Wednesday, November 23, 2011

Ka dawn thinn...

Engtikah emaw chuan he ka hringnun hi thlankhurin a angchhungah a la dah ve ngei anga, ka lungphu chuan min thlahtute lungphu zawmin lungphu dang a nei tawh ang. Ka taksa chu vaivuta luangral turin thlahliam a ngai tawh dawn si a..

Chumi niah chuan, zingkara mawi tak taka khuang thin arpate leh kawmthlang huana infiam thin sava te chuan min kaihthawh an tum hmasa ber anga, chu an tumna chu ka chhang thei tawh dawn si lo...

Nitina ka tana rawn chhuak thin ni khian a ngaite bawkin min rawn chhun leh anga; chutih hunah chuan nidang anglo takin ka mu lui tlat anga. Hrilhai takin ka siam phah dawn a ni.

Tlangval tlawmngaiin ka kumkhaw hmuntur an siam, leih an laih khuarah chuan min dah thla ang. Nidanga ka addess kha THLANMUAL tia thlak a ngai tawh ang.

Ni e, engtik niah emaw chuan ka hun hi a liam anga, ka lei taksa chu vaivutah a kir tawh ang. Mahse, ka hming erawh ka thiltih hriatrengtur a awm a nih thung chuan a dai tawh ngai lovang...

NIE, KA DAWN THIN.. KA HMING HI KA TAKSAIN THLANKHUR A PAN RUALIN A DAI ANG NGE KUMKHUAA HRIATRENG A NI TAWH ANG? tiin...

Pan lai nun ka ngai zual thin..


Vawikhat tal nunhluiah hian let leh thei tehreng ila aw!
Kan naupan ve lai kha tunhnu hian ka ngaihtuah chhuak thin. Sikul kan han bang a, inah kan han hawng a. Chhungten min au ang tih hlau fahranin ipte kan dah zawk a, a lut lam aimaha chakin kan han lim chhuak leh puat a; hla fe kan thlen hnuah a ralmuang ta maw tihin kan han tlan zawi deuh a. Thaw hlawp hlawp chungin thiante kan va fin a. Tunah chuan kan zalen ta!
Kan han inhmukhawm a, a changleh tuichengin kan kal a, a chang leh tlangsam hmunah a hmaa kan bawh-en bak zawng chu ralte vahai no la aimaha bengchheng tur khawpin kan han bawh leh a. Tifuh loh changa hmawlh zum velin kan dul velte a chhun rin riai pawh khan kan tap ngai lo. Ni e, tunlai naupang han tahna awma tah kha chu pa lohnaah ngaiin kan insum hram hram a, kha khan tawrhchhelna pawh a lo zirtir ve reng zu nia!
Sephung kan han lai a, kan han insiktir thin laite kha aw.. “Mihring ek ami a huai duh” tiin mihring ek vung tharlam zawngin tlai hun hmanliam changte kha a awm thin. Kan han hmu ve a, midang kan ngam zawngte khan an lo hauh ve ngei a. Vau pahin engtin tin emaw kan han chhuhsak thei hram a. Ngamloh kan tawn chang erawh kha chuan hreh tak chunga kalsan a ngai si..
Kawlbulah ni chu suk chen vel a la awm a. Inah haw a han ngai tlat thin te kha aw.. A chakawm loh thin mang e. A changchuan nu leh pa phallohin kan lengchhuak kha a ni thin si a. Min lo hmuaktu tur kan chiang thin si. Tunlai naupang anga in atanga chhuah thinrim nachang kan la hre ve si lo. Tlai lamah hlim viau mah ila, haw dawn hnaiah kha chuan “ka lo leng ta kher kher kha aw..” tih rum rum chang kan nei thin. Sim erawh a har thung.
Zanriah eikhamah pawnto turin kan han chhuak khawm leh thin te kha a va nuam thin em. Tunlai thangthar chuan pawnto awmzia pawh an hre tawh mang lo emaw a ni anga. Keizawng, heng pawnto hlate hian ka lung a tileng thin.
Kan pawnto zo tur aia ute’n min han sawithaih a. Hlau chung chunga hawn a ngai si. Hla tawk tak atangin nute kan han au a. Min hruaitura sumhmuna rawnchhuak hmuh veleh theihtawpa kan han tlan te kha mitthlaah a cham reng thin.
Ni e, khang purun te, khairek te, inthum kar te kha a hunlai kha chuan an hlauhawm dan kha tunlaia chiang mang lova ramhuai hmuh ai hian a nep chuang awm love..
Zana kawmthlang chingpirinu a han thizûn te kha a hunlai kha chuan kan hlau thin teh e.. Tunhnuah erawh zawng, chingpirnu pawh a tak hmuh tur a lo vang ta a, a thizun ri ngat hre tur phei chuan vanneih a ngai tawh a ni. Aw, lui kan han kal changa Tuitu hram ri vanga hming kan sawi thap thap laite khan khawvel hi a la mawi a sin.
Hun kohkir theihlohna leh nakin hun pawh hmuh thiam theihlohna ramah hian KAN NAUPANLAI KHA ngaih changni a tam mang e..

Sunday, November 6, 2011

Kei ka tan chuan e.. Lunglen a na e...


Keizawng, ka nunhlui ngaihna hian kianni a nei dawn lo a nih hi..
Kha kan naupanlaia kan nun dan kha tunhnua naupang nun dan nen hian ka han khaikhin a. Tunlaia mi tan chuan a mawlmang viau pawh a ni thei e, mahse, khang hun laia kan nun kha chu a mawi a sin.
Sava veh te kha tunlaiah chuan thil thing a ni tawh a. A hun lai kha chuan kan hna pui ber a ni thung. Khuangthli rah tlan han chan a, tukhumvilik leh tlaiberh vel chiar nak nak lai sairawkherhin kan han tin a, kan han kuai kur a, sava perh thlak ngei tumin mahni kutzungpui duhlai ngei mai kan han perh pawh thin te kha aw..a hunlai kha chuan a va na duh em!
Kan te thawmah sava an han thlawk darh chum chum te kha kutzungpui fawp vawng vawng pahin kan han thlir liam te kha aw.. A chang leh a ngulah ngei mai kan han perh thin kha chu a uihawm duh ngei mai.
Saihlum kan han hrual a, a lian deuh perhna tur te, vate mawng dawmna tur kan han tizum deuh te kha tunlai naupang hian hrual thiam ve tak maw? Mu perhna tur saihlum kha chu a lian thei bik teh e.
Tunlai naupang angin eirek nei ve vak hek lo le. Thingzung te, thingrah leh hnah te nen lam khan kan ei thin kha a ni a. Kan kam a hlei viau e ti lo chuan kan ei leh in avanga na em em han neih erawh a awm ngai lo thung.
Kan naupang laia sa kan han rawp theih zia te kha aw. Krismas a sa kan ei kha tihfuh changin a kar lakah vawi hnih khat kan ei zauh a, chet fuhloh kum deuhah chuan a kum leh krismas kha sa ei lehna hmasa ber a ni thin. Tunlaiah chuan tuktinin vawksa pawh lei tur a awm ta. Kan naupanlai, tute’n emaw vawk an talh dawn tih khaw khah a a khah hunlai, naupanghoin ei ve hram tuma kan hel laia sa anga tui khan engtikah mah ka eitui leh tawh lo’ng e.
Tawlailir kan han siamchawpa, kawngchhuka kan han chuang thin te kha. A hunlai chuan kha aia nuam kha a awm kher lovang. Kan lirthei hmuh chhun a nih miau avangin chuan inchuh a han inkhuainuai rap rap awm thin te kha a lo awmlo chuang lo e.
Inrinni hi duh aiin a awm zing thin. Kan u ten bual turin tuikhurah min han pawtthla a. Khang hunlai kha chuan inbual aia vuak thlan chang kha a va tam em! Tuikhurah chuan tuipui kama sapho pawhin “em em a..” an tihtur khawpin min han phelh a, min kuai kun a, chhip atanga tuikhur tui vawt tha tak maia min han leihlaia tah loh kha chu a va har thin em..
Tun hunah te hian khang tuikhur kha la awmin, a tuite kha a la vawt angem aw? Khang tuikhur hnar ngaw a sava te khan nunchan an la zir ngai angem le? Chuta chiang ber chu engmah a chiang lo tih chauh a ni.
Khang kan naupanlai hunah te khan let leh thei dawn ila chu kum khat sal tan nen pawh ka thleng phal ngei ang. Mi thenkhat tan chuan atthlak pawh a ni maithei. Mahse, duhamna leh nawmsipbawlna atanga hlimna zawn tum aia a atthlakna ka hre bik lo e..

Zan lungngaihthlak!!!


Harsa taka lehkha ka zir khan tawrhchhelna min pe a. Tunah erawh kha tawrhchhelna khan engmah a thawk theilo.
Theihtawpa lehkha ka zir laia rinawm taka min lo nghak tang tang tu khan tunah chuan ka bul khumah a mu a, ka kiang velah chuan chhungkhat laina hnai in an kil bial taih a.. an hmelah chuan hlim hmel hmuhtur a vang a, lungngaihnain chu inchhungah chuan thla a zar a ni tih a hriat theih a. Ni e, ka bul khuma mu, ka hmangaih em em chuan kumkhuain min mutthilh san tawh dawn a ni.
Ka tap thei lo a, rilru mumal ka pu thei hek lo. Pachang taka tuar ka tum a, pangchang taka tah hawm hawm a awlsam zawk si. Min hnem tura lo kalkhawm ka thlir a, kan thil tawn chu a namai loh zia ka hrechiang telh telh thung. Mittui tla zawih zawihin a hmel ka thlir a.. kan nunhlui ka han chhuikir a..
20/03/1996
College chawlh lai a ni a, kan khawlama ka haw chu ka thiante ina ka leng chu an chhungte hmundang ami awmpui an lo nei a. A tir lamah chuan engvakah ka ngai lem lo a, mahse kan han inkawm fo tak hnuah kha chuan kan innel ta em em a. A hnu deuhah phei chuan thian satliah ang mai chuan kan inen tawh lo, kan inkarah chuan midang hriat ve loh thil inthup chu a awm tan ta.
Vau thla chawhnu lam a ni a, ni a kang thain khua pawh a lum kher mai. Kan thianho chu luiah tuichenga, intihlim pah turin kan kal a. Ka lo ngaihzawn ruk ve deuh pawh chu a lo kal ve a.
Lui kan thleng chu a lo nuam kher mai. A duhin tui an cheng a, a then chu tiau phoah kan lo infiam bawk a. Chutia hlim taka kan inkawm karah chuan mitmei ka hmuh zauh zauh avangin ka thut hnaih a, kan kalsan ta daih a.
Chutia kan kalsan chu midang chuan engvakah min ngailo a, keini erawh chuan kan rilru chhungril inhrilhtawn tur kan ni tih kan chiang thung. Hla vak loah chuan kan thudun a, engemaw te sawiin kan titi vei luam a. Chutah kan thutak telh telh a, kan rilru chhungril ber thlengin kan phawrh fai ta vek a. Chumi ni atang chuan thian mai kan ni tawh lo..thian aia thuk zawk inzawmna chuan nghet taka suihzawm kan ni tawh.
Hlimlai nite chuan..
Ani chu a felin a hmeltha bawk a, mi pawh a ngaihsak thiam em em a. Ka tan chuan sawiselbovi a ni ber mai. Ka thatna tur leh ka lawmna tur a nih dawn phawt chuan engpawh tuar turin a inpeih reng thin.
Zirna ka chhunzawm a lo hun leh pawhin tha takin min fuih a, tha taka a lo awmtur thu leh nupui fanau chawm thei ka nih huna hlim taka chhungkaw din thei tura rinawm taka a awmtur thute min hrilh a.
Ka zirna ka zo a, hna te ka han zawng ve a. Vanneihthlak takin ka hmu ve ta hlauh mai a. Khami ka hna hmuh thu a hriata a min lawmpui thiamzia te kha mitthlaah a lo lang thar leh a. Lung a va leng em!
Thihna kawr ruamah chuan..
Kan chanchin leh kan inkar thute chu ka thiante chhung chuan an lo hre ve vek tawh a. Chutianga hna ka neih tak hnuah chuan chhungkaw din tura ka inpeih tawh avangin palai tirh te ka tum ta a.
Ani chu an khaw lamah a haw anga, chutah chuan palainena umzui turin kan intiam ta a. Chumi a haw tur ka thlahte pawh chu a hlim kher mai. Kan inkai phei a, kawngbula kumtluang par lo awm chu thliakin min pe a. Motorah min lawn san ta a.
Kha a pangpar min pek kha a thil min pek hnuhnun ber tur a ni ang tih ka ngaihtuah ngai lo. Ka haw a, ka dawhkanah ka dah a. Room vel ka tihfai lai chuan ka phone a lo ri a. Chuta ka han chhang chu ka thil hriat duhloh ber mai ka hre ta. Ka nupui hual nimai tur chu motor insu avangin a boral a maw??? Aw, i pangpar min pek pawh a la viau lo a sin..
Phone ka dah a, engtik laiin nge an chetsualna hmun pawh ka thlen ka hre lo. Ka hmangaih em em chu thisenin a bual nuaih mai ka hmu chu thlir a va hrehawm tehlul em!
An khawlam pana kan kal kha ka va hre tam lo tehlul em! An in kan thlen a a chhungten min tahkhum atang khan ka harh zawk a ka tap theilo, a na a ni!
Chungkaw din kan tumna chu vawm bo a ni ta a, kan hlimna pawh chu thlan khurin min lak sak ta. Naktuka ka hmangaih an phumna tur thlanmual lei chu kumkhuain ka tan chuan lei satliah a ni tawh lo ang.. ka hmangaih taksa a tel ve tawh avangin!
Aw, ZAN LUNGNGAIHTHLAK tak a va ni em!

Friday, July 8, 2011

Cathy Zunzam...II

Khatianga keini pahnih kan inzui tih kha ka thian lei veng zo lo tak takte khan ka chhungte an lo hrilh ni tur a ni.. A tuka ka lo mu rei deuh chu chaw ei turin ka chhungte chuan min lo kaihthawh tir a. Ka mu min kaihthawh pawh chuan min khak nghe nghe a.

Chaweikham chuan kan insiama, an unaunu chei turin an thlen inah ka hruai a. Kei ka thianpate inlamah ka kal ve leh a. An chei zawh hnu chuan min rawn phone a, ka hman huna amah lama inkhawm tura insiam a duh thu min hrilh a. Ka hman veleh ka lama, kan insiama, inkhawm tur chuan kan inzui chhuak ve leh a.

Inneih inkhawma an thuchham laite chuan ka beng bulah fiamthuin "Nakinah chuan kan la chham ve awm si a, ka zak lawk" a rawn ti a. Ka nuih a za viaunaa Biak Ina nuih chi ni hek suh! Ka zu en a, a lo nui suk a.. ka insum zo lo teuh khawp mai.

Inkhawm banah a lawmna kan han nei leh a. Kan thianho zinga thusawi thiamlo ber mai chu thian aiawha thusawi turin min han ko thut mai a. Ka sawi laklawh laiin ka zu en a, min lo nuih suk a. Buai tawh sa nak laiin ka buai nasa telh telh a. Khatia ka buai dan em em kha aw.. Hrui ni ta ila, ka hnawk kha then a har ngawt ang.

Engtin tin emawin ka zo hram a. Ka zu thu leh chu nui sen sen pahin, "i sawitha khawp mai" min ti a. Ka nuih za bawk si, ka zak tawh bawk si chuan " a nih chu a.." tiin ka chang a. Ka kut a rawn vuan a, a rawn hnai a "ka duh ber i ni a, i thusawi kha ka tan chuan ka thusawi ngaihthlak tawhah a la tha ber" a ti ta reuh a.

Thenna tuni chu...

Inneihni a ral a, mo unaute chu kar khat vel an cham hnuah chuan an haw dawn a. Chungte chu kan kutah an awm avangin ka thian pakhat nen kan thlah leh ta a. An inah kan thleng a. Zanah kan pahnihin inchungah kan awmdun a. Kan lung a leng hle a. A tukah ka haw anga, kan inhmu tam tawh dawn lo tih chu kan hre tlat si a!

Reife kan inkawm a, thil tam tak kan sawidun a. Khaw hranah kan awmdawn avangin a lungngaih thute a sawi a, ka darah a rawn bei a. A ngawi reng a, ka han en chuan a mittui a lo tla nasa tawh khawp mai. Ka kuah bet vat a. Khaw hranah awm mah ila rinawm taka ka awmtur thute, a zirna ngaihsaka, nakina kan hlimna tur a nih thute ka sawilai chuan a ngawi reng a. A hnuah a tana ka rinawm tur thu min tiamtir a. Chu thlaeng hnuai boruak rit tak hnuaiah chuan duhthawh takin kan infawp vawng vawng a. Kan chhuk a, midang an lo mu vek tawh a. Ka thianpa pawh a lo mutui tawh khawp mai. A la mut duhloh vangin kan meng leh reng a. Zinglam dar 2 velah chuan tukthuan eikhama haw tur kan nih vangin mut a rawt a. Kan inmangtha tur chu min kuai kun a, min rawn fawp ve leh a. Mu turin kan inthen a.

A tuka ka tho chu zan lamah a mu lo tih ka hrethiam nghal a. Chaw kan ei a, a ei theilo. Kan insiamlai pawh chuan a mittui a hru zauh zauh a. Kan haw tur chu mittui nen min thlah thei hram a. Ka ngaihtuah a ngaizawng a neih vawikhatna a ni a, a lak thutak zia ka ngaihtuah chuan keipawn ka vei hle tih pawh ka hrethiam nghal a.

Zirna a chhunzawm leh a, kan inngai em em a. Kan inkarah chuan inngaihzawnna mai a ni lo, hmangaihna chu a lo awm reng tawh tih chu kan hrethiam ta a. Nitin kan inbia a, kan infuih tawn a, kan rinawm thute kan intiam nawn tir ziah thin.

Ka hmu leh che.. mahse..

Zankhat chu tlai tawh takah min lo phone a. An chawlh avangin a haw dawn thute, a patea a tuka an khuaa a zin dawn avanga a haw nghal tur thu a sawite chuan kan hlim hle a. An khuaa zin turin mi sawm a, ka 'aw' rang kher mai. Kan helhhawlh bawk aniang, kan mu lo dun ve ve hial a.

A tuk tlai a ni a, ka dawr atanga ka haw laiin number hriatloh atangin phone ka dawng a. Ka han la a, hmana kan infawplai min hmutu a unaunu kha a lo ni a. A thusawi erawh ka thin a va thawng em! Ka nupui atana ka hual, ka hmangaih em em chu motor chetsual avangin damdawiin khumah thih sualin a awm mek tih ka hriat chuan ka awmdan ka chiang tawh lo. Ka hriatchin chu kawngsirah motor ka side a ni tih chiah a ni a. Ka hriat leh chuan kan inah kal turin ka insiam a, ka thianpain motor khalhin ka thian dangte leh a unaunu, ka thianpate nupa nen kan inzui a.

Kan hmanhmawh bawk a, kan tlan reilo khawp mai. An khua kan thlenga, damdawiin kan pan nghala. Mi pawh an lo tam khawp mai. Ka chhuk chiah chu a unaute chuan min lo tahkhum a. Pachan a ngai khawp mai!

A khum bulah ka phei a, doctor leh nurse te an beidawng tih chu an chezia atangin a lang reng mai. A kut ka vuan a, a hmel ka en leh a. Ni e, ka hmu leh ngei mai.. Mahse, thlan khurin a lem pil tep tawh hmel bak hmuhtur a awmlo!

A hmelthatna kha a tawhsual tawh khan a laksak a, a vun nalh em em thinah te khan hliam tam tak an awm a. Hmana ka ngaihzawng hlim em em, harh vang tak kha a tha a zawi vek tawh a. Thihna kut chuan a tham hneh ta!

A ruang chu inah an la thlaa, a bulah ka zui zel a. A nuin min tahkhum nasa ngei mai. Ni e, a nuin, "mamte, hei i thianpa pawh a lo kal a sin.. I rawn kawm dawn lo'm ni?" tiin a tap hawm hawm a. "Ni e, Cathy, ka lo zin a sin.. Min kawm turin i ka rawn ang dawn lo'm ni??"

Cathy zunzam...

Thil tam tak ka hringnunah hian ka lo tawng ve tawh a; tam tak ka la tawng bawk ang. Ka thil tawn thenkhat chu rei pawh hre zui lovin a ka theinghilh zui mai a, thenkhat erawh ka la hre reng mai ni lovin nimina thleng ang maiin ka la chiang thung!
Ni e, he khuarel hian thil tam tak min tawn tir ve tawh a. A changin hlimna leh lawmna min pe a, a changin lungngaihna chirhdup hmunah min hnuk lut thin. Thenrualtha min pe a, min lak sak a; ngaihzawng min pe a, hmangaihna min den tir a. Chu ka hmangaih chu min pawh then sak leh si.. Hmangaihnain a den sil tawh hnu a pawh then leh zet tluka na hi awm ang maw?
Khawilam lanu nge maw i nih le?
Kha ni kha ka la hrereng.. Kan thianpain khawdanga mi nupui a nei dawn a, kan tawiawm ve a. Kan thianho chu mi zakzum vaklo awmkhawm tih takah kan thlen tirh atangin kan ngampa nghal hle a. A nupui turte inah chuan kalin kan hlim hle a. Thil tihfel ngaite kan tihfel pui a. Chutia kan buai nuai nuaina karah chuan thil danglam ka tawng ta! Kum lamah a la upa vaklo tih a hriat a, mi ngawichawi leh zakzum a ni tih pawh a hriat khawp mai. A hmel leh chezia vel chu sawisel tur zawng ta ila ‘hmeithai zinga zang zawn’ ang maia vang a ni ngei ang. Chu thil danglam- Tleitiri chu..
Chutia kan zinga lo awm ve chu kei thianho zinga nula ngaihsak lo ber pawh chuan hmu mai mai thei lovin ka va kawm ta a.. Ka han kawmchian chuan a hmelthat ang bawkin a lo felin kawm a lo nuam em em a. Eng engemaw kan sawi vei luam a, kan nui nasa dun hle a. A hnuah phei chuan thiante buai chu mahni buai ve loh chuan a ziaawm deuh avangin dawrah thil leiin kan kalsan ta daih a.
Ka vawikhat hmuhna atanga ka ngaihzawn nghal dan leh ka ngainat dan em em kha tun thleng hian mak ka la ti hial thin! Ka thil hriat tawha ka la hriatthiamloh ber chu kha nula (ti tawh mai ang..tleirawl atan chuan a upa deuh hlek si a) hmel ka hmuh atanga ka duh em emna kha ka la hrethiamlo ber awm e!
Khatia dawr kan kal tak daihah khan ka thiante chuan min lo phone nghal a, kan let leh min han hmu chu an ngaihdan a ni lo tih chu zawlnei sawi ngai kher lovin ka chiang a, mahse, lalhmelthai vang a ni tih ka hriat erawh chuan pawi tihna ka neilo thung!
Kan tihtur kan tihfel hnu chuan khua pawh a lo ngui tan tawh a. Kan haw darh dawn chuan lalhmelthai chu ka thlah leh ta a. Lalhmelthai vang chuan thiante ka phatsan leh ta! Kan tlanchak vaklo bawka an in kan thleng har hle a. Mahse kha an in kan pan kawngah khan kan rilru erawh hnaiteah kan inpawhsak tawn thung. An in kan thleng a, a chhuk dawn chuan “zanah ka rawn lam ang che aw?” ka ti zauh a. A hnial em em bik chuang lo a. Kan intiam hnuah ka tlansan leh ta a..
Man inhlan zan leh nunthara bul tan zan…
Zanah chuan kan intiam tawh angin ka va lam leh a. Ani pawhin nel pawh min nel ve tawh hle a. Man inhlanna zan ngei chu keini pahnih tan pawh nunthara bul kan tan zan a ni tih tunhnu hian ka hre thar leh a..
Man inhlannaah pawh chuan kan inkawp chawt a ni ber mai. Kan pahnihin kan thudun a, midang kan ngailo. Reipawh inchhunga thu lovin inchung lamah kan chho ta daih a. Inchunga naupang infiam nak nak sira thutna awmah chuan kan thudun a, thil tam tak sawiin nunhluite pawh kan sawi hnem hle a.
Ani chu ka thianpa nupui tur pa u fanu a lo ni a. Inkutsuihna velah pawh kal a tum ve thu a sawi chuan ka bula kal turin ka sawm a, a hnial biklo a. A chanchin a sawi zel a, a zirna lama chawlh an neih vanga inneih hmang theite a nih thu a sawi chuan vannei ka inti rilru khawp mai.
Ngaihzawng chungchangte kan han sawichho a, a neih ngailoh thu leh a neih chuan rinawm tak leh pasal tur law law neih a duhthu te a sawi a. Chutia a sawi chuan a ngaihzawng nih ka duh thu fiamthuin ka sawi zauh a.. a nui a, na lote hian min han chum a… he nula hian min haw biklo em ni dawn le??
Chutia kan titi hnu feah chuan midangin min rawn chimbuai a, thian dangte nen chuan kan titi ho leh ta a.. a fala la awm ka duh tehlulnen thiante an awm ve tawh si.. Tuilo zetin kan titi ho ta a.
Zan a rei a, haw zai te kan han rel a. Ka thian..ni lo ka hmangaih chu ka thlah a. Kan haw kawngah chuan thil tam tak kan sawi leh a. Ka rilru ka han sawichuan a nui a, a awihloh thu a han sawi a, a rilru takin a sawilo tih erawh ka chiang thung!
An in kan thleng a, ka lut zawk a. Thingpuite in in ka inzawh chuan a tuka ka lam hun turte ka sawi hnuin kan inmangtha a, ka thlenin lam ka pan ta a. Ka va thlen chuan thiante ka atanga fiamna ka dawn chu phat mawi har tak a ni.
A tukah chuan a hun ka tiamah chuan ka han lam a. Mak tih deuh ka nei tlat! Chu ka mak tih chuan ka duhna a tizual bawk a. Ka huntiamah chuan a lo inpeih tawh nia mawle… Hmeichhe dang chu nise nghah a ngai ngei anga, ani erawh hun a vawngdik hle thung. A chezia atang chuan chhuah phal chi a ni lo tih chu ka chal ka hriatchian tluk zetin ka rilruah a lo lang nghal a. Kan hlan fel hnu chuan mothar turte inlam panin kan kal leh ta a.
Kan zu thlen chuan an lo insiam tan mek a. Chutia ka motor ken atanga kan chhuk dun an hmuh chuan a unau dangte chuan an fiam nasa hle a. Kan nui nasa hlawm khawp mai.
Kan inpeih fel a, chhuanna tur kan han insiam fel chuan midang tan han chuh ve chi ni tawh hek suh. Tumahin chuan ve an rawn tum tak si lohah chuan ka sawm lui ta hlawm a. Kan pahnih bakah a unau dang pathum te nen ka motor kenah chuan kan haw ho ta a.
Kan khua kan han thleng a, thlenna tur an han siam vela. Ka mi phurh te chu kan inah an dah ta hlawm a. Zah erawh a zak ru ve khawp mai. Mahse, a fel hrim hrim a, a tilang lem lo a. A puitlinzia ka han hmuh lehzel tak hnuah phei chuan rilru a luah nghet ta khawp mai.
An han intifaia, an hman hnu chuan kan khua vel chu fangkualin kan lengkual vel a. Park-ah kan lenga, midang chu kalsanin tlai nitla tur thlir kan thudun a. Tahchuan ka rilru tak tak ka hrilh fai ta vek a. Ani chuan,”Hmeichhe nikhualo deuhah min ngai maithei, min ngai mah la ka sawitheih a awm chuang lo! Ni e, ngaihzawng ka la nei ngailo a, mipa pawh nangmah ang em em a kawm leh ngainat ka neilo! Hmangaihna hi engnge a nih ka la hrethiamlo a, hriatthiam pawh ka la tum vak ngailo. Amaherawhchu, ka rilrua i awmdan hi chu a danglam khawp mai. Ka ngaina che tih pawh i hria a, hengtiang hian midang ka rilruah an awm ngailo” a ti a. Keipawhin ka hmuh tirha ka ngaihzawn nghal thute ka sawi a. Ani chuan,”Tunah hian lo chhang ta che ni ila, ka la naupang ve a, bakah nizana ka sawi ang khan ngaihzawng ka neih chu ka pasal ni theitur ka duh a. I rinawm thei dawn mi?” tiin min zawt a. Ka rinawm tur thu leh ka duhzia ka sawichhuan ani chuan,”Ni e, keipawn ka ring ang che. Ka rin ang ngei pawh ni ang che aw.. KA DUH CHE.. Ka rinawm reng ang..” a ti chu HALELLUI pek mai pawh a chakawm khawp mai. A hmel ka en a, ani pawn min lo en a. Nuih suk pahin “lerh viauah min ngai suh aw..” a ti hram a. Keichuan keimah zawk min lerh tura min ngailo turin ka dil a. Kan “AW” dun ve ve a..
Ral lehlam ka thlir a, kan inngaihzawnna tur thu kan tiam dun laia min hriatpuitu ni pawh chu a liam dawn tawh a. Khua a tlai tawh avangin haw turin motor lam kan pan a. Kan va thlen chuan a unaute chuan min lo nghak reng tawh a. Kan lut tur chu an lo nui thaw a, thildang erawh a sawi chhunzawm lem chuanglo a.
Zanah chuan kan thian dangte ho leh ka thiante nen chuan kan thianpate pahnih nula tlangval nihna tawp zan tur chu kan sûn a. Thil sûn nei e tilo chuan kan hlim hle a. Kan pahnih chuan hmun dangah kan kalsawn a.. Kan inkawm ta daih a. Eng engemaw kan sawi a, ka dar a rawn ngheng a, ka lo kuah a. Ka han en a, a rawn hawichhuak a. A hmui no nalh em em chu ka fawp dawn a, a zah avangin a kun daih a. Ka kuai dak a, ka fawp ta tho a ani pawhin a thiam ang tawk tawkin min lo chhanglet ve a. Ngaihzawng a nei ngailo tih takah infawh pawh a thiam lem lo khawp mai.. Mahse, a thiam ang anga min lo chhanlet khan a rilru zawng zawng erawh ka fawh chhuahsak a, min rawn pe bawk a ni tih chu ka hrethiam nghal a.
Mahse, thil pawi a thleng ta.. Kan inzuichhuak min lo mitmei rengtu a unaunu pakhat leh kan thianpa an han khuh khak mai chu kan lai dun teh a sin! An rawn hnaia, a zak lutuk chu a kun char char a, ka kuah bet a, a la hawi chhuak ngam chuang lo a. Ka thianpain mei nei taka a han tawng velte chuan nuih pawh a nui ngamlo a, ka khawngaih chuan ka thianpa pawh chu ka mitmei nghal a. Min luhsan leh hnuah pawh a la zak khawp mai.
Chutah kan thian dangte kan va pawh chu kan pahniha kan bo daih avang khan fiamna pawh kan dawng leh nak nak a. A puitlin em avangin a insiamrem thiam ve leh mai a. A hmelah erawh a zak tih ka la hmu thung. A tuka tihtur nei kan nih vangin kan haw darh ta hlawm a.
In kan thlenga, kan insila, kan intihfai hnuah thingpuite kan in a, mu turin kan inthen ta a..

Friday, June 24, 2011

Kan Thawnthu-II

Khatianga kan inzui tak rengah kha chuan kan inkarah chuan thian mai nilo, a aia thuk zawk thil a lo awm thuai a. A mitmei pawh vawitam ka hmu a, mahse, ka hai der lui tlat a. Ani ngaizawng tur chuan ka tlinglo a, keimah ka inhmu hniam tlat si a.

Class khatah kan awmlo ka tih tawh kha. Kan class-a hmeichhe pakhat hian min lo ngaizawng chu niin! Engtinnge ka phone number a hriat pawh ka hrelo ka class kal tur ka insiamlaiin min lo bia a, a hnua class kan off chu ka bulah a lo kal a, a thiannu birthday party-a kal puiah min rawn sawm a. Chu min sawm thu chu a rawn hriat hman avangin a awm a nuamlo hle a. "Kal suh" chu min ti dawt ngamlo nain a chezia velah chuan kalpui lo turin min duh tih chu a hriat hle a. Chutianga ka thian ve ber leh keimah avanga amah pawh inti hrehawm hial thin a nih avangin kal luihna chiah ka ngailo a, ka kal ta biklo a. Mahse, ka rilruah zawhna tam tak a lo lang a; zawhna langsar ber chu - Ka thiannu hian min hmangaih em ni? tih hi a ni. Ka han inena, ani ang tan chuan hmangaih tlak niin ka inhre lova, mah se.. midang ngaihzawng atan ka phal bik si lo.. Ka hmangaih ve tho tihna em ni?

Chutianga midang sawmna amah vanga ka hnar chu a hma aiin kan inpawhna pawh a thuk telh telh a, tunah chuan thian ang mai mai a inkawm a theih tawhloh! Kan inkarah sawichhuah ngamloh kan nei ve ve tih chu kan chezia atangin tihlan chang kan nei fo mai le!


Zankhat chu ka phone-ah sms heti hian min lo thawn a. 'Rose par hi a mawi i ti ve em? Khawvela rose par mawi ber pawh pe che ni ila rei an daih ngai lova, an til leh vat thin. Mahse, ka rilrua rose par awm erawh hi chu a til ve mai mai dawnlo a nih hi..' tiin a lo thawn a. Chutah zawng ka rilru sawiloh theih ni tawh biklo le. Ka lo vei ruk thin zia leh a bula ka awm chuan nuam ka tihzia te, ka hmangaih thute ka hrilh fai vek a. Amaherawhchu, kan dinhmun inthlau lutuk avangin ka sawi ngamloh thu ka hrilhzui a. Chhungkaw dinhmun lam a en loh thute, a pate pawhin fanu neihchhun a nih avanga a hlimna ber tur nei tura an tihthu te a sawi chhunzawm a. Kan inngaizawng chu a ni ta der mai! Kan inmangtha hnuah chuan ka muhil mai thei lova, ka ngaihtuah nasat poh leh mak ka ti tulh tulh a. Hmangaihna lo mak zia leh ropuizia te, a ril zia te ka hriatchhuah phah ta a.

A tukah chuan college-ah pawh a ngai tein kan inkawm leh a, a thian dangte chuan thian mai mai emaw min la ti a. Kan inkarah hmangaihna lo parvul mek chu tuma hriatpui lovin kan pahnih chuan mawi taka par chhuah turin kan chawm mek a ni si!

Tlaikhat chu min lo phone a, kan thiannu pakhat birthday lawmnaa kal turin lo insiam turin min ti a. A hnu deuhah chuan a lo thleng a. Kan thiannute inlam pan chuan kan kal ta a. Kan va thlen chuan thian dangte pawh an lo awm nual tawh a, kan thut hahchawlh hnu chuan inchungah kan pahnihin kan chho ta a.

Inchungah chuan kan thudun a, thil tam tak kan sawi a. A pate hnena kan chanchin a sawi thute, a pate pawhin kan inhmangaih a nih chuan pawi an tihloh thute, fapa pakhat nei belh tur anga an inngaih thute a sawi a. Ni e, a pa khan keimahah khan 'tumna ka nei a ni' tih kha a hmu thiam tlat si a. Chutia kan titi lai chuan kan thiannu chuan min rawn ko a. Kan chhuk tur chu ka kuaidak a, duhthawh takin ka fawpa, ani pawhin tha takin min chhanglet a. Kan infawp satliah mai a ni lo, rilru zawng zawng kan inpe tawn a ni. Kan thiannu birthday pawh chu hlim takin kan hmang a. Zanrei tak thleng awm lovin kan haw dun ta daih a.

Kumtawp exam a lo ni a, tha takin kan chhuak ve ve a. Ani chuan a zirzawm lova, dawrah chuan a rilru chu a sawr bing ta zawk a. Keichuan zir chhunzawm ka duh a; amah chuan inneih a, dawr enkawl dun a duh a. A pate pawhin chu chu an remti a, mahse keimah berin ka duhloh vangin a thu ka hnial a. Inhauh buangbar vel a duhloh vangin ka rilru chu a pawm ve ta a.

Ka zir chhunzawm a, ani'n a zir chhunzawm ve si lo a, inhmuhna hun pawh kan nei tam theilo hle a. Chutichung pawh chuan ka tan a rinawm a, ka tana a rilru min pek chu tlem a hnekin a zual telh telh zawk a. Hetiang khawpa min hmangaih avang hian ka tan chuan khawdang hawi san chi pawh a ni lo!

Zirna ka zo a, ka kalna line a fuh vang pawh aniang, hna tha tak ka hmu ve ta a. Khami ni, hna ka hmuh nia min lawmpui thiam zia leh a pate thleng thlenga min lawmpui kha phulo pawh ka inti khawp mai. A pa chuan kan thianho chu chaweikhawmna hun tur min siam sak a. Nawm pawh a nuam hle a.

Keini pahnih chu a room lamah lutin kan awmdun char char a. Ka zir chhung zawnga ka tana a rinawm reng avangin lawmthu ka hrilh a. Chumi pah chuan ka nupui ni turin ka sawm nghal bawk a. Ani chuan min pawt hnaia, min fawp a, palai lo tir turin min ti ta a!

Tunah chuan chhungkaw pangngai tak niin kan fa te ber pawh nikhaw hre rual a ni ve ta. Ka nupui chuan theihtawpa enkawlin keimah anga mahni kea din tum tur leh amah anga midang ngaihsak mi ni thei turin a fuih thin a.

Fate enkawl a thiamin ka chhungkaw tan a inpe zo em em a, chhungkaw awhawm ber pawlah kan chhungkua a chhuah thei hial a ni.

Ka hun kal tawh ka ngaihtuah let thin a. Thil pahnih ka neih kha ka lawm thin. Chu thil pahnih chu- mahni inrintawkna leh mahni kea din tumna rilru ka neih a, tumruhnain ka rilru a luah tlat thin kha a ni a. A dang pakhat leh chu tuna ka thuziah laia ka bula thu, ka ziah hma hmaa kan thawnthu lo sawi zawt zawttu, ka pachhiat ber lai pawha min hmangaih tlattu, mi tha tak ka nupui ka tawng hi a ni!!

Kan thawnthu-I

Puk chawp tak meuh meuhin khawpuiah chuan college kal turin ka lut ve ta rawih a. Thiante min puihna zarah mahnia inluahna tur min hmuh sakah chuan ka han invawmlut ve ta rawih a. Ka ei leh in te, ka inluahna man vel engkim chu chhungte hnena chah ngai lo turin leh tlai lama class kal ka nih dawn vangin inhlawhnatur awm ang ang chu dap kualin, a awm ang ang chu ka thawk thin a. Chung ka inhlawhna atanga ka pawisa hmuh chu ka thlantui far zawih zawih atanga ka hmuh a nih avangin a hlu a, ho mai maiah ka hmang ngailo.

Kan college chu zan lam a nih vang nge pawh ka hrelo kan thahnem ang reng phian a. Kan luhpui thenkhat chu mi hausa fa, awmtha duhlo tih hriat tak an awm nual a. Nuam tawl ringawt buaipui an ang hle thin. Ka rilru tete chuan "Keinin kan zirtheihnan hna rim takin kan thawk a, college tha pawh kal thei lovin kan phak tawk ang a nih vanga hetianga kal ka ni si" tia ngaihtuah chang ka ngah thin.

Vawikhat chu kan awmna vengah chuan veng danga awm, chhungkaw awmthei deuhin in an sa dawn a. Inhlawhturin ka inluah neitute chuan min lo sawisak a. Hnathawhtur ka hmuh avang chuan ka lawm hle a.

Kan hnathawh chu hahthlak teh mah se ka thawhloh chuan ka nghei mai a ngaih dawn avangin phur takin ka thawk thei zel a. Ka hnathawh vel an en chuan kan hnathawhna pa te pawh chu an lawm ve ni tur a ni; duhsak pawh min duhsak ve hle a.

Nikhat chu kan hnathawhna hmunah chuan kan pu chuan a fanu a rawn kal pui ve a. A hmel han en ringawt pawhin kan phulo tih a hriat nghal chu thuhran, biak pawh kan biak ngamloh tur a ni tih a chiang hle a. Mahse, chu nula chu rinai takin a lo fel a. Kan han hahchawl chu ka thawhpui dangte hnamdang an nih avangin ka bulah lo kalin min rawn be vei luam a. Kha kan inbiak ringawt pawh kha ka tan chuan hriat a nuam a, hah pawh a dam sawng sawng hialin ka hria.

Zankhat ka class kal chu kan lecturer pakhat a lo kal loh avangin class kan off a. Thian dangte canteen velah te, room vela an titi luih luih laichuan keichu pawnah thlifim thaw heuh heuh mai chu dawn ka duh vangin ka chhuak a.

Chutia pawna khawhar taka mahni chauha ka din lai chuan ka hnunglam atang hian hmeichhe aw, ka hriattawh hnu hian "va lungleng awm ve?" a tih ri hi ka hria a. Ka hawilet chu kan insak lai mek neitu kha a lo ni a. Ka phu zawk nghe nghe a. Ka bulah chuan lo pheiin kan titi dun a. Kan college a a kalna chhan ka zawh chuan dawr an nei a, amah chiah fa an neih avang leh a nu leh pain hnadang an neih avanga enkawl a ngaih vang niin min chang a. Thil tam tak kan sawi a, a changleh kan nui a, a changleh kan thutak a. Class kan tan leh dawn avangin ka kalsan a, banah inhmu leh turin kan intiam a.

Class kan bang a, kan inhmuhna tur hmun ka thlen chuan ani chu a lo awm tawh a. Ka thlen chuan min ngah rei tawh thute a lo sawi vei bawrh bawrh a. Motor a ken avangin a ruala haw turin min sawm a, ka inluah thleng chu min thlah ta a.

Chumi zan atang chuan kan inkawm tan a, kan pahniha kan awm tawh chuan kan hlim em em a, midang pawh kan ngai biklo. Min ngaihsak em em a, ka tana a nawmlohna deuh tur a nih chuan amahin hrehawm a tuar mai thin a. Chutiang khawpa ka tana inpe zo a nih vang chuan a thiante lo kawm thinte pawhin min kawm ngaih ve em em thin.

Kan inkawm rei telh telh a, kan innel telh telh a. Ka class kal leh haw lam chu min hruai ziah a. Ka mei a ni a, keipawh a mei ang mai ka ni a. Kan class inanglo mah se hunawl apiangah chu pawh then theihloh ang mai kan ni a. Kan inkawp chawt a ni ber mai.



Saturday, May 28, 2011

'ZO'thil thing sawina maw?

Tunlai kan thangthar te’n an uar em em, thil thing sawinana an hman thin chu ‘zo’ tih hi a ni a. Pa pakhat tunlaimi lo ve tak hmu ta se, “sawlai pa saw a zo tiah tiah..” tiin an sawi thin. Hetianga kan tawngkam hman hi engtia han phuahchhuak ve ngawt nge an nih ang aw? tiin ka ngaihtuah mai mai thin.
Rual u deuhte pawn he tawngkam ‘zo’ tih hi an lo hmang ve tawh thin a. An hmanna ho kha han ngaihtuah tlang dawn teh ang. Ramhnuaiah an han kal a, “helai chu a hmun a la zo hle mai” titein an sawi thin. Chutilaia ‘zo’ an tih chuan a kawh ber chu ‘kha hmun a boruak kha a la thiang a, khawl ropui tak tak khu in a boruak a la bawh buai ve lo’ tihna a ni.
A tawp berah chuan upa zawk te’n ‘zo’ tih hi ‘hmun sang, hmun thengthaw, boruak la thianna hmun sawinan’ an hmang tlangpui thin a. Tunlaia kan hman dan nen chuan a inanglo khawp mai. Tunlai hian he thumal hi a awmzia pawh hre lova thil thing sawinan hmang kan tam khawp mai. Ka hriatdan khi a dik ber e ka tihna a ni chuanglo. Midang ka zawhna leh upa zawkte hman dan atanga ka thlirna mai a ni tih erawh min hriatsak dawn nia.
Ka zawhna awm ta chu- ‘ZO’ tih thumal hi engnge a awmzia nia i hriatdan ka hre duh a? Tunlai kan thangtharte hian kan mizo tawng hi a nihdan leh hman dan pawh ngaihtuah lova an chinglet thin hi eng nge i ngaihdan?

Monday, May 23, 2011

Langpu!!


Nipui a ni a, kan class tan niah chuan kan class room te takteah chuan kan inkhungkhawma. Khang ka thiante ho nen thiamna puakchhuah kan tumna chu nunchan zirnan kan hmang ta zawk a. Amaherawhchu, khang kan nunchan dan leh kan chetzia tam tak erawh sawi vek atan chuan a nasa mah mah thung!
Sachin rawt dip maw?
Kan han inkawm nel a, kumtira kan ze thuhruk tam tak kha kan innel chinah chuan langlo tura thuhruk engmah awmthei tawh heklo le! Ze chi hrang hrang awmkhawm chu ze khatah luantir tumin kan han bei ta a le.. a lo tih chiloh khawp mai! Duh aiin kan nasa mah mah ta hlawm a.
Vawikhatchu ka thianpa pakhat nen classroom chhungah kuhva kan ei a. Kan ka chhung sen kha pawi kan ti lem lo a; a chhan pawh kan teacher zinga kan hlauh loh berin class a rawn la dawn a. Tui ti taka kan thial lai tak chuan thlenglo mah se pawi kan tih miahloh tur a lo thleng ta tlat mai! Kan teacher zinga a thawmna ber leh hlauhawm bera kan ngaih zawk a rawn lut hlauh mai a. Ka chhung tihfai ngaihna a awm tawh si lo, ani lahin hmuhloh der tum tawh heklo. Classmate ho hmaah a period chhung lêi chhuahin kan han ding mai chu kan sim chiang teh a sin!
Khatiang kan chetchhiatna ka ngaihtuah apiang khan kan thianpa pakhat kha ka ngaihtuah chhuak ziah thin. Raja(sahdah) hi a hmuam reng thin a; kan miss pakhatin a man ta alawm le. A ko phei a, “enge i hmuam” tia a zawh chuan kan thiana chuan tihngaihna hre tawh heklo le.. “sachin ka rawt dip a, ka hmuam” a ti ta ringawt a. Kan miss awihlo lutuk chu a ner sawk nghe nghe a. Miin “sachin ka hmuam” ti na na na han inrinhleh vak ngawt theih ni hek suh a thuttir leh ta ringawt a. Kha kan thianpa kha khawvela sachin rawt dipa, hmuam ka hriat hmasak ber leh a awmchhun a la ni!
W-meizial!
Kan thian pakhat erawh a talent a dang deuh thung. Lehkhabua thil lem ziah lam kha a thiamna leh a tuina lam a ni a. A tuartu ni lo tan chuan a nuihzathlak duh viaunaa han tawrh ve chiah kha chuan nuih a har thin khawp mai.
Vawikhatchu kan thianpa chuan a thiam thil chu a bula mi lehkhabu hmangin a tilang ta a. Eng emawni hi a thai nauh nauh reng a. Sister-in a rawn hmufuh ta hlauh a. A rawn pan ding nghal chat a. A thiam thil chu sisterin a hmu ang tih a hlauh vangin a bula thu lehkhabu chu a hup tang tang a. Sister lah chuan en tumin lehkhabu chu a pawt tang tang a, an inchum dawn takngial tihah chuan kan thianpa chuan a ban an la san mai chu(h)! Mipa hmanrua hi a lo inziak tuar mai chu niin… an inchum nasa teh a sin aw!
Kan thianpa kuthnu, a lemziah hnu kha lehkhabua chuang atan chuan a itawm vak lo reng a. Kan thian pakhat lehkabua ramsa lem chi hrang hrang pawh ‘a pa’ vekah a lo chhuah sak pek a! A tuartu tihngaihna hrelo chuan ramsa ho chu zan lampang a thlalak ang mai hian an taksa lo zawng chu a cheidum ta ringawt a.
Kha lem kha lemziak thiama chuan a hming a phuah lehnghal a. A hmingah ‘w-meizial’ a ti a. Ka ngaihtuah chianga awm ang pawh ka tikhawp mai. Tunhnuaah pawh mipa hmanrua hi ‘w-meizial’ ti hlirin kan sawi thin!
Annual sport leh kan pawl!
Kan thianpa lemziak thiam chu kan pawl leader a ni a. Amah kha a lianin infiam pawh a thei ve hrim hrim a. Kan pawl pawhin kan thlamuanpui khawp mai. Chutah sport kan tan a. High jump kan nei hmasa ber a. Pakhatna kan hauh pawh kan ring tlang khawp mai. An han zuang sap sap a, tam an awm tawhlo, a sang tawh tihah chuan kan thianpa chuan tullo deuh mai hian a rawn ‘inla vaitingtang’ alawm le. Nalh zetin hrui chu a rawn zuan mai pawh ni lo, a rawn inkawh khum zak mai a. A chak ber hmeichhe kutbeng thawm pawh a ring ngang mai. Amaherawhchu a tlakna lamah khan duh angin a lo dup si lova kan han inchum tak laih laih kha!
High jump-ah chuan engmah kan ni ta lo. Tunah football ve thung le. Kan han inthlang sap sap a, field chhungah chuan thiamber awm ang vek hian kan han lut a. Kan inkhel ta alawm le.. A tir lamah chuan kan khel a pangngai fu a, kan thianpa pakhatin advantage a laka, a dive derna lama a tluhnang erawh a bula awm a, thil hrechiang tan chuan buaipui aiin hmun hrana kal a, va nuih kha a finthlak zawk!
A tir lama kan khelh that tehrengnen kan khel rei tulh tulh a, kan nawi tulh tulh a. Half time hma deuh phei chuan khawvela football formation-ah chuan a la mak ber ang tihtur khawpin kan khel ta! Central Back ah mi paruk ngawt mai an awm a, chuti chung pawh chuan a la tlang tho thei zu nia! Chumi tuma midfield position a mahni chauha ka awm chu rinaiin thawl a lo awl khawp mai!
Ramsa rual awmkhawm!
Khami kuma kan class kha chu ‘inhlei’ tih thumal hian a sawifiah zo awmlo e. Mihring chetdan atana mak pui pui kha a tam ngawt mai! Kan thianpa pakhat khan kan class vai pakhat kha class pumpui hmaa a han solo tir mai thin kha chu nuih a za duh teh e. Mizo tawng pawh thiamlo kha mizo hla ngei mai a saktir tlat a. Vawikhat lam diklohah vawikhat pen a la hlawh lehnghal!
( a thui lutuk dawn tlat. Chhunzawm atan khek mai ang…)

Saturday, May 21, 2011

Kan khuaah Hockey!!!

Heng mite hi khawi atanga lo kal nge? Kan khuaah hockey khel turin an lo kalkhawm alawm! Ni e, kan khuaah 'Istiri Kap' a awm dawn!

An inkhel dawn ta!

Mikhual team tha pawl leh kan khaw team an inkhel dawn a. Kan khaw teamah khan Pu Liana khan sawrkar tiangkawm a neih kha a chhuang a ni tih hriat tak leh intithei fe hian a rawn chhuahpui a. Mikhual team tantute lamin an han hmu ta ngei a le; amah a thiam hmel bawka an huphurh ru nghal hle a.

A hnu deuhah chuan kan khaw team lam chu field chhungah an tiangkawm 'mautam lo ram' a mau tha chi bul uluk taka suih tih hriat tak mai nen chuan an rawn lut ta phak phak a. An jersy erawh mahni remchan ang ang a ni thung. Mahni khuaa khel anni bawk a tantu thawm pawh bengngawngte hriat khawpin a ring a, mual a kur lo chauh a ni ber mai.

Mikhual team erawh an la rawn lang lova, an tlawm mai a nih ka ring hman a. A hnuah chuan mikhual team lam chu an tiangkawmnen an rawn lut ve leh a. Away team an ni bawk a kawr an rawn phelh thung a. Mikhual team lam tan tute pawh an thawm a ri ve ta! Chhei raw! An inkhel dawn e...<!--more-->

An thai tep tihah buaina a awm tlat mai le. Kan khaw team chuan mikhual team ho tiangkawm an han enchianga kan khaw team chuan mau bul an rawn hmang a, mikhual team chuan râw bul chhah telh tawlh, hlai tak tak an rawn hmang tlat mai le! Engtin nge ni zel dawn le?

Mikhual team kha an phakar ti ngawt dawn ila a tiangkawm awmdan turah dan an siam bawk si lo. Tihngaihna a vang ang reng fu mai! Chutah Pu Vala ngaihdan a ni ta lo! A tlanchhuaka, field sira a chempui dah chu a la lawk a. Mikhual team tiangkawm chu "a theihloh..a theihloh" tih pahin a duhna lai laiah a hlawi sak ta pawp pawp mai a. Tumahin sawisel ngam heklo, tiangkawm hman tlak alawi an nei ta lo a. An chakloh phah hial ta a.

Tactic chi hrang hrangte kha!

Kha Istiri Kàp ah khan tactic chi hrang hrang hmuhchhuah thar a va tam tak em! Khatiang tactic kha professional tak tak pawhin an la hmang kher lovanga, a entu mipui pawhin tih ve nachang an hre kher lovang! Kan khaw team motto chu 'MAWI DEUH A CHAKLOH AI CHUAN MAWI VAKLO CHAK A THA ZAWK!' tih a ni a.

Kan khaw field a phut zia kan hriat tawh kha. Kha field phut kha Pu Vala tan khan a va pawimawh em! A ball chan apiang khan a han chawk khu vaka, ball kha a ak ta daih a, ball awmna midangin hre tawh heklo, an uichuang hawi mai mai lai khan Pu Vala chuan lehlam pawl line chhungah a lut a, a chawk khu leh vak a a vaw goal ta mai thin a. Refree tan goal lova pawm chi ni heklo, mawi vak lovin kan khua kha an chak leh nge nge thin.

Pu Kapa, tlanchak leh thahrui ngah tactic kha lehlam pawl khan an hah pui thin mang e. Ball a chang a,field a chawk khu vak a, a tlan ta vak a. Lehlamin an um luih luih a, thui fe a tlanpui hnuah a ding a "saw laia saw ball a awm" tih pahin a tlanlet pui leh thin!

Pu Chungnunga inbuan chakin hun tawp dawn lam, chakloh laia ball a chan apianga "kan khaw sual huaiin ka rawn khalh e. A ngam chuan min rawn chuh ru... IN NGAL KHA A NI MAI" a han tih tawh chinah kha chuan a va vaw goal nalh thei tak aw!

Vawikhat chu kan khaw team te an la indraw a. Hun tawp dawn tepah penalty corner an hmu hlauh mai. A goal chuan final kan lut thei dawn a. Mipuiin kan bial hnai tuau tuau a, kan haw haw dur dur a. An han thai ta a le, Pu Rema chuan a thai chu a thai goal lo na a, a khuk em avangin refree khan a goal leh goal loh a hmu thei dawnlo tih hre tu kotlang team Pu Zuala chuan a ball dang ah chu goal chhungah a lo dah a, a goal leh goal loh hriatnana an dah thingphel a lo khawng ri a. Refree chuan goal-ah pawmin kan khuain final kan lut ta!

The Greatesh Show on Kan khua!

Istiri Kap final chu kan khua leh khaw thenawm chiahin an khel dawn a. Entu mipui pawh kan thahnem hle mai. Putarhoin hnang hlai tur nen an han inchhawp rup maite, pitar la her turte nen an han ni nuk mai kha chu 'THE GREATEST SHOW ON KAN KHUA' tih loh chi a ni nang!

Chutah player te field chhungah an han lut a. An han thai ta.. thawm a tha ham ham khawp mai. An tangdun ve ve bawk a, an inchuh tak tak mai chu a khu lutuk kha an inchuh ber ball a awm tawhloh pawn an la thai khu chum chum zel!

Goal inpe lovin a innawr tawn zak zak a. Hun a tawp tep tihah chuan Pu Chhawna te thian pali chuan ro eng emaw relin a ding khawm ta thap mai. Eng tak rel ang maw?

Chutah le, Pu zama chuan ball a chang a. A khalh phei ta.. khalh tlang a tum em ni? Aw, Pu Chhawna a pass ta! Pu Chhawna khuan engtin nge a tih dawn? Rinkual chhunga Pu Ruma leh Pu Ngaia chiah an awm si! Chutah le, Pu Ruma chu a han pass a, a vuak dawn veleh chuan goalie bula awm Pu Ngaia chuan goalie ngal chu a lo hem pawp mai a! A tlu vial nghal tawp a. Refree in hmu thei heklo Pu Ruma ball vuak man tu tur ber lah a lo vial tawp tawp tawh si... a vaw goal ta! Hun a tawp zui nghal a. Thawm a va tha ham ham em!

Tichuan Istiri Kap ah chuan kan khua chu MAWI VAK LOVA CHAKIN Istiri chu kan hawn thei ta a!

Tuesday, May 17, 2011

Putara leh Kei!!!

A khuhhawnna
Kawt nilum chu putar chuan a ai a. A khat tawkin a thutna atanga lang thei ral lehlam tlang chu a thlir leh zauh thin a. Thil engemaw ngaihtuah nei niawm tak hian a han en leh vang vang thin a; chutah le, a mit atangin mittui a rawn hnam tiam tiam a, tuma velh lovin a mittui a sur ta zung zung a…
Kha putar kha
Kha putar kha tunah chuan a khualzin kawng hi thui a zawh tawh dawnlo tih chu a hmel atangin a hriat theih tawh a. Hnuhma tam tak pawh a lo hnutchhiah tawh. Kha putara khan tunah chuan han titi pui a, nunhlui han sawipui tur a nei tawh lo. A thian thenkhat chuan an kumkhaw hmun tur an pan tawh a, thenkhat chu amah ang bawkin pawnah nilum an ai thei ve tawk tawh a. A then chu thih sualin natna khumah an mu mek thung. Hmana thian ngaina em em kha tunah erawh thian kawm turin a tha leh bengin a daih tawh lo!
Vanglai nite chuan..
Kha putara vanglai hun kha han ngaihtuah teh ang le. Mi tlawmngai leh mite tana malsawmna nih tumna chu a pianchhuah pui ve reng emaw tih mai tur khawpa mi thothang tha a ni a. Zualko kal te, satlak nikhua leh tanpui ngai an awm apiangin a che hmasa ber pawl leh a tawp thlenga taima taka thawk thin a ni. A ram a hmangaih a, a tul chuan a ram tan chuan a nun pawh hlan mai thei turin a inpeih reng a ni.
A vanglai chuan ramvah nuam a ti em em bawk a. A thiante nen chuan ramvakin hmun hla tak takah zan riakin an chhuak fo thin. A tan chuan ramhnuai chu a in ang maia ngaiin ram pilril berah pawh hlauhnain a tibuai ve ngailo emaw tih hial tur khawpin a awm hial thin a ni.
Khatiang khawpa pasaltha kha chu khawtlang pawhin an ngaisanga, nula rimnaah pawh midang chuan an zah ru hle thin. Meichher nen nula rim turin a thianpa nen an han kal a, kawtkaia thawm an han neih tawh chuan an thutna tur an lo kian lawk hial thin. Chutiang khawpa vanglai nun sawitur nei tha a ni.
Vanglai parmawi a chuai ta..
He leilung hian keini a chhunga chengte hi min lo her pui nasa khawp mai. Kha putara pawh kha a vanglai chuan mi thothang tha leh mahni inzo tak ni mahse tunah erawh a che vel reng reng chu en zui reng a ngai tawh a. Engemaw hleka chhe rup thei a ni tawh tlat.
A tha chaknate chu engtiklaia bo nge tih pawh hriattheih a ni tawh lo a. A beng hriatna tha em em, thil ri hlek chu lo hre hman zung zung thin kha tunah chuan a bula ring taka tawng pawhin a hre hleithei tawh lo. A vun leh a taksa han en teh; a vanglaia sa tha leh chak tak ni thin kha tunah chu a tihrawl a bo zo a, tisa pawh a nei tawh manglo. A mit kha a var thin tehrengnen tunah chuan khua pawh a hmu hleithei tawhlo! Hringhniang a chul zo ta.
Suangtuahna beiseibo si chu..
Putara chuan a vanglai hun a la hriat ve reng avangin a lung a leng thei em em a. A mitthlaah chuan an ramvahlai lei an vanglai hun an hman dan kha chiang takin a la hmu thin. Chu nunhlui ngaihna chuan a ni vel thin tu chu!
A ngaihtuahnaah chuan a silai hlui banga intung chu han ah a, a uipa nena ral lehlam tlang vela han vah leh chu a lungkham ber a ni a. Kawrte tui han in a, lungpui chunga han thut a zial han zuk vang vangte kha a thil chak ber a ni a, a tha chaknain a tlin tawh si lo. A changleh a uipa nen a hma nia an sazuk kah hliam hnu an han chhui a, kawr ruamah an han chhuichhuak a, a uipa chuan a tlanna lam turah a lo tlan khalh a, a han bauh a. Chutihlai tak chuan ani chuan a lo kap a. A uipa nen chuan hlim takin an han chan thin angte hian a han inhre thin a. Chu pawh chu suangtuahna mai mai a lo ni leh thin si.
A vanglaia a ram kalna thinte kha a mitthlaah a lo langa, a tlangdung kal dan zawngte pawh kha a la hre ruai ruai a. A ngaw te kha tunah eng ang takin la awm ang maw? tiin a ngaihtuah thin. Han kal leh pawh duh viau mah se tunah chuan a tha chakna kha vawmbo ang mai a nih tawh avangin a rilruin tlin mah se a thain a tlin tawh si lo! He khawvel hi a tan chuan lung ti lengtu a ni a, tunlai thiamna chi hrang hrangte hi ninawm mai a ni tawh. Ni e, Hringhniang an chul zo ta!

Tuesday, May 10, 2011

Sikul leh Kei!!!


A hun leh ni chu hriattheih ni tawhlo mah se tumah hmelhriat ka neilo tih erawh ka la hre reng. Ni e,kha sikul ka luh tan ni kha chuan khual ar chanah pawh ka chang nasa bik awm e! Kan khuaa ka ngam reng turte pawh khan “He lai lung chu Ek a ni maw?” ti ta se hnar kan hup nghal vat ang. Tumah hmelhriat nei heklo le zia kha chu ka thup nasa khawp mai.

Kan class kha kan tam ang renga hmelhriat pawh kan nei tan chho ve ta. Thla khat chhung vel kha chu zia ka han thup ve a; thlakhat a han pelh erawh kha chuan ze thup a har tan ta! Ka ze ngai a rawn chhuah leh avangin chetdan mak pui puiin kan han che chho ta a. Khang kan chetdan zawng zawng erawh kha chu mihring damlai kan la hmu duh a, kan la kawm duh a nih chuan sawi vek chi a ni lo a, sawi dawn pawhin kha a chilh tlat thei nia!!

Hremna mawlh mai kha!!!

Khatianga kan zia kan han pholan tak tak takah kha chuan zirtirtu tan khan en liam mai mai kan hart a aniang a tir lama nungchang tha ber pawl ni thin kha hrem tawk ngaun ber kan han ni chho a. Class a han din te kha chu ngaihah kan nei tawh! Amaherawhhchu, super kuk leh main kuk kha chu ngaia neih a har khawp mai. Min han kuk lawlh kha chuan khua hi a sik vawt emaw tih a awl khawp mai!

Thian sual kawm hi a lo pawi a ni e! Kan thianpa pakhatnen kan han thudun  kha chu kan sister khan kan class a a rawn luh apiangin kan pahnihin kan bengah a pawt ziah a. Vawikhatchu  tlai deuh tawhah a rawn lut a, a hmanhmawh bawka kan inhlei pawh kha a hmulo torah kan ngai a. Duhtawkin kan awmhleia; period a tawpa “vawiin chub eng a rim dawnlo a nih hi” kan tih rilruk lain kan pahnih hming chu a lam a, min ko chhuak a kan bengah chuan a pawt leh ta hram a.

Inhremnana classmate te hmaa inthingthittir kha chu keimahni hunah kha chuan an ti duhlo khawp mai. Min han thingthittir ve ngawt a, midang zirtha tur kha kan lo insiamchhiat khum ta thin a. Tumah zir tha thei chuang bik hek suh. Classmate te nen khan ngaihtuah miahlohin class tlingtlak chang kan ngah khawp mai.

Shaolin soccer nge World Cup in?

Kan Class kha a senior ber kan ni bawk a class dang kha chuan engtin vak mah khan min ti ngamlo hrim hrim a. Class atanga ka thianpanen hnawhchhuah kan tawh pawh khan classmate te lo insiamchhiatkhum thei tawhlo mah ila class dang games talk ha kan tibuai hram thin. An inkhelhna sirah kan lo thu a, kan zawn a ball a lo lum apiang khan a liam thui tur zawng pawh ni chuang lovin a liam duhna lamah khan a rem zawng zawngin kan lo pele mai thin a. haaw ngam heklo le! Min ning ve thin ngawt ang. Class atanga hnawhchhuahlah kha kan sister khan a hrat em em si a!

Vawikhat chu class VIII ho games lain class kan off hlauh mai a. Intum ang u kan rawt a, an lo pawm ve mai a. kan khelh tan hmain kan sikula a lian ber kan class ami chuan “Shaolin Soccer nge World Cup in kan khelh ang?” a ti a. Engtinmah an chhanglo ngawt vei a le… kan han inkhel mai a khelzui ngamlo an tam the a sin! Hmaa ngal awm tawh phawt kha chu kan class ho khan kan chhir pawp zel mai a keini class ami lah tumahin an chhir ve ngam si lo. A nuam ve duh angreng phian!!!

Nunhlui ka ngai!!

Khatianga kan lo tualchaina hmun kha tunah chuan tualchai an awm tawh ngailo a, kan inkhelhna hmunah khan tumah inkhel an awm tawh ngailo. Kan hank al leh pawhin zirlai naupang tumah hmuhtur an awm tawhlo. Kha hmun kha an sawn tawh a, tunah chuan hmunruak tih theih tur khawpa reh a ni tawh.

Ni e, min hrema min chhuahtir thinna hmun leh pawna kan thingthitna hmun thinah khan hrem tawk avanga thingthi an awm tawh ngailo anga hlim em em a kan nuihna thingkung hnuaiah khan zirlai naupang hlim em emin an inkawm khawm ve tawh ngailo ang! Khang kan nunchan zir hunlai kha tunah chuan ‘hman’ a ni tawh a, thenkhat tan chuan thawnthu mai mai a ni tawh. Ka thiante leh min hrem thintu zirtirtute kha an la pangngai vek angem aw??? Ka thiante nen khan min hrem leh dawn ta se a cahgn chuan ka la chak thin. Mahse chakloh pakhat ka nei SUPER KUK MAWLH MAI KHA CHU(H)!!!!!

Monday, May 9, 2011

Kha nula kha!!!

A hun leh ni ka hre ta lo. Ka hriat zawng chu chawlhni a ni a; khawdanga ka vawikhat chawlhni hmanna tur leh ka inkhawmna hmasa ber tur a ni a. Tin, kha kan inkhawmna tur Biak Inah phei kha chuan ka vawikhat luhna tur a ni nghe nghe a. Ka tan thil chhinchhiah tur leh tawn tur a tam ngei mai.
The mission bell
Kha ka inkhawm tumna kha duh vang pawh a ni lo, a nawr a nawr chhuah ang mai kan ni a. Tih loh theih a ni si lo. Phurlo zetin kan thawmhnawte lachhuakin kan han nawt mam ve thuak thuak a. Inkhawm tur chuan kan insiam ve ta.
Biak In dar a rawn ri tan a. Hun vawndik ka duh avangin hma takah ka kal a. Mipui an rawn kalkhawm tan a. A tirah chuan a hrehawm duh khawp mai, mikhual awmthar kan ni a, naupang hoin min han en deuh vung vung phei chuan ngaih a tha duhlo teh a sin.
Ka han hawikual vel a. An Biak In chhung chu a nalh hle a. Mit a titlai khawp mai. Ka hawi kualna lamah chuan thil pakhat, ka rilru leh ngaihtuahna zawng zawng la nghal vek tu thil ka hmu ta tlat mai le. Chu ka thilhmuh, Chuankite kau ang seih a hmeltha nula mawlh mai chu…!!
Phuloh Thanghmingliani
Chu nula ka hmuchiah chu ka rilru leh ngaihtuahna zawng zawng min laksak a. Hawisan leh mai pawh harsa tak a ni. A khat tawkin ka en leh zauh zauh thin a. Chu chauh pawh chu ka tan chuan a lawmawm khawp mai!
Chu nula chu duhawmna leh mawinain a tuamhlawm, hmelthatna zawng zawng nei tura khuavang siamluih ang mai hi a ni a. A hmel leh pianziaah chuan sawisel tur awm miahlo khawpa PIANTHIAM-I a ni a. A vawikhat melh ringawt chu zawngtah kung atanga tlakah hlawh rawh ti ta se ka tla nawn ka tla nawn duh hial ang.
Sakhmel tawnloh Lungrun-i chu..
Tunah chuan kum tam a liam tawh a, kha ka inkhawmna hmun atanga ka chhuahna pawh a rei ve leh ta. Amaherawhchu kha nula kha engtiklai mahin ka theihnghilh ngailo a. Theihnghilh a hnékin nitin rilruah a zûnzam a cham telh telh si.
Nikhat chu ka vanneih a siamin kha nula biakpawh theihna number kha ka nei ta hlauh mai a. A lawmawm duh ngei mai. Mahse, va be ve ngawt ila min lo hre ve angem? Chuta chiang ber chu engmah a chianglo tih chauh a ni!

Monday, May 2, 2011

Hostel leh Kei!!!

Thiamna eng emaw tal puakchhuah tumin Hostel-ah mutbu ka han pu lut ve ta rap mai a. Hostel nun chu zirtur a lo tam khawp mai. A hmaa kan hriat ngailoh leh kan la tawnloh thil tam tak kan tawng a. Nunphung leh chetziaah thil tam tak kan han hre nghal pang mai. Kan chetdan thenkhat erawh mihring damlai beng hriata sawichhuah chi vek erawh zu ni suh!
An sawi Serkhawpui leh lunglen!
Mi khuaa han awm chuan lunglen a awl duh ngei mai. Zu in thinin an sawidan ang deuhin tlailam hi chu awmlo se la lunglen a zia tur hi a nia. Tlai ni tla turin kawlbul a chhun en sut a, leilung mawina a han pholan chiah hian lunglenna pawh hian mi a han zem tan a. A rukin kan inhnit faih faih thin.
Kan thianpa pakhat lungleng lutuk pawh an khaw tlang lan theihna kan hostel field lamah amahin a lo va phei a. A lo va tap a ni awm e. A duhtawka a tah hnuah hostel field thlang kawnga kal nula pakhat a lo chhaih chu niin! Kha nula kha kan hostel chhak Biak Ina rawn inkhawm thin a lo ni hlauh mai a. Kan awmho chhung khan a hél zak zak thin!

Ka lungleng thin khan ka guardian te kha ka va tibuai nasa thin em! Tunhnua an sawi leh te hian ka la ip chawih chawih thin. Ka guardian khan min ngaihtuah thei khawp mai. Kawng tam takah puitlinna ka neih phah ta hial reng a ni. Tunhnua ka ngaihtuah leh hian ka la lawm khawp mai. Kan u pakhatin mi tam thep thawpnaah “chu zing tawngtai inkhawmah i lungleng lutuk chu an tawngtaipui che a maw?” an ti mai chu(h)! Hnar hi a lian satliahlo..a tuvu hlurh hlurh hian ka hria!
Ei leh in lamah!
‘Hostel naupang chu an rawp’ duh tih hi ataka chang tute zinga pakhat chu ka ni ve awm e. Purun var te, purun sen pumkhat te kha a va han ropui thin tak em! Tunhnua ka ngaihtuaha ka la nuih kur kur na thin mawlh kha- chawlhnia kan sa dawn hi vawikhatah eizo phal lovin kan dah tha thin a. Ka thianpa nena kan sa dah that zawhtein hmu fuh in ti fe hian min lo ei khalh hlauh mai a. Kan va in um nasa tak aw!!
Kan hostel kudam mawlh mai kha. Kan cook khan mamawh lain a lut a. A rukin kan han zui lut a. Kan biru a. Pawn lamah a kalh hnuah duhtawkin eitur kan dap a. Kan duhtawk kan ei hnuah thawm kan han nei a. Rang fein kan cook a rawn lut a. Keini lahin kan tihtur kan tifel vek tawh si! Min report ngai lem hlei chuanglo a!
Eitur hrim hrim kha kan rawp vek mai. Vawikhata serthlum pum 28 te han ei kha chu a hunlai chuan kam ram mai mai mah nise tunhnua ka ngaihtuah leh hian kan lo ti mah mah em aw?? tih vawng vawng chang ka nei thin!
Chhuah rûk mawlh kha..
Duh ang anga tal theih a nih ve loh avang leh hun bi neia thiltih ngai a nih avangin hostel chu hrehawm ve tak a ni. Mi khawlai leng han hmuh te hian an huatawm rum rum thei nia mawle!
Vawikhat kan chhuak ru min man alawm le. Kan warden khan min ko a. Min dawp a tum ve khanglanga, ka inthiamlo lutuk leh dan ka bawhchhia tih ka hriat avanga ka pawiti lutuk ka tawng ngamlo tlat mai chu min dawpchhuak lo chiang teh a sin aw!
Kan warden tihngaihna hre lo lutukin Father hmu turin min ti a. Father hmuh kha chu a huphurhawm khawp mai. A case kha a nep lo ropui si a. Chutah Father hmu tura kan kal chu keini aia pawl sang zawk kan hostel ami pahnih hi test naa an fail vangin an lo hmu ve dawn a. Kan luhtir hmasa ta hlauh a. Kan va lut ve leh chu kan Father chuan test naa fail ve tho turah min ngai a ni chek ang. Lehkhazir tha tawh turin tha deuhin min lo hrilh a, zir dan turte min lo hrilh a. Nui sang chungin tha deuhin min chhuah ta a. Pawn kan chhuak chiah chu ka chhuahruk pui ka thianpa nen chuan kan ‘HALLELUI’ lo chauh mawle!
Warden hmachhawn thiam a ngai!
Kan warden khan tukhum lamah mit a nei emaw tih mai tur khawpa fing hi a ni a. Kan thian thenkhatte pawh dan bawhchhiat avangin a man nual thin reng a. Hauh pawh an tawk ngun thei khawp mai. Kei erawhin hauh theih miahloha tihdan ka thiam thung!
Vawikhat chu kan kitchen bula theihai la lian vaklo hian amah lo turin min duh hmel lutuk a. Thli chhem zawngte hian min rawn pan tlata hriatna ka nei a. Ka lo ta alawm le! Kan warden chuan tifuh in ti awm tak hian min rawn man a tum ve ngei a. Ka hnuai a lo thlen a, a tawng hmain hawihawm ka lo chhuah vat a. “Sir, khilaia lian ve deuh tawh khi a tui ngawt anga, ka lo lawh ang che aw..” tiin a tui em avangin ei ve turin ka duh thu ka lo hrilh vei luam a. A ngaihdan chu a ni lo tih chu zawlnei sawi kher ngai lovin a hmelah a lang a. Warden tan pawh min duhsaktu hauh ngawt chi zu ni suh. A kal vang vang mai mawle.
Tlaikhat ka chaweikham chu kuhva ei tumin a rah ka lo hmuam tawh a. Kan warden bawk chuan min lo hmu leh pek a. Min man sak a tum ngawt pek a. Keichuan tha deuhin “sir, hei chiah hi ka nei tawh tho. Ka eizo law law mai ang aw?” tiin hawihhawm ka lo chhuah a. A tihngaihna hrelo chu min kalsan ringawt a. Khata tang kha chuan ‘tawngkam thain sial a man’ tih a dikzia ka hrechiang ta khawp mai. Sial em chu man lo mah ila, hremna tam tak chu ka pumpelh tlat thung…

Monday, April 18, 2011

I ngaihtuah ve ngai em?

Ni a ral a, kum te pawh a lo vei zel a. Kan taksa chakna chu a ral tial tial zel a. Nakinah chuan kan vun te a la chuarin, kan taksa chu ui cher tak ang maiin ruh a lo lang thuak tawh anga. Kan mit hmuh a fiah tawh lo anga, kan beng hriatna pawh a chhe tawh ang. Chutih hunah chuan a ni lunglenga kan la kiu vawng vawng hun tur chu.
Mihring damchen
He kan damchhung kum kan hman zah hi a inang lo hlawm teh e tiro u? He thlan khur hian a angchhunga a pawh luh theih theih min pawt lut mai a nih ber hi. Nausen an borala, naupangin an zinkawng an zawh tawp a, thatlai hunah mual an liam a. Tar thlengin a hnuk lut a nih hi.
Kan Bible i han keu teh ang u. Mihring damchen min hrilh a, ‘marawhchu a rei poh leh lungngaihna leh thawhrimna mai a ni tiin min hrilh a nih kha. Kawng thui tak zawh tur chuan chhelna leh taihmakna, lungngaih beidawnna leh manganna kan tawrh chu a ngai ve reng a ni.
Beiseina eng hnuai atangin
He khawvela kan lo pian khan tap chungin kan hmachhawn nghala. Chu kan tahna ram chu eng emaw nih tir tumin beiseina nen hmalam thlirin kan nung thin. Chu beiseina chu kan thlir a, beiseina vek chuan min hruai thin. Beiseinain kan vanglai hun kan hmanga, beiseina bawkin kan nun a tawp thin.
Kha kan vanglai hun kan hman khan dan a zir khan kan hun lo kal zel turah hma kan lo la lawk thin a nih hi. Nakinah chuan he khawvelah hian beiseina chhete bak i neihloh hun a lo la thleng dawn. Chu hun chu i thlir ngai em le?
Ka tar ta
Vawi tam tak nichhuak leh tla kan hmu hnu, sik leh sa in vawi tam tak min herkual puiin, hun leh kumin min liampui hnuah chuan i luah kelsam a lo to tan anga, i vun mam tak thin kha a lo chhuar hnuah chuan tihtheih dang i nei tawh lovanga, i tih theih awmchhun chu “ka tar ta” tih chauh a ni tawh mai.
Ni e, he khawvel hi ila hmachhawn chho zel a nih chuan chu hun chu ila thleng dawn. I duh emaw duhlo emaw lam a ni tawh lo anga, i rahna leilung thuhnuaiah i awm tlat tawh avangin a la her chhuahpui tho tho dawn che.
Chutih hunah chuan
I taksa chakna chu i hriatloh laia lak sak i ni tawh anga. Nangmahin thil tam tak i ti thei tawh lo ang. In chhunga upa ber ni mahla ro han rel turin i chen mekna khawvel thiamna i man phak tawh dawn lo. I vanglaia ni lo chhuak, i lawm em em thin khan anchhia a rawn lawh che emaw tih mai turin i ning tawh anga, i kum rualpui kawmtur an vang pharh tawh ang. Kawmtur awm pawh nise i beng hriatna a chak tawhloh avangin hlim taka inkawm a har tawh dawn. Chu hun chu i dam zel a nih chuan i hmaah a lo awmlawk tawh a sin.
Ni e, nakinah chuan tar â tih i hlawh tawh anga, inthlahrung takin i in ngeiah pawh i nung tawh ang. Chutih hunah chuan i vanglai ngaiin i kiu vawng vawng tawh anga, han sawipuiturin thian i nei tawh dawn lo.
I khualzin kawng chu zawh tawpin i kumkhaw hmun tur i pan hunah chuan i boral thu chu an hre darh anga. Veng lehlamah chu “putar/pitar a thi” tiin an sawi anga. I hming chu he khawvel atang hian nuaibo a ni tawh ang.
Chu hun chu thlir ranin he i vanglai hun hi hmang tha la, theihtawp chuahin ram tan thawkin; ram tan mi chhinchhiah tlak ni turin nung ang che. Chutilo zawng, i hringnun a zawh rualin i hming a bo ve nghal mai ang.

Tumkau ni leh lunglen!!!

A hun leh ni ka hre ta lo. Ka hriatzawng chu tumkau ni a ni a, ni erawh a sa hle a ni tih mai a ni.

Keini chu hostel-ah kan awm a, tumkau tur chuan chaweikham dar 9:00 am velah field no. 2 ah ngei mai kan han chhuak khawm a nih kha. Ni a sa si, kan tawpna tur chu lang reng mah se lang lo lama kawng awm kha a hlatzawng erawh mitdelte hriattur khawpin kan bel thung si. Bakah mahni duhdan takin a kaltheih dawnloh lehnghal! A huphurhawm tak zet a ni.

Tichuan le, hun ruat chu a lo thleng a. Thalai hoin an tûm laksa chu an han sem a. Naupang thenkhat dawn hmasak duha an han innek nak nak te kha hmuh a va nuam em! Tunah chuan khang naupangte kha an lian tawh hlawm ngei ang le.

Tûm chu min rawn pe ve a. Keia kuthlei veng zo lo nge pianpui designer nihna nei chuan ka tûm chu tunlai thangthar tawng takin ka lo modify a. A hnah hlai tak kha thler sinin uai hniang turin ka siam a. 'Mawi titu nge tam anga tullo titu' tia ka ngaihtuah laiin ka thiannu pakhat lo kal phei chuan,"a va han tullo tak, i peih mai mai mange" tiin ka tûm chu an sel nghal pang mai a. Chutah zet zawng 'a va mawi ve' tia min hrilhtu awm tawhlo turah ka ngai hmiah tawh.

Tichuan kan inpeih fel hnuah chuan au dan kan han zir hmasa a. Hruaituin, "a hma lama kal te leh, a hnunglama lo zuitute chuan..." a han ti a. Mipui chu kan lo 'hosanna' a. Chu mipui "hosanna' kara beng bula 'hosanna' thluk chiaha 'haw san ang' ti tawk lo awm erawh insum a ti har thei khawp mai!

Ka tûm ka thiannuin min sél sak tak chu tuilo zetin ka keng ve zel a. Ka han en thin, a siamtu chuan mawi ka ti alawm..mahse, ka thiannu chuan mawi a ti tlat lo!

Mawi titu an awm dawnlo emaw tih hnuah naupang pakhatin ka túm ken chu a rawn hmu a. A ken lai chu tih ve a tum a. A thiam si lo! Ka han hmuh chuan chu naupang chu ka ken lai chu ka pe ta a. A dawngtu nge lawm anga ka thilsiam mawi lo ti ve tu an awm tih ka hriata ka lawmna; tunge lawm zawk ang aw? tih hi ka la chhutchhuak lo.

Túm neilo chuan ka kal zel a. A tawpah chuan Biak In kawt tualzawlah tawpna hun siamnan kan han ding kual a. Kan inhmu tawn vek tawh si. Tlema kan lo star(tunlai tawng takin) ve deuhte a han hawi kual a. Mi pawh an rawn melh ve zauh zauh a.

A tawpnan tiin kan dingkual chu kan au leh dawn a. Ka rei! khawnge ka túm? Ka paih em ni? Ni lo, naupang ka pe leh si! Mi chuan túm an keng a, kei erawh kut lawngin ka awm si. Beramho zinga kel awm angah te ka inchan ta rum rum a....

Friday, April 15, 2011

Keimah Thingtlangpa

Thiamna engemaw tal neih ve tumin khawpuiah chuan khu luih khawpin motor atang chuan ka han tum thla ve chhak a. Engkim mai chu thingtlang nun nen chuan inanglo tak a lo ni a. Hmabak ko tak maiin min hmuak nghal pang mai le! Chu ka hmabak ko tak mai- khawpui nun zir mawlh mai kha.
Ni e, thingtlangah chuan nun mawl te, lungkham lutuk leh thenawmte neih ang neih ve talh tumna rilru kha kan nei ngai mang lova. ‘lawm te in lawmpuia, tap te in tah pui’ policy khan min la chiah hneh em em a. Mahse, khawpuiah erawh nun a dang ta! Thenawmpain motor a neih chuan a neih aia tha neih tuma thenawmpa buainate, thenawmpa aia insak san tum rana inel inthenawm karah keimah thingtlangpa chuan chutiang nun chu zir ve a ngai ta si.
Mizoram hmasawnna tur thil hrang hrang lo kal atanga zaa sawmriat dawn khawpui ber tihhmasawnnan an hmang niin an sawia. Chu khawpuiah chuan ka lawi lut ve naa hma a sawnna erawh ka hmu tam lo khawp mai! Khawpui a chep telh telh a, khawpui tih thawl aiin khawpui laili laia sumdawnna hmunpui sak a han ni a. Hetiang renga kan awm a nih chuan kan khawpui chep hian min la nekchhuak mai ang tih pawh a hlauhawm! Chutiang khawpa chep khawpui chu nimahse thil zir tur pawimawh tak chu midang lak atanga rilru hlata, mahni chauh lo chu midang awm ve lova ngaih theihna rilru put a ni.
Chu khawpui ngei chuan a ni lo’m ni kristian ram khawpui chu? Aw ni e! Mahse chu khawpuiah chuan kristianna kawra hmang an tam tih erawh hla thuin a sawi pawh i hria ang. Chu khawpui chu a mak a sin, mi hnuaihnung zawk chungah dan a khauh a, milian..mahni hlawh phu lova khawsa chungah thung chuan dan a awm lo ta em ni aw? tihtur khawp a ni tawh. Chutiang dikna nek bo tanna khawpuiah chuan zirthiam theihloh pakhat ka nei tlat mai- mahni hlawh phu lova khawsa zahna pek tlat mai chu!
Kristian tamna khawpuiah chuan kristian lo ho incheidan niawm takin, a nau zawk kekawr a rawn ha em ni aw.. tihtur khawpa te rawn ha te, a hmai saw phih fai a har ngawt anga.. tihtur khawpa hmaihnawih hmang nasa an tam em em a. Thenkhat a pa kawr emaw tih mai tur khawpa lian rawn ha te ka hmu nual ta! Keimah thingtlangpa tan chuan mak tih khawpa thlir a ngai a, angel emaw tih hial pawh a awl khawp mai.
Ni e, keimah thingtlangpa ka ni a. Khawpuia ka han luh khan kan ram hmasawnna tur khawpuia an hman tamzia ka hmua, hma a sawnna erawh ka hmu tam lo. Keimah thingtlangpa tan chuan chung ram hmasawnna a lo thlawna luanral tir mai mai tu chu ka ngai thiam thei tlat lo. Ngatimaw? Ele! Kan khaw hmasawnna tur a tibo tlat alawm!!!