhuak leh thuai a.

Chhun lamah office-ah ka buai a, zan lamah damdawiinah ka awm leh a. Ni thum zet ICU lama a awm hnu chuan a zia ta deuh a. Cabinlamah min sawn ta a. Tlaikhat ka office bang ka va kal chu amah enkawltu zing a mi, doctor pakhat chu ka thianpa atanga ka hmelhriat hi a lo ni a. Thil awmdan ka han zawt a, a sawitha duh vak lova. Tlang taka sawitura ka ngen hnuah chuan; ka beiseina zawng zawng leh ka lo suangtuahna zik no nghelh mai chu min thuai chhum sak ta hmawk a.hetihian min hrilh a, '' Dam chu a damchhuak leh ang! Mahse, a thluak a sawh dikloh avangin a tluak a function tha tawh lova, chuvangin a rilru a fim tawh lo thung ang'' tiin. Chu thu chuan min va deng na em! A dam leh ang, mahse..mahse.. A a dawn!

Doctor room atanga ka chhuak chu ka motor-ah ka kal nghal a. Ka awmdan chu ka driver chuan hre tho mah se min zawhloh kha a tha zawka a hriat thu a hnuah min hrilh leh a.

Reife motora ka thut hnuah cabin lam chu ka pan leh a. Ka awmdan ber chu thim thama engmah eng nei lova awm ang mai hi a ni a, rilru hi a pik mup ni berin ka hria!

Cabin lama ka let leh chu ka ngaihzawng pawh chu a lo harh tawh a. Mahse, ka thianpa doctor sawi nemnghet tur chuan a lo awm ta ngei a. A changleh a phun bul bul a, a changleh a nui vak vak a, a chang leh a zai a. Hmuh a hrehawm duh ngei mai.

Kar hnih vel cabin lama kan awm hnu chuan inlamah kan inenkawl ve leh ta a. An inlamah pawh chuan zan lamah ka tlawh fo a, ka kal apiangin insawichawp a ngai ziah a. A hma thla lawka ka hming lam lam thin kha tunah chuan ka kal apiangin insawichawp ka ngai ziah a. A tuartu tan a hrehawm tur zia chu inhrethiam mai awm e.

An chetsual atanga kum khat vel a liam tawh ang. Zankhat ka leng chu a nu hian an room lamah min ko a. An nupain an lo awm a, chutah chuan thil tam tak kan sawiho a. Nakinah chuan a pa chuan, '' mami awmdan hi i hre vek a, chhungkaw dinpui tlak a ni tawh bawk si lo. Chuvangin, ngaihzawng dang neila kan nupa hian kan duh a ni. Amaherawhchu ngaihzawng dang i nei a nih pawhin keini chhungkua nen chuan kan inthiantha reng tho ang.'' tiin min hrilh a.

Ka haw kawng velah ka han ngaihtuah a, ka hmangaih em em then chu harsa ka ti si. Thenloh theih ni bawk si lo, ngaihtuah chian poh leh bei a dawng tulh tulh si a. Engtia tih chi nge ni ta ang? Chu zawhna chu chhan a har khawp mai!

Ka hman chang changin ka tlawh thin a. A tukchhuak tam tulh tulh a, beisei a bo telh telh zel mai si! A tawpah zawng ngaihzawng dang neih loh theih a ni ta lova.....

Ka khawhar lutuk leh ka rilru mangang lutuk chu tihkian tumin ka thiante chuan chaw eikhawm an lo rawt a. Ka office bang chu inlamah min lo nghak a, ka thleng a, ka inthlak fel hnuah chuan kan inzuichhuak ta a.

Kan va thleng chu rin aiin ...an lo thahnem a. Chutah an lo ruat lawk angin ka thiante thian zinga pakhat thiannu hi min lo tihpui a. Mahse, kei erawh chuan ka uk sak vak lem lo. A chhan chu hun kal tawh khan min la hneh em a.

Ka thiante chuan thiam takin inkawmna hun min han pe a,hming te inzawtin kan inbe ve naw naw a. Mahse, ngaihzawng en chuan ka en thei tlat lo! Reife kan inkawm a, chaw te kan ei a, kan eikham chuan thlah turin min ti a, hrehtak chuang chuan ka thlah a. Kan inkawm phei a, a hnuah chuan number te indilin kan inpe tawn a. A chang leh kan nui a, a chang leh kan muk em em a. Darkar chanve vel kan tlan hnuah chuan an in kan thleng a, kan inmangtha ta a.

Khatianga ka bialnu berin tawh sual a tawh atang khan ka thiante ho hian min ngaihtuah thei khawp mai a. Ka thianpa ber phei chu ka bulah a awm deuh chawt a ni ber mai. Khatiang khawpa thiantha ka nei tih ka hriat khan ka thla a muang ve deuh thin.

Kha ka thianpain min tihpui kha min rim pui fo va, kan innel ve ta em em a. Amah lah chu a hmel a thain, a inringtawk tih hi a hriat em em a. A fel em em bawk si, a hnu deuhah chuan ka rilru pawh a lo nem ve tan ta deuh a. Phone-ah kan inbia a, a len te pawh ka leng ve ta reng a. Thian aia thuk inzawmna chu an nei ta thuai a.

Kan thianho thiltih khawmna velah te pawh kan inzui nasat tak em avang chuan ka thiante pawh an hlim ve ta a. Ngaihzawng ka nei leh chu min lawmpui em em a, keipawh ka rilru ip pik lutuk chu a zia ve ta zel a.

Chutianga ngaihzawng ka nei leh tih chu ka ngaihzawng hmasa nu leh pain an hriat chuan min lawmpui em em a. Tluang taka kan inngaihzawn a, chhungkaw tha tak kan dintheihnan duhsakna te min hlan a.

Ka tan hlimna awm ve thei tawh lo tura ka ngaih tawh hnuah hlimna ka chhar leh chu ka lawm em em a, ka ngaihzawng thar nen chuan kan induh tawnin kan inthlahlel em em a. Chawlh a awm te hian kan pahnihin kan inkawp chawt a ni ber mai.

Hun leh ni te an lo inher liam ve zel a. Kan induh tawnna pawh a zual zel a. Amaherawhchu ka ngaihzawng hmasa kha ka theihnghilh ngai lova, kan chanchinte ka han hrilh a, ani pawhin min duh em a, bakah thik tur a awmlo tih a hre tho a. Engahmah a ngai lova, huat a hnekin a chanchin, a damthat leh thatloh te min zawt thin. Mitha tak ka tawng leh tih ka inhre thar a, ka thla hi a muang a ni ber mai.

Ramtuk thla a ni a, chhuanah pawh khua a la vawt ruih a. Chu Ramtuk Thla Inhmangaihte Ni a lo thlen chuan ka ngaihzawng pek tur ROSE PAR SEN ka lei a, inrinni a ni a, office kan kal loh avangin an ina kal a, tlailama zanriah kil dun tura chhuahpui tumin ka insiam a. Ka thilpek tur leh ROSE PAR SEN nen chuan an inlam pan chuan ka inkhalh phei a.

Ka tlan laklawh lai chuan ka phone a rawn ri a. Kawngsirah dingin ka han en a, ka ngaihzawng hmasa zawk nu number a lo ni a. Ka han la vat a, chutah ka aw hriatthan tak mai chuan fiah em em leh kan inkoh dan angin, '' April, vawiin hi Inhmangaihte Ni a lo ni leh ta. Khawnge i awm daih a, ROSE PAR SEN nen khan ilo kal leh dawn lo mi? Ka ngai thei khawp mai che...'' a rawn ti ta tlat mai a.......

 

Cathy Zunzam...II

Khatianga keini pahnih kan inzui tih kha ka thian lei veng zo lo tak takte khan ka chhungte an lo hrilh ni tur a ni.. A tuka ka lo mu rei deuh chu chaw ei turin ka chhungte chuan min lo kaihthawh tir a. Ka mu min kaihthawh pawh chuan min khak nghe nghe a.

Chaweikham chuan kan insiama, an unaunu chei turin an thlen inah ka hruai a. Kei ka thianpate inlamah ka kal ve leh a. An chei zawh hnu chuan min rawn phone a, ka hman huna amah lama inkhawm tura insiam a duh thu min hrilh a. Ka hman veleh ka lama, kan insiama, inkhawm tur chuan kan inzui chhuak ve leh a.

Inneih inkhawma an thuchham laite chuan ka beng bulah fiamthuin "Nakinah chuan kan la chham ve awm si a, ka zak lawk" a rawn ti a. Ka nuih a za viaunaa Biak Ina nuih chi ni hek suh! Ka zu en a, a lo nui suk a.. ka insum zo lo teuh khawp mai.

Inkhawm banah a lawmna kan han nei leh a. Kan thianho zinga thusawi thiamlo ber mai chu thian aiawha thusawi turin min han ko thut mai a. Ka sawi laklawh laiin ka zu en a, min lo nuih suk a. Buai tawh sa nak laiin ka buai nasa telh telh a. Khatia ka buai dan em em kha aw.. Hrui ni ta ila, ka hnawk kha then a har ngawt ang.

Engtin tin emawin ka zo hram a. Ka zu thu leh chu nui sen sen pahin, "i sawitha khawp mai" min ti a. Ka nuih za bawk si, ka zak tawh bawk si chuan " a nih chu a.." tiin ka chang a. Ka kut a rawn vuan a, a rawn hnai a "ka duh ber i ni a, i thusawi kha ka tan chuan ka thusawi ngaihthlak tawhah a la tha ber" a ti ta reuh a.

Thenna tuni chu...

Inneihni a ral a, mo unaute chu kar khat vel an cham hnuah chuan an haw dawn a. Chungte chu kan kutah an awm avangin ka thian pakhat nen kan thlah leh ta a. An inah kan thleng a. Zanah kan pahnihin inchungah kan awmdun a. Kan lung a leng hle a. A tukah ka haw anga, kan inhmu tam tawh dawn lo tih chu kan hre tlat si a!

Reife kan inkawm a, thil tam tak kan sawidun a. Khaw hranah kan awmdawn avangin a lungngaih thute a sawi a, ka darah a rawn bei a. A ngawi reng a, ka han en chuan a mittui a lo tla nasa tawh khawp mai. Ka kuah bet vat a. Khaw hranah awm mah ila rinawm taka ka awmtur thute, a zirna ngaihsaka, nakina kan hlimna tur a nih thute ka sawilai chuan a ngawi reng a. A hnuah a tana ka rinawm tur thu min tiamtir a. Chu thlaeng hnuai boruak rit tak hnuaiah chuan duhthawh takin kan infawp vawng vawng a. Kan chhuk a, midang an lo mu vek tawh a. Ka thianpa pawh a lo mutui tawh khawp mai. A la mut duhloh vangin kan meng leh reng a. Zinglam dar 2 velah chuan tukthuan eikhama haw tur kan nih vangin mut a rawt a. Kan inmangtha tur chu min kuai kun a, min rawn fawp ve leh a. Mu turin kan inthen a.

A tuka ka tho chu zan lamah a mu lo tih ka hrethiam nghal a. Chaw kan ei a, a ei theilo. Kan insiamlai pawh chuan a mittui a hru zauh zauh a. Kan haw tur chu mittui nen min thlah thei hram a. Ka ngaihtuah a ngaizawng a neih vawikhatna a ni a, a lak thutak zia ka ngaihtuah chuan keipawn ka vei hle tih pawh ka hrethiam nghal a.

Zirna a chhunzawm leh a, kan inngai em em a. Kan inkarah chuan inngaihzawnna mai a ni lo, hmangaihna chu a lo awm reng tawh tih chu kan hrethiam ta a. Nitin kan inbia a, kan infuih tawn a, kan rinawm thute kan intiam nawn tir ziah thin.

Ka hmu leh che.. mahse..

Zankhat chu tlai tawh takah min lo phone a. An chawlh avangin a haw dawn thute, a patea a tuka an khuaa a zin dawn avanga a haw nghal tur thu a sawite chuan kan hlim hle a. An khuaa zin turin mi sawm a, ka 'aw' rang kher mai. Kan helhhawlh bawk aniang, kan mu lo dun ve ve hial a.

A tuk tlai a ni a, ka dawr atanga ka haw laiin number hriatloh atangin phone ka dawng a. Ka han la a, hmana kan infawplai min hmutu a unaunu kha a lo ni a. A thusawi erawh ka thin a va thawng em! Ka nupui atana ka hual, ka hmangaih em em chu motor chetsual avangin damdawiin khumah thih sualin a awm mek tih ka hriat chuan ka awmdan ka chiang tawh lo. Ka hriatchin chu kawngsirah motor ka side a ni tih chiah a ni a. Ka hriat leh chuan kan inah kal turin ka insiam a, ka thianpain motor khalhin ka thian dangte leh a unaunu, ka thianpate nupa nen kan inzui a.

Kan hmanhmawh bawk a, kan tlan reilo khawp mai. An khua kan thlenga, damdawiin kan pan nghala. Mi pawh an lo tam khawp mai. Ka chhuk chiah chu a unaute chuan min lo tahkhum a. Pachan a ngai khawp mai!

A khum bulah ka phei a, doctor leh nurse te an beidawng tih chu an chezia atangin a lang reng mai. A kut ka vuan a, a hmel ka en leh a. Ni e, ka hmu leh ngei mai.. Mahse, thlan khurin a lem pil tep tawh hmel bak hmuhtur a awmlo!

A hmelthatna kha a tawhsual tawh khan a laksak a, a vun nalh em em thinah te khan hliam tam tak an awm a. Hmana ka ngaihzawng hlim em em, harh vang tak kha a tha a zawi vek tawh a. Thihna kut chuan a tham hneh ta!

A ruang chu inah an la thlaa, a bulah ka zui zel a. A nuin min tahkhum nasa ngei mai. Ni e, a nuin, "mamte, hei i thianpa pawh a lo kal a sin.. I rawn kawm dawn lo'm ni?" tiin a tap hawm hawm a. "Ni e, Cathy, ka lo zin a sin.. Min kawm turin i ka rawn ang dawn lo'm ni??"

Cathy zunzam...

Thil tam tak ka hringnunah hian ka lo tawng ve tawh a; tam tak ka la tawng bawk ang. Ka thil tawn thenkhat chu rei pawh hre zui lovin a ka theinghilh zui mai a, thenkhat erawh ka la hre reng mai ni lovin nimina thleng ang maiin ka la chiang thung!
Ni e, he khuarel hian thil tam tak min tawn tir ve tawh a. A changin hlimna leh lawmna min pe a, a changin lungngaihna chirhdup hmunah min hnuk lut thin. Thenrualtha min pe a, min lak sak a; ngaihzawng min pe a, hmangaihna min den tir a. Chu ka hmangaih chu min pawh then sak leh si.. Hmangaihnain a den sil tawh hnu a pawh then leh zet tluka na hi awm ang maw?
Khawilam lanu nge maw i nih le?
Kha ni kha ka la hrereng.. Kan thianpain khawdanga mi nupui a nei dawn a, kan tawiawm ve a. Kan thianho chu mi zakzum vaklo awmkhawm tih takah kan thlen tirh atangin kan ngampa nghal hle a. A nupui turte inah chuan kalin kan hlim hle a. Thil tihfel ngaite kan tihfel pui a. Chutia kan buai nuai nuaina karah chuan thil danglam ka tawng ta! Kum lamah a la upa vaklo tih a hriat a, mi ngawichawi leh zakzum a ni tih pawh a hriat khawp mai. A hmel leh chezia vel chu sawisel tur zawng ta ila ‘hmeithai zinga zang zawn’ ang maia vang a ni ngei ang. Chu thil danglam- Tleitiri chu..
Chutia kan zinga lo awm ve chu kei thianho zinga nula ngaihsak lo ber pawh chuan hmu mai mai thei lovin ka va kawm ta a.. Ka han kawmchian chuan a hmelthat ang bawkin a lo felin kawm a lo nuam em em a. Eng engemaw kan sawi vei luam a, kan nui nasa dun hle a. A hnuah phei chuan thiante buai chu mahni buai ve loh chuan a ziaawm deuh avangin dawrah thil leiin kan kalsan ta daih a.
Ka vawikhat hmuhna atanga ka ngaihzawn nghal dan leh ka ngainat dan em em kha tun thleng hian mak ka la ti hial thin! Ka thil hriat tawha ka la hriatthiamloh ber chu kha nula (ti tawh mai ang..tleirawl atan chuan a upa deuh hlek si a) hmel ka hmuh atanga ka duh em emna kha ka la hrethiamlo ber awm e!
Khatia dawr kan kal tak daihah khan ka thiante chuan min lo phone nghal a, kan let leh min han hmu chu an ngaihdan a ni lo tih chu zawlnei sawi ngai kher lovin ka chiang a, mahse, lalhmelthai vang a ni tih ka hriat erawh chuan pawi tihna ka neilo thung!
Kan tihtur kan tihfel hnu chuan khua pawh a lo ngui tan tawh a. Kan haw darh dawn chuan lalhmelthai chu ka thlah leh ta a. Lalhmelthai vang chuan thiante ka phatsan leh ta! Kan tlanchak vaklo bawka an in kan thleng har hle a. Mahse kha an in kan pan kawngah khan kan rilru erawh hnaiteah kan inpawhsak tawn thung. An in kan thleng a, a chhuk dawn chuan “zanah ka rawn lam ang che aw?” ka ti zauh a. A hnial em em bik chuang lo a. Kan intiam hnuah ka tlansan leh ta a..
Man inhlan zan leh nunthara bul tan zan…
Zanah chuan kan intiam tawh angin ka va lam leh a. Ani pawhin nel pawh min nel ve tawh hle a. Man inhlanna zan ngei chu keini pahnih tan pawh nunthara bul kan tan zan a ni tih tunhnu hian ka hre thar leh a..
Man inhlannaah pawh chuan kan inkawp chawt a ni ber mai. Kan pahnihin kan thudun a, midang kan ngailo. Reipawh inchhunga thu lovin inchung lamah kan chho ta daih a. Inchunga naupang infiam nak nak sira thutna awmah chuan kan thudun a, thil tam tak sawiin nunhluite pawh kan sawi hnem hle a.
Ani chu ka thianpa nupui tur pa u fanu a lo ni a. Inkutsuihna velah pawh kal a tum ve thu a sawi chuan ka bula kal turin ka sawm a, a hnial biklo a. A chanchin a sawi zel a, a zirna lama chawlh an neih vanga inneih hmang theite a nih thu a sawi chuan vannei ka inti rilru khawp mai.
Ngaihzawng chungchangte kan han sawichho a, a neih ngailoh thu leh a neih chuan rinawm tak leh pasal tur law law neih a duhthu te a sawi a. Chutia a sawi chuan a ngaihzawng nih ka duh thu fiamthuin ka sawi zauh a.. a nui a, na lote hian min han chum a… he nula hian min haw biklo em ni dawn le??
Chutia kan titi hnu feah chuan midangin min rawn chimbuai a, thian dangte nen chuan kan titi ho leh ta a.. a fala la awm ka duh tehlulnen thiante an awm ve tawh si.. Tuilo zetin kan titi ho ta a.
Zan a rei a, haw zai te kan han rel a. Ka thian..ni lo ka hmangaih chu ka thlah a. Kan haw kawngah chuan thil tam tak kan sawi leh a. Ka rilru ka han sawichuan a nui a, a awihloh thu a han sawi a, a rilru takin a sawilo tih erawh ka chiang thung!
An in kan thleng a, ka lut zawk a. Thingpuite in in ka inzawh chuan a tuka ka lam hun turte ka sawi hnuin kan inmangtha a, ka thlenin lam ka pan ta a. Ka va thlen chuan thiante ka atanga fiamna ka dawn chu phat mawi har tak a ni.
A tukah chuan a hun ka tiamah chuan ka han lam a. Mak tih deuh ka nei tlat! Chu ka mak tih chuan ka duhna a tizual bawk a. Ka huntiamah chuan a lo inpeih tawh nia mawle… Hmeichhe dang chu nise nghah a ngai ngei anga, ani erawh hun a vawngdik hle thung. A chezia atang chuan chhuah phal chi a ni lo tih chu ka chal ka hriatchian tluk zetin ka rilruah a lo lang nghal a. Kan hlan fel hnu chuan mothar turte inlam panin kan kal leh ta a.
Kan zu thlen chuan an lo insiam tan mek a. Chutia ka motor ken atanga kan chhuk dun an hmuh chuan a unau dangte chuan an fiam nasa hle a. Kan nui nasa hlawm khawp mai.
Kan inpeih fel a, chhuanna tur kan han insiam fel chuan midang tan han chuh ve chi ni tawh hek suh. Tumahin chuan ve an rawn tum tak si lohah chuan ka sawm lui ta hlawm a. Kan pahnih bakah a unau dang pathum te nen ka motor kenah chuan kan haw ho ta a.
Kan khua kan han thleng a, thlenna tur an han siam vela. Ka mi phurh te chu kan inah an dah ta hlawm a. Zah erawh a zak ru ve khawp mai. Mahse, a fel hrim hrim a, a tilang lem lo a. A puitlinzia ka han hmuh lehzel tak hnuah phei chuan rilru a luah nghet ta khawp mai.
An han intifaia, an hman hnu chuan kan khua vel chu fangkualin kan lengkual vel a. Park-ah kan lenga, midang chu kalsanin tlai nitla tur thlir kan thudun a. Tahchuan ka rilru tak tak ka hrilh fai ta vek a. Ani chuan,”Hmeichhe nikhualo deuhah min ngai maithei, min ngai mah la ka sawitheih a awm chuang lo! Ni e, ngaihzawng ka la nei ngailo a, mipa pawh nangmah ang em em a kawm leh ngainat ka neilo! Hmangaihna hi engnge a nih ka la hrethiamlo a, hriatthiam pawh ka la tum vak ngailo. Amaherawhchu, ka rilrua i awmdan hi chu a danglam khawp mai. Ka ngaina che tih pawh i hria a, hengtiang hian midang ka rilruah an awm ngailo” a ti a. Keipawhin ka hmuh tirha ka ngaihzawn nghal thute ka sawi a. Ani chuan,”Tunah hian lo chhang ta che ni ila, ka la naupang ve a, bakah nizana ka sawi ang khan ngaihzawng ka neih chu ka pasal ni theitur ka duh a. I rinawm thei dawn mi?” tiin min zawt a. Ka rinawm tur thu leh ka duhzia ka sawichhuan ani chuan,”Ni e, keipawn ka ring ang che. Ka rin ang ngei pawh ni ang che aw.. KA DUH CHE.. Ka rinawm reng ang..” a ti chu HALELLUI pek mai pawh a chakawm khawp mai. A hmel ka en a, ani pawn min lo en a. Nuih suk pahin “lerh viauah min ngai suh aw..” a ti hram a. Keichuan keimah zawk min lerh tura min ngailo turin ka dil a. Kan “AW” dun ve ve a..
Ral lehlam ka thlir a, kan inngaihzawnna tur thu kan tiam dun laia min hriatpuitu ni pawh chu a liam dawn tawh a. Khua a tlai tawh avangin haw turin motor lam kan pan a. Kan va thlen chuan a unaute chuan min lo nghak reng tawh a. Kan lut tur chu an lo nui thaw a, thildang erawh a sawi chhunzawm lem chuanglo a.
Zanah chuan kan thian dangte ho leh ka thiante nen chuan kan thianpate pahnih nula tlangval nihna tawp zan tur chu kan sûn a. Thil sûn nei e tilo chuan kan hlim hle a. Kan pahnih chuan hmun dangah kan kalsawn a.. Kan inkawm ta daih a. Eng engemaw kan sawi a, ka dar a rawn ngheng a, ka lo kuah a. Ka han en a, a rawn hawichhuak a. A hmui no nalh em em chu ka fawp dawn a, a zah avangin a kun daih a. Ka kuai dak a, ka fawp ta tho a ani pawhin a thiam ang tawk tawkin min lo chhanglet ve a. Ngaihzawng a nei ngailo tih takah infawh pawh a thiam lem lo khawp mai.. Mahse, a thiam ang anga min lo chhanlet khan a rilru zawng zawng erawh ka fawh chhuahsak a, min rawn pe bawk a ni tih chu ka hrethiam nghal a.
Mahse, thil pawi a thleng ta.. Kan inzuichhuak min lo mitmei rengtu a unaunu pakhat leh kan thianpa an han khuh khak mai chu kan lai dun teh a sin! An rawn hnaia, a zak lutuk chu a kun char char a, ka kuah bet a, a la hawi chhuak ngam chuang lo a. Ka thianpain mei nei taka a han tawng velte chuan nuih pawh a nui ngamlo a, ka khawngaih chuan ka thianpa pawh chu ka mitmei nghal a. Min luhsan leh hnuah pawh a la zak khawp mai.
Chutah kan thian dangte kan va pawh chu kan pahniha kan bo daih avang khan fiamna pawh kan dawng leh nak nak a. A puitlin em avangin a insiamrem thiam ve leh mai a. A hmelah erawh a zak tih ka la hmu thung. A tuka tihtur nei kan nih vangin kan haw darh ta hlawm a.
In kan thlenga, kan insila, kan intihfai hnuah thingpuite kan in a, mu turin kan inthen ta a..

Kan Thawnthu-II

Khatianga kan inzui tak rengah kha chuan kan inkarah chuan thian mai nilo, a aia thuk zawk thil a lo awm thuai a. A mitmei pawh vawitam ka hmu a, mahse, ka hai der lui tlat a. Ani ngaizawng tur chuan ka tlinglo a, keimah ka inhmu hniam tlat si a.

Class khatah kan awmlo ka tih tawh kha. Kan class-a hmeichhe pakhat hian min lo ngaizawng chu niin! Engtinnge ka phone number a hriat pawh ka hrelo ka class kal tur ka insiamlaiin min lo bia a, a hnua class kan off chu ka bulah a lo kal a, a thiannu birthday party-a kal puiah min rawn sawm a. Chu min sawm thu chu a rawn hriat hman avangin a awm a nuamlo hle a. "Kal suh" chu min ti dawt ngamlo nain a chezia velah chuan kalpui lo turin min duh tih chu a hriat hle a. Chutianga ka thian ve ber leh keimah avanga amah pawh inti hrehawm hial thin a nih avangin kal luihna chiah ka ngailo a, ka kal ta biklo a. Mahse, ka rilruah zawhna tam tak a lo lang a; zawhna langsar ber chu - Ka thiannu hian min hmangaih em ni? tih hi a ni. Ka han inena, ani ang tan chuan hmangaih tlak niin ka inhre lova, mah se.. midang ngaihzawng atan ka phal bik si lo.. Ka hmangaih ve tho tihna em ni?

Chutianga midang sawmna amah vanga ka hnar chu a hma aiin kan inpawhna pawh a thuk telh telh a, tunah chuan thian ang mai mai a inkawm a theih tawhloh! Kan inkarah sawichhuah ngamloh kan nei ve ve tih chu kan chezia atangin tihlan chang kan nei fo mai le!


Zankhat chu ka phone-ah sms heti hian min lo thawn a. 'Rose par hi a mawi i ti ve em? Khawvela rose par mawi ber pawh pe che ni ila rei an daih ngai lova, an til leh vat thin. Mahse, ka rilrua rose par awm erawh hi chu a til ve mai mai dawnlo a nih hi..' tiin a lo thawn a. Chutah zawng ka rilru sawiloh theih ni tawh biklo le. Ka lo vei ruk thin zia leh a bula ka awm chuan nuam ka tihzia te, ka hmangaih thute ka hrilh fai vek a. Amaherawhchu, kan dinhmun inthlau lutuk avangin ka sawi ngamloh thu ka hrilhzui a. Chhungkaw dinhmun lam a en loh thute, a pate pawhin fanu neihchhun a nih avanga a hlimna ber tur nei tura an tihthu te a sawi chhunzawm a. Kan inngaizawng chu a ni ta der mai! Kan inmangtha hnuah chuan ka muhil mai thei lova, ka ngaihtuah nasat poh leh mak ka ti tulh tulh a. Hmangaihna lo mak zia leh ropuizia te, a ril zia te ka hriatchhuah phah ta a.

A tukah chuan college-ah pawh a ngai tein kan inkawm leh a, a thian dangte chuan thian mai mai emaw min la ti a. Kan inkarah hmangaihna lo parvul mek chu tuma hriatpui lovin kan pahnih chuan mawi taka par chhuah turin kan chawm mek a ni si!

Tlaikhat chu min lo phone a, kan thiannu pakhat birthday lawmnaa kal turin lo insiam turin min ti a. A hnu deuhah chuan a lo thleng a. Kan thiannute inlam pan chuan kan kal ta a. Kan va thlen chuan thian dangte pawh an lo awm nual tawh a, kan thut hahchawlh hnu chuan inchungah kan pahnihin kan chho ta a.

Inchungah chuan kan thudun a, thil tam tak kan sawi a. A pate hnena kan chanchin a sawi thute, a pate pawhin kan inhmangaih a nih chuan pawi an tihloh thute, fapa pakhat nei belh tur anga an inngaih thute a sawi a. Ni e, a pa khan keimahah khan 'tumna ka nei a ni' tih kha a hmu thiam tlat si a. Chutia kan titi lai chuan kan thiannu chuan min rawn ko a. Kan chhuk tur chu ka kuaidak a, duhthawh takin ka fawpa, ani pawhin tha takin min chhanglet a. Kan infawp satliah mai a ni lo, rilru zawng zawng kan inpe tawn a ni. Kan thiannu birthday pawh chu hlim takin kan hmang a. Zanrei tak thleng awm lovin kan haw dun ta daih a.

Kumtawp exam a lo ni a, tha takin kan chhuak ve ve a. Ani chuan a zirzawm lova, dawrah chuan a rilru chu a sawr bing ta zawk a. Keichuan zir chhunzawm ka duh a; amah chuan inneih a, dawr enkawl dun a duh a. A pate pawhin chu chu an remti a, mahse keimah berin ka duhloh vangin a thu ka hnial a. Inhauh buangbar vel a duhloh vangin ka rilru chu a pawm ve ta a.

Ka zir chhunzawm a, ani'n a zir chhunzawm ve si lo a, inhmuhna hun pawh kan nei tam theilo hle a. Chutichung pawh chuan ka tan a rinawm a, ka tana a rilru min pek chu tlem a hnekin a zual telh telh zawk a. Hetiang khawpa min hmangaih avang hian ka tan chuan khawdang hawi san chi pawh a ni lo!

Zirna ka zo a, ka kalna line a fuh vang pawh aniang, hna tha tak ka hmu ve ta a. Khami ni, hna ka hmuh nia min lawmpui thiam zia leh a pate thleng thlenga min lawmpui kha phulo pawh ka inti khawp mai. A pa chuan kan thianho chu chaweikhawmna hun tur min siam sak a. Nawm pawh a nuam hle a.

Keini pahnih chu a room lamah lutin kan awmdun char char a. Ka zir chhung zawnga ka tana a rinawm reng avangin lawmthu ka hrilh a. Chumi pah chuan ka nupui ni turin ka sawm nghal bawk a. Ani chuan min pawt hnaia, min fawp a, palai lo tir turin min ti ta a!

Tunah chuan chhungkaw pangngai tak niin kan fa te ber pawh nikhaw hre rual a ni ve ta. Ka nupui chuan theihtawpa enkawlin keimah anga mahni kea din tum tur leh amah anga midang ngaihsak mi ni thei turin a fuih thin a.

Fate enkawl a thiamin ka chhungkaw tan a inpe zo em em a, chhungkaw awhawm ber pawlah kan chhungkua a chhuah thei hial a ni.

Ka hun kal tawh ka ngaihtuah let thin a. Thil pahnih ka neih kha ka lawm thin. Chu thil pahnih chu- mahni inrintawkna leh mahni kea din tumna rilru ka neih a, tumruhnain ka rilru a luah tlat thin kha a ni a. A dang pakhat leh chu tuna ka thuziah laia ka bula thu, ka ziah hma hmaa kan thawnthu lo sawi zawt zawttu, ka pachhiat ber lai pawha min hmangaih tlattu, mi tha tak ka nupui ka tawng hi a ni!!

Kan thawnthu-I

Puk chawp tak meuh meuhin khawpuiah chuan college kal turin ka lut ve ta rawih a. Thiante min puihna zarah mahnia inluahna tur min hmuh sakah chuan ka han invawmlut ve ta rawih a. Ka ei leh in te, ka inluahna man vel engkim chu chhungte hnena chah ngai lo turin leh tlai lama class kal ka nih dawn vangin inhlawhnatur awm ang ang chu dap kualin, a awm ang ang chu ka thawk thin a. Chung ka inhlawhna atanga ka pawisa hmuh chu ka thlantui far zawih zawih atanga ka hmuh a nih avangin a hlu a, ho mai maiah ka hmang ngailo.

Kan college chu zan lam a nih vang nge pawh ka hrelo kan thahnem ang reng phian a. Kan luhpui thenkhat chu mi hausa fa, awmtha duhlo tih hriat tak an awm nual a. Nuam tawl ringawt buaipui an ang hle thin. Ka rilru tete chuan "Keinin kan zirtheihnan hna rim takin kan thawk a, college tha pawh kal thei lovin kan phak tawk ang a nih vanga hetianga kal ka ni si" tia ngaihtuah chang ka ngah thin.

Vawikhat chu kan awmna vengah chuan veng danga awm, chhungkaw awmthei deuhin in an sa dawn a. Inhlawhturin ka inluah neitute chuan min lo sawisak a. Hnathawhtur ka hmuh avang chuan ka lawm hle a.

Kan hnathawh chu hahthlak teh mah se ka thawhloh chuan ka nghei mai a ngaih dawn avangin phur takin ka thawk thei zel a. Ka hnathawh vel an en chuan kan hnathawhna pa te pawh chu an lawm ve ni tur a ni; duhsak pawh min duhsak ve hle a.

Nikhat chu kan hnathawhna hmunah chuan kan pu chuan a fanu a rawn kal pui ve a. A hmel han en ringawt pawhin kan phulo tih a hriat nghal chu thuhran, biak pawh kan biak ngamloh tur a ni tih a chiang hle a. Mahse, chu nula chu rinai takin a lo fel a. Kan han hahchawl chu ka thawhpui dangte hnamdang an nih avangin ka bulah lo kalin min rawn be vei luam a. Kha kan inbiak ringawt pawh kha ka tan chuan hriat a nuam a, hah pawh a dam sawng sawng hialin ka hria.

Zankhat ka class kal chu kan lecturer pakhat a lo kal loh avangin class kan off a. Thian dangte canteen velah te, room vela an titi luih luih laichuan keichu pawnah thlifim thaw heuh heuh mai chu dawn ka duh vangin ka chhuak a.

Chutia pawna khawhar taka mahni chauha ka din lai chuan ka hnunglam atang hian hmeichhe aw, ka hriattawh hnu hian "va lungleng awm ve?" a tih ri hi ka hria a. Ka hawilet chu kan insak lai mek neitu kha a lo ni a. Ka phu zawk nghe nghe a. Ka bulah chuan lo pheiin kan titi dun a. Kan college a a kalna chhan ka zawh chuan dawr an nei a, amah chiah fa an neih avang leh a nu leh pain hnadang an neih avanga enkawl a ngaih vang niin min chang a. Thil tam tak kan sawi a, a changleh kan nui a, a changleh kan thutak a. Class kan tan leh dawn avangin ka kalsan a, banah inhmu leh turin kan intiam a.

Class kan bang a, kan inhmuhna tur hmun ka thlen chuan ani chu a lo awm tawh a. Ka thlen chuan min ngah rei tawh thute a lo sawi vei bawrh bawrh a. Motor a ken avangin a ruala haw turin min sawm a, ka inluah thleng chu min thlah ta a.

Chumi zan atang chuan kan inkawm tan a, kan pahniha kan awm tawh chuan kan hlim em em a, midang pawh kan ngai biklo. Min ngaihsak em em a, ka tana a nawmlohna deuh tur a nih chuan amahin hrehawm a tuar mai thin a. Chutiang khawpa ka tana inpe zo a nih vang chuan a thiante lo kawm thinte pawhin min kawm ngaih ve em em thin.

Kan inkawm rei telh telh a, kan innel telh telh a. Ka class kal leh haw lam chu min hruai ziah a. Ka mei a ni a, keipawh a mei ang mai ka ni a. Kan class inanglo mah se hunawl apiangah chu pawh then theihloh ang mai kan ni a. Kan inkawp chawt a ni ber mai.

Kha nula kha!!!

A hun leh ni ka hre ta lo. Ka hriat zawng chu chawlhni a ni a; khawdanga ka vawikhat chawlhni hmanna tur leh ka inkhawmna hmasa ber tur a ni a. Tin, kha kan inkhawmna tur Biak Inah phei kha chuan ka vawikhat luhna tur a ni nghe nghe a. Ka tan thil chhinchhiah tur leh tawn tur a tam ngei mai.

The mission bell

Kha ka inkhawm tumna kha duh vang pawh a ni lo, a nawr a nawr chhuah ang mai kan ni a. Tih loh theih a ni si lo. Phurlo zetin kan thawmhnawte lachhuakin kan han nawt mam ve thuak thuak a. Inkhawm tur chuan kan insiam ve ta.

Biak In dar a rawn ri tan a. Hun vawndik ka duh avangin hma takah ka kal a. Mipui an rawn kalkhawm tan a. A tirah chuan a hrehawm duh khawp mai, mikhual awmthar kan ni a, naupang hoin min han en deuh vung vung phei chuan ngaih a tha duhlo teh a sin.

Ka han hawikual vel a. An Biak In chhung chu a nalh hle a. Mit a titlai khawp mai. Ka hawi kualna lamah chuan thil pakhat, ka rilru leh ngaihtuahna zawng zawng la nghal vek tu thil ka hmu ta tlat mai le. Chu ka thilhmuh, Chuankite kau ang seih a hmeltha nula mawlh mai chu…!!

Phuloh Thanghmingliani

Chu nula ka hmuchiah chu ka rilru leh ngaihtuahna zawng zawng min laksak a. Hawisan leh mai pawh harsa tak a ni. A khat tawkin ka en leh zauh zauh thin a. Chu chauh pawh chu ka tan chuan a lawmawm khawp mai!

Chu nula chu duhawmna leh mawinain a tuamhlawm, hmelthatna zawng zawng nei tura khuavang siamluih ang mai hi a ni a. A hmel leh pianziaah chuan sawisel tur awm miahlo khawpa PIANTHIAM-I a ni a. A vawikhat melh ringawt chu zawngtah kung atanga tlakah hlawh rawh ti ta se ka tla nawn ka tla nawn duh hial ang.

Sakhmel tawnloh Lungrun-i chu..

Tunah chuan kum tam a liam tawh a, kha ka inkhawmna hmun atanga ka chhuahna pawh a rei ve leh ta. Amaherawhchu kha nula kha engtiklai mahin ka theihnghilh ngailo a. Theihnghilh a hnékin nitin rilruah a zûnzam a cham telh telh si.

Nikhat chu ka vanneih a siamin kha nula biakpawh theihna number kha ka nei ta hlauh mai a. A lawmawm duh ngei mai. Mahse, va be ve ngawt ila min lo hre ve angem? Chuta chiang ber chu engmah a chianglo tih chauh a ni!