Kan Sikul kha...

Kum tak tak a ral hnuah pawh ka mitthlaah a cham reng thin a, ka ngaihtuah let changin ka lungleng a, a changin ka nui thin. Ni e, thiamna pawchhuak ve tura ka tanna; tun thlenga KAN SIKUL ka tih tak kha ka tan a hlu em a ni.

Kha kan sikul kha tlangzawlah a ding ve bai a. Khami khan naupang tam tak min awm tlei a nih kha. Kan sikul kha kan chhuan ve thin tehlulnen sikul dang naupangho chuan,'Bawng ei bang sikul..' min han tihsak thin kha chu hnial a va har tawh tak em.

Tunhnua ka ngaihtuah leh hian Bawng ei bang tih kha a ni tak tak awm mang e aw..' tih chang ka ngah thin. Nia, zep lovah chuan a chhe em a ni. Zirtirtute'n tukverha zuah chhuahloh tur tih dan an han siam ve tak naa, 'tukverh hnuaiah pawh..' tih an siamtel loh avangin duhtawkin a hnuaiah kan chhuak thei tho thin. Zing kan han kal te hi kan class kawngka chhunglama vawk nawr khuar kuk mai han hmuh te khan sikul dang naupang an awmlo chu lawmthu kan sawi nghal mawlh mawlh zel!

Mahse, khati khawp khan chhe mah se, mi tam tak nun zirna a ni a. Kan nunchan te kha tunhnua ka ngaihtuah leh hian mur uaih uaih chang ka nei thin. Khawvela sipai rorum ber pawl pawhin an trainningna hmunah pawh an tihloh tur kham inlawn siak te, thingkung atanga in zuan thlak siak te, chala sunhlu tauh keh tum te kha aw..a hunlai chuan mi aia sang atanga zuan thlak te, mi aia awih panga lawn te, mi aia lian sunhlu tauh keh te kan tum thin a. Tunhnua ngaihtuah let leh hian mutthilh theihloh khawpa hlauh chang ka nei thin.

Zirtitute kha an lo hah dawn hian ka hre thin. Form chu awm mah se duh hun hunah kan ha a, kan ha lo leh mai a. Dan khan na takin min phuar lem lo. Thiante tap han awm sela zirtirtu hrilh hmasa ber nih kan tum theuh a. Mi velh a nih phei chuan a veltu kha hauh tir tum ranin kan han sawi ta thin a. Zirtirtu tan chuan a luhaithlak duh dawn hian ka hre thin. A tu ve ve pawh lungawia siam a ngai thin a. Khatiang huna han chalrem kha chu khawvel khawi court-ah mah an rem thiam kher lo maithei.

Zirlai kan han zir dawn a, tlar lehlam ami zun a han chhuak a, zun a dil a, chu veleh a indawtin kan han che ve mai thin chu class la tur e ti lo chuan chhuah fai vek chang a va han tam thin tak em! Khatiangah pawh khan dawhtheitakin min nghak thintu zirtirtute kha an va hlu em!

Kan zirtirtupa Bawng insi lawm vang khan tun thleng hian bawng insi ka la lawm phah hial. Sikul han tlai ila, ''Ngatinge sikul i tlai..?'' ''Bawng insi kan en a..'' '' (Phawk hraw chungin) Chu tunah an la insi em?Tute bawng leh tute bawng nge? Tute bawng nge chak zawk?'' a han tih tawh kha chuan hremna hi kan pumpelh chawk thin. Naupang khan kan hre thang tlang tawh bawk a. Sikul kal dawn lai vel hian sikul kawngah Bawng hi an insi nitin hial thin!

Chawlh mawlh mai kha aw. Zirtirtuin chawhnuah lehkhabu keng lova hming lamna bu chauh a rawn ken kha chuan zawlnei sawi kher ngai lovin kan chiang tlang vek tawh a. Kan sak-hawk nasa lutuk kha khapna lamah hun reife kan han hmang leh a. Chawlh thu a han puang chiah mai chu kan chetdan kha lei mihring tawnga sawifiah chi a ni lo. Dawhkan chung lo lawna, lo zuang vel kha chu a zezawi pawl tih thin a ni..a sawifiah theih pawh a ni lo. Kan thawm pawh Veng lehlama chhiattawk awm tan pawh ngaihthlak a hrehawm ngawt ang.

Khatianga min lo awm tlei a, tuna ka awmdan ka thlen theihna tura thil pawimawh zing ami KAN SIKUL kha a lo va hlu em! Khawnge, dar rik tawh hnua kan la inhleiin zirtirtu lo kal kan hmuh a kan tihdan khan a tawp kan khar teh ang... (good morning, good afternoon tih vela kan wish thin zirtirtu lo kal chuan) ''GOOD A LO KAL.. GOOD A LO KAL..''

Zu kan rui e

Khap Burna dan lek kawh mah se, khap rem theih a ni miau lo a, a man a to phah in, chhe zawk mah se in loh theih a ni si lo. Veng tawp lam nuthlawi in lam kan han pan a. Paihte riltam ang maiin kan kal vut vut tawh mai ni. Chutah a hmun kan han thlenga, Biaksailovi ngei mai chu uluk takin kan han chul vel ta a.

Kan duhtawka kan han kawih let vel hnuah chuan haw turin kan inbuatsaih a. Kan thianduna kan kal kha kan kalna lam tur pakhatin a hria a ni chek ang chu- a rawn lang hlawl mai a. Inzawnna tur kan va hre tak em aw.. A han rim veleh a. A bem thluk takah chuan kan haw dawn a.

Bike a lo keng bawka kan inpathum dawn a. Chutah a chuang a, a han tinunga lawn ve hmain a tlan ta daih a. Tihngaihna awm tawh hek lo le, kein muangchangin kan phei a. Hmanhmawh zetin a rawn let leh a, “Sawlaiah sawn ka tlu a, ka harh zawk a, ka rawn lam leh dawn che u a” a han ti mai chu chuan a chakawm tawh lo teh a sin.

Hmana khaw pakhat kan zinnaah Biaksailovi kan rim leh alawm le.. Thenkhat lo uar fal an awm ta! Kawngpui hmun rem lai a lo bel a; a khua a len lutuk loh avangin an khaw tlangval chuan kan thlennah an rawn zawn lut dawn a. Chutiang khawpa khaw tlangval fel bulah chuan lawmthu hrilh mawlh mawlh tur a nih laiin an khaw zu an sawichhe hram a.. “In khaw zu ve hi ***** (an khaw bul hnai) ek pawh a tluk lo” a la tih khum nek!

Chutia an inzawnluh hnu chuan tlangvalho chu an kal leh mai a. Kan thianpa chu a chatthla thei si lo, a chang leh kan kohhran upa phone a, dan pawna inhnawhchhuahtir te a tum thul! Hahthlak teh a nia. Hemi zan hian kan indaihzai hlawm khawp mai thenkhat kawrah an lo lum a, hruizena lakchhuah a ngai a, thenkhat thlenin rana lo chatthla tawk nen. Kan che pui bawka, an khaw ho khan an khuaa kal fo atan min it kher lovang! Ni e, keiniho zingah chuan vuak luhai chiah duh lo pawl an tam bawk a ni..

Kan thian pakhat pawh an thenawmpain motor sil puiah a sawm a, sil hmain sil huaina an han khulh te te a. Chutah le, a thawk ta alawm le, motor sil chu khawilam, motor atangin a vak thla hram a, an inah a vak lut thei ta tawk a. Insawm fu lo ve tak an ni.

Kan thiante ruiphur hian kan thian dang nupui neithar chu an mut vek tawh hnuah a nupui an han en mai chu(h)…

Tleitiri Zunzam

” Naktukah ka hrilh tawh ngei ngei ang..” tiin ka zan mut hmunah te ka ngaihtuah thin a. Mahse, a tuk a lo thlen chuan hrilh a hnekin a hmel hmuh ringawt pawh ka zak leh zawk thin si. Ka tawh dawn te lahin hel hram dan ka ngaihtuah thin a, keimah zawk hi ka lai chhe tlat thung.
Ka rilruah ngaihtuahna chu min lak sak vek a. Amah lah chuan a hre der mai si lo. Han hrilh hre turin huaisenna reng ka nei bawk si lova, lo hrilh ta ang pawh ni ila..a hma aiin min hlat zawk hial emaw aniang a. Hrilhloh law law a, lo ngaihzawn ruk kha ka tana thil tha ber niin kka hre ta zawk a.
Phuloh Thahmingliani chu..
Tleirawl tirte, he khawvel damchhung lungkhamnain a la tihbuai phak loh; engkim mai chu tluang purh zel thei tura a ngaih hunlai a ni a. Nuih duh hunlai tih takah a thiante nena an awmkhawm chu an thawm pawh a tha thei ham ham khawp mai. Chutianga hlim taka an nuih laia a sir kilkhata lo thu, amah lo thlithlai deuh rengtu, a rilru zawng zawng petu ka nih erawh a hrethiam si lo.
Amah chu duhawmna leh mawina zawng zawng nei tura khuavang siamluih, hmelthatna Lalnu niawm khawpa duhawm a ni a. A hmelte lah chu chuankite kau ang seih hmelpu, Lasi note ang maia hmeltha a ni a. A laka ka luanliam zia hi hria se chuan min khawngaih avangin min ngaizawng ve duh hial maithei!
Kan intawn dan..
Kan intawn dan.. ni lo, ka tawn dan chu hetiang hi a ni. Zankhat chu tihtur a awmloh em avangin facebook lamah ka han dak zuai a, chuta lo online pakhat nen chuan kan inkawm a, kan infiam a, thutak te kan sawi dun mai mai a. Nuam kan ti aniang Sana pawh a lo kal chak ngei mai. Kan inmangtha hnuah chuan ka muhil zui ve ta a.
A tukah pawh chuan kan inbe leh a, a zan hmasa ang bawkin nuam kan ti leh em em a. Chutah, kan inkawm chho zel a, a thiltih thinte ka han zawt a, kan nunphung inhriat tawn tumin kan inzawt chho ta a. Rinloh tak maiin kan college luhna a lo inang reng mai!
Chutia kan college luhna a lo inan takah chuan inhmuh ka chak thute ka han hrilh a. Ani pawhin inhmuh chu pawi a ti biklo. Zan a rei lam ta bawk a. Kan inmangtha leh ta a..
Huaisenna reng ka neilo..
A tuk class kan kal chu inhmuh ka nam ta tlat lo mai a. Amah chu ka va hmu a, ka hre nghal mai a. Ani erawh chuan min hrechiang si lo. Ngatinge maw huaisenna reng ka neih tak loh le..??? College kan bang a,ka la hmu ngam chuanglo.
Zan lamah chuan kan inbe leh a, chhuanlam te ka siam kual ta vel mai mai a. Dik tak chuan ka dawihzep vangin ka hmu ngamlo a, ka inhmelhriat ngam si lo.
A tuk class kan kal leh a. A kar leh a college week neih turah house kan insiam fel a. Kei, a sa harh a harh ta na na na kha ka nia. House leader kan ni a, assistant turin hmeichhe pakhat kan thlang a. Karei leh! Amah kha a ni tlat mai.
Naktuk a awmthei si lo..
Kan housea kan nihna avang chuan kan inzui ngun ta khawp mai a. Ani tan chuan engmah ka ni lo a. Keia tan erawh ka khawvel a ni thung si. Keiin ka hriatchian em em laiin ani erawhin Facebook lama a biak thin kha ka ni tih a hre si lo. Zan tin hian ” Naktuk chuan ka inhriattir anga, ka ngaihzawn thu hi ka hrilh ang..” tiin ka rilru ka siam a, a tuk a lo ni leh cheng a..hrilh lovin ni ka hmangral leh thin.
Zan khat chu ka vei ngang a, ka phone ka la a, a number ka hmet chhuak a. Amah thawn turin SMS ka type a. Ka type zo a….

Ka dawn thinn...

Engtikah emaw chuan he ka hringnun hi thlankhurin a angchhungah a la dah ve ngei anga, ka lungphu chuan min thlahtute lungphu zawmin lungphu dang a nei tawh ang. Ka taksa chu vaivuta luangral turin thlahliam a ngai tawh dawn si a..

Chumi niah chuan, zingkara mawi tak taka khuang thin arpate leh kawmthlang huana infiam thin sava te chuan min kaihthawh an tum hmasa ber anga, chu an tumna chu ka chhang thei tawh dawn si lo...

Nitina ka tana rawn chhuak thin ni khian a ngaite bawkin min rawn chhun leh anga; chutih hunah chuan nidang anglo takin ka mu lui tlat anga. Hrilhai takin ka siam phah dawn a ni.

Tlangval tlawmngaiin ka kumkhaw hmuntur an siam, leih an laih khuarah chuan min dah thla ang. Nidanga ka addess kha THLANMUAL tia thlak a ngai tawh ang.

Ni e, engtik niah emaw chuan ka hun hi a liam anga, ka lei taksa chu vaivutah a kir tawh ang. Mahse, ka hming erawh ka thiltih hriatrengtur a awm a nih thung chuan a dai tawh ngai lovang...

NIE, KA DAWN THIN.. KA HMING HI KA TAKSAIN THLANKHUR A PAN RUALIN A DAI ANG NGE KUMKHUAA HRIATRENG A NI TAWH ANG? tiin...

Pan lai nun ka ngai zual thin..

Vawikhat tal nunhluiah hian let leh thei tehreng ila aw!

Kan naupan ve lai kha tunhnu hian ka ngaihtuah chhuak thin. Sikul kan han bang a, inah kan han hawng a. Chhungten min au ang tih hlau fahranin ipte kan dah zawk a, a lut lam aimaha chakin kan han lim chhuak leh puat a; hla fe kan thlen hnuah a ralmuang ta maw tihin kan han tlan zawi deuh a. Thaw hlawp hlawp chungin thiante kan va fin a. Tunah chuan kan zalen ta!

Kan han inhmukhawm a, a changleh tuichengin kan kal a, a chang leh tlangsam hmunah a hmaa kan bawh-en bak zawng chu ralte vahai no la aimaha bengchheng tur khawpin kan han bawh leh a. Tifuh loh changa hmawlh zum velin kan dul velte a chhun rin riai pawh khan kan tap ngai lo. Ni e, tunlai naupang han tahna awma tah kha chu pa lohnaah ngaiin kan insum hram hram a, kha khan tawrhchhelna pawh a lo zirtir ve reng zu nia!

Sephung kan han lai a, kan han insiktir thin laite kha aw.. “Mihring ek ami a huai duh” tiin mihring ek vung tharlam zawngin tlai hun hmanliam changte kha a awm thin. Kan han hmu ve a, midang kan ngam zawngte khan an lo hauh ve ngei a. Vau pahin engtin tin emaw kan han chhuhsak thei hram a. Ngamloh kan tawn chang erawh kha chuan hreh tak chunga kalsan a ngai si..

Kawlbulah ni chu suk chen vel a la awm a. Inah haw a han ngai tlat thin te kha aw.. A chakawm loh thin mang e. A changchuan nu leh pa phallohin kan lengchhuak kha a ni thin si a. Min lo hmuaktu tur kan chiang thin si. Tunlai naupang anga in atanga chhuah thinrim nachang kan la hre ve si lo. Tlai lamah hlim viau mah ila, haw dawn hnaiah kha chuan “ka lo leng ta kher kher kha aw..” tih rum rum chang kan nei thin. Sim erawh a har thung.

Zanriah eikhamah pawnto turin kan han chhuak khawm leh thin te kha a va nuam thin em. Tunlai thangthar chuan pawnto awmzia pawh an hre tawh mang lo emaw a ni anga. Keizawng, heng pawnto hlate hian ka lung a tileng thin.

Kan pawnto zo tur aia ute’n min han sawithaih a. Hlau chung chunga hawn a ngai si. Hla tawk tak atangin nute kan han au a. Min hruaitura sumhmuna rawnchhuak hmuh veleh theihtawpa kan han tlan te kha mitthlaah a cham reng thin.

Ni e, khang purun te, khairek te, inthum kar te kha a hunlai kha chuan an hlauhawm dan kha tunlaia chiang mang lova ramhuai hmuh ai hian a nep chuang awm love..

Zana kawmthlang chingpirinu a han thizûn te kha a hunlai kha chuan kan hlau thin teh e.. Tunhnuah erawh zawng, chingpirnu pawh a tak hmuh tur a lo vang ta a, a thizun ri ngat hre tur phei chuan vanneih a ngai tawh a ni. Aw, lui kan han kal changa Tuitu hram ri vanga hming kan sawi thap thap laite khan khawvel hi a la mawi a sin.

Hun kohkir theihlohna leh nakin hun pawh hmuh thiam theihlohna ramah hian KAN NAUPANLAI KHA ngaih changni a tam mang e..

Kei ka tan chuan e.. Lunglen a na e...

Keizawng, ka nunhlui ngaihna hian kianni a nei dawn lo a nih hi..

Kha kan naupanlaia kan nun dan kha tunhnua naupang nun dan nen hian ka han khaikhin a. Tunlaia mi tan chuan a mawlmang viau pawh a ni thei e, mahse, khang hun laia kan nun kha chu a mawi a sin.

Sava veh te kha tunlaiah chuan thil thing a ni tawh a. A hun lai kha chuan kan hna pui ber a ni thung. Khuangthli rah tlan han chan a, tukhumvilik leh tlaiberh vel chiar nak nak lai sairawkherhin kan han tin a, kan han kuai kur a, sava perh thlak ngei tumin mahni kutzungpui duhlai ngei mai kan han perh pawh thin te kha aw..a hunlai kha chuan a va na duh em!

Kan te thawmah sava an han thlawk darh chum chum te kha kutzungpui fawp vawng vawng pahin kan han thlir liam te kha aw.. A chang leh a ngulah ngei mai kan han perh thin kha chu a uihawm duh ngei mai.

Saihlum kan han hrual a, a lian deuh perhna tur te, vate mawng dawmna tur kan han tizum deuh te kha tunlai naupang hian hrual thiam ve tak maw? Mu perhna tur saihlum kha chu a lian thei bik teh e.

Tunlai naupang angin eirek nei ve vak hek lo le. Thingzung te, thingrah leh hnah te nen lam khan kan ei thin kha a ni a. Kan kam a hlei viau e ti lo chuan kan ei leh in avanga na em em han neih erawh a awm ngai lo thung.

Kan naupang laia sa kan han rawp theih zia te kha aw. Krismas a sa kan ei kha tihfuh changin a kar lakah vawi hnih khat kan ei zauh a, chet fuhloh kum deuhah chuan a kum leh krismas kha sa ei lehna hmasa ber a ni thin. Tunlaiah chuan tuktinin vawksa pawh lei tur a awm ta. Kan naupanlai, tute’n emaw vawk an talh dawn tih khaw khah a a khah hunlai, naupanghoin ei ve hram tuma kan hel laia sa anga tui khan engtikah mah ka eitui leh tawh lo’ng e.

Tawlailir kan han siamchawpa, kawngchhuka kan han chuang thin te kha. A hunlai chuan kha aia nuam kha a awm kher lovang. Kan lirthei hmuh chhun a nih miau avangin chuan inchuh a han inkhuainuai rap rap awm thin te kha a lo awmlo chuang lo e.

Inrinni hi duh aiin a awm zing thin. Kan u ten bual turin tuikhurah min han pawtthla a. Khang hunlai kha chuan inbual aia vuak thlan chang kha a va tam em! Tuikhurah chuan tuipui kama sapho pawhin “em em a..” an tihtur khawpin min han phelh a, min kuai kun a, chhip atanga tuikhur tui vawt tha tak maia min han leihlaia tah loh kha chu a va har thin em..

Tun hunah te hian khang tuikhur kha la awmin, a tuite kha a la vawt angem aw? Khang tuikhur hnar ngaw a sava te khan nunchan an la zir ngai angem le? Chuta chiang ber chu engmah a chiang lo tih chauh a ni.

Khang kan naupanlai hunah te khan let leh thei dawn ila chu kum khat sal tan nen pawh ka thleng phal ngei ang. Mi thenkhat tan chuan atthlak pawh a ni maithei. Mahse, duhamna leh nawmsipbawlna atanga hlimna zawn tum aia a atthlakna ka hre bik lo e..

Zan lungngaihthlak!!!

Harsa taka lehkha ka zir khan tawrhchhelna min pe a. Tunah erawh kha tawrhchhelna khan engmah a thawk theilo.

Theihtawpa lehkha ka zir laia rinawm taka min lo nghak tang tang tu khan tunah chuan ka bul khumah a mu a, ka kiang velah chuan chhungkhat laina hnai in an kil bial taih a.. an hmelah chuan hlim hmel hmuhtur a vang a, lungngaihnain chu inchhungah chuan thla a zar a ni tih a hriat theih a. Ni e, ka bul khuma mu, ka hmangaih em em chuan kumkhuain min mutthilh san tawh dawn a ni.

Ka tap thei lo a, rilru mumal ka pu thei hek lo. Pachang taka tuar ka tum a, pangchang taka tah hawm hawm a awlsam zawk si. Min hnem tura lo kalkhawm ka thlir a, kan thil tawn chu a namai loh zia ka hrechiang telh telh thung. Mittui tla zawih zawihin a hmel ka thlir a.. kan nunhlui ka han chhuikir a..

20/03/1996

College chawlh lai a ni a, kan khawlama ka haw chu ka thiante ina ka leng chu an chhungte hmundang ami awmpui an lo nei a. A tir lamah chuan engvakah ka ngai lem lo a, mahse kan han inkawm fo tak hnuah kha chuan kan innel ta em em a. A hnu deuhah phei chuan thian satliah ang mai chuan kan inen tawh lo, kan inkarah chuan midang hriat ve loh thil inthup chu a awm tan ta.

Vau thla chawhnu lam a ni a, ni a kang thain khua pawh a lum kher mai. Kan thianho chu luiah tuichenga, intihlim pah turin kan kal a. Ka lo ngaihzawn ruk ve deuh pawh chu a lo kal ve a.

Lui kan thleng chu a lo nuam kher mai. A duhin tui an cheng a, a then chu tiau phoah kan lo infiam bawk a. Chutia hlim taka kan inkawm karah chuan mitmei ka hmuh zauh zauh avangin ka thut hnaih a, kan kalsan ta daih a.

Chutia kan kalsan chu midang chuan engvakah min ngailo a, keini erawh chuan kan rilru chhungril inhrilhtawn tur kan ni tih kan chiang thung. Hla vak loah chuan kan thudun a, engemaw te sawiin kan titi vei luam a. Chutah kan thutak telh telh a, kan rilru chhungril ber thlengin kan phawrh fai ta vek a. Chumi ni atang chuan thian mai kan ni tawh lo..thian aia thuk zawk inzawmna chuan nghet taka suihzawm kan ni tawh.

Hlimlai nite chuan..

Ani chu a felin a hmeltha bawk a, mi pawh a ngaihsak thiam em em a. Ka tan chuan sawiselbovi a ni ber mai. Ka thatna tur leh ka lawmna tur a nih dawn phawt chuan engpawh tuar turin a inpeih reng thin.

Zirna ka chhunzawm a lo hun leh pawhin tha takin min fuih a, tha taka a lo awmtur thu leh nupui fanau chawm thei ka nih huna hlim taka chhungkaw din thei tura rinawm taka a awmtur thute min hrilh a.

Ka zirna ka zo a, hna te ka han zawng ve a. Vanneihthlak takin ka hmu ve ta hlauh mai a. Khami ka hna hmuh thu a hriata a min lawmpui thiamzia te kha mitthlaah a lo lang thar leh a. Lung a va leng em!

Thihna kawr ruamah chuan..

Kan chanchin leh kan inkar thute chu ka thiante chhung chuan an lo hre ve vek tawh a. Chutianga hna ka neih tak hnuah chuan chhungkaw din tura ka inpeih tawh avangin palai tirh te ka tum ta a.

Ani chu an khaw lamah a haw anga, chutah chuan palainena umzui turin kan intiam ta a. Chumi a haw tur ka thlahte pawh chu a hlim kher mai. Kan inkai phei a, kawngbula kumtluang par lo awm chu thliakin min pe a. Motorah min lawn san ta a.

Kha a pangpar min pek kha a thil min pek hnuhnun ber tur a ni ang tih ka ngaihtuah ngai lo. Ka haw a, ka dawhkanah ka dah a. Room vel ka tihfai lai chuan ka phone a lo ri a. Chuta ka han chhang chu ka thil hriat duhloh ber mai ka hre ta. Ka nupui hual nimai tur chu motor insu avangin a boral a maw??? Aw, i pangpar min pek pawh a la viau lo a sin..

Phone ka dah a, engtik laiin nge an chetsualna hmun pawh ka thlen ka hre lo. Ka hmangaih em em chu thisenin a bual nuaih mai ka hmu chu thlir a va hrehawm tehlul em!

An khawlam pana kan kal kha ka va hre tam lo tehlul em! An in kan thlen a a chhungten min tahkhum atang khan ka harh zawk a ka tap theilo, a na a ni!

Chungkaw din kan tumna chu vawm bo a ni ta a, kan hlimna pawh chu thlan khurin min lak sak ta. Naktuka ka hmangaih an phumna tur thlanmual lei chu kumkhuain ka tan chuan lei satliah a ni tawh lo ang.. ka hmangaih taksa a tel ve tawh avangin!

Aw, ZAN LUNGNGAIHTHLAK tak a va ni em!