Fiamthu Lawrkhawm...

(Thenkhat hi chu mi thuziahah pawh a lo awm tawh a ni maithei. Mahse, heng ka rawn sawi tur  ho, a che chhe ho hi chu anmahni pawh ka hriatchian an ni hlawm a. An ngai ho lo turah ngai phawt ang...)

ZUNKHUM!!!

Khawhar in kan riak a.. Ka mutthilh tawh hnuah au thawm ka hria a.. Ka harh zawk a.. Mahse, a pawitur zawng zawng a pawi zo tawh.. Kan riahpui pakhat, thlanglam tukverha mu chu a thosilen keuin, a awmah ka lo zung chu niin...! A inthlahrunawm duh reuh khawp mai!

VANRAMAH BUAINA!

An pa zing tho kha a tum bur a, a fate'n, '' Ka pa, na i nei em ni?'' tiin an lo zawt laih laih a. A pa chuan thinrim aw takin, ''Nei lo, nizanah ka nupui thi tawh mumangah ka hmu a, kan veng pa thi tawh nen hlim takin an lo awm a.. Vanramah vawikhat na ran ran chu buai phat a awm ang..'' tiin a insawh a insawh a....


KAN THIANPA CHANCE KAN PE VE A..

Kan thianpa pakhat hian kan hmelhriat tleirawl pakhat hian a ngaizawng a. Chu tleirawl chuan, '' Lo len pui teh u..'' a tih thin avangin kan lenpui a. Chance pek tumin kan lenna tleirawl, kan thiannu room-ah chuan Games khel turin kan luh san ta vek a. Chutah, rang lutukin kan thianpa chu a rawn tlan lut a, '' Rawn chhuak teh u, keimah chauhin min awmtir a, ka zak a nia..'' a rawn ti mai chu(h)..! Kan thiannu chu kan va en leh chuan a beidawn hmel teh a sin...

AN RUI PHURIN VAWK AN TALH
(Chawngkhum dan tlang huat loh! An hming hi chu thup mai ang..)

Thian pahnih an nia. Pakhat zawk nu leh pa zin hlanin, an ni thiandun ruiphur khan an vawk an talh alawm le.. An vawk kha 19'(thenkhat teh dan chuan 38 inches) ang vel a nia. An ruih laiin an talh ta a.

Bazarah an sat ve hmiah a. Bukna tur an neihloh avangin mi dawr a mi kg 1 bukna an hmang a. A sa 1kg in an buk a. Chutah buk lung chu dawrah an pe leh mai a. A sahna tur khan sa sahna chem nei hek lo le.. Vaichemin an sat a.

Mi khan an lo dawr ve ta a.. Buk lung nei hek lo, an buk sa kg 1 kha an kut lehlamah chawiin, a lehlamah an rintawk vel an sah thlak kha an chawi leh a..a rihdan a inang vel nia an ngaih chuan an pe ta thin a ni. Chutah, an kal tawh hnu an umzui a..an belh leh vel thin.

A tawpah an peih leh tawh si lova..an bula zuar ve pakhat chu a pe ta vek a. He mite thiandun hi..hemi tuma an vawk talh hi an hlawk ka ring lem lo khawp mai!!


VAI BAWK A NI LEH ANG CHU...:)

A phone a rawn ri ral ral a.. Enchiang mang lovin a han la a..a benga ngaithla tura dah chhoh pahin, '' Vai bawk a ni leh ang chu...'' a han ti ngawt a. Chutah, a han ngaithla a, mizo tawng fiah tawkin, '' Vai chu ni lo deuh anga...'' a rawn ti ta mai a...!

Ka thiante chetchhiatna!

Vawikhat chu ka thiate ho hian nula an rim a. An lenna kha in fal deuh hlek a ni a, an haw lamah khan current a awm ta si lo..an hlau kha an tlanchhe ta a. Pakhat a inring hman lo khan a thianpa tlan tur chu a kawngah a vuan bet a, a vawn pa lah kha hlau tawh siin..a hnuk ta alawm le.. Thui fe a hnuh hnuah an ding a, an han inenchiang a. A hnuh pa kha a kekawr khup pawp vek khawpin a lo hnuk chu niin!

Hepa a hnuk tupa bawk hi a bialnu rim tura a lut kha a pa in chempui nen a lo umchhuak lehnghal a.. A lenpui pa sawi danin, '' Chaltlang chhuk thla, chandmari lamah khian Kei, ka thianpa leh ka thianpa ngaihzawng pa te nen Marathon Race kan nei..'' a tia..a hlauh thu a sawi nasa khawp mai!

'SEN MEI A VA HLUAR ZEK ZEK VE...''
(chawngkhum dan tlang huat loh)

Pafa hi lo hal turin an kal a. A pa chuan a fapa hnenah, '' Vahchapah khian ka chho anga, lo lu lama ka mei i hmuh veleh ilo hal ve dawn nia..'' tiin vahchapah chuan a chho ta a. A fapa lah chuan enga mah hmain a hal nghal ringawt a, a pa chu thei leh thei lovin vauah a zuanglut hram a. An han inhmu leh a, a pa chuan, '' I va han mawl em em ve, min hal hlum dawn alawm..'' tiin a han hau a. A fapa lah chuan mei alh hlup hlup chu en in, '' Sen mei a va hluar zak zak ve..'' a ti duh chauh!

MITTHI DAR A VUAK LAIIN THAWM A LO AWM A... A HLAUIN A VAW TLIR ZAWT ZAWT

Hman deuh khan a khaw pakhat (a khaw hming chu thup mai ila) Kohhran inkhawmnaah curren a thim a. A hnung lam kila naupang mutthlu pakhat kha an hmu si lova. Chu naupang chu har hek lo..an haw san ta vek a. Zanah mitthi dar vuak a ngai a, Mi pakhat hian dar a rawn vua a.. Kha dar riah khan naupang chu a harh thut a, a thim si, a hlau chu hmanhmawh takin a tlanchhuak a. Dar vaw tuin khatianga mi an rawn tlanchhuak thut a hmuh khan a lo hlau ve tho chu niin, a mitthi dar vuak lai pawh a vaw ta zawt zawt a. A hnua naupang sawileh dan chuan, '' Khatia tui deuha ka mu kha dar riin min tiharh a, a thim si a.. Ka tlanchhuak a, dar vawtu lah khan a vaw ta zawt zawt mai sia..ka hlau telh telh e...'' tiin a sawi leh a.

HEI CHU KEIMAH...:D

Ka thianpate inneihin Semi Final ka khel ve a.. Zungbun inbuntir dawnin, inneihtirtu khan Bible in a rawn dawh a.. Ngai teh..zungbun ka ipte a ka ah kha..khawnge a lo kal hman ka hre lo.. Kan zawng tak tak mai chu(h)! Bible-in a lo dawh tawh si.. Zungbun zawng e ti lo chuan thaw a sa hut hut thei nia!

Langpu!!

Nipui a ni a, kan class tan niah chuan kan class room te takteah chuan kan inkhungkhawma. Khang ka thiante ho nen thiamna puakchhuah kan tumna chu nunchan zirnan kan hmang ta zawk a. Amaherawhchu, khang kan nunchan dan leh kan chetzia tam tak erawh sawi vek atan chuan a nasa mah mah thung!

Sachin rawt dip maw?

Kan han inkawm nel a, kumtira kan ze thuhruk tam tak kha kan innel chinah chuan langlo tura thuhruk engmah awmthei tawh heklo le! Ze chi hrang hrang awmkhawm chu ze khatah luantir tumin kan han bei ta a le.. a lo tih chiloh khawp mai! Duh aiin kan nasa mah mah ta hlawm a.

Vawikhatchu ka thianpa pakhat nen classroom chhungah kuhva kan ei a. Kan ka chhung sen kha pawi kan ti lem lo a; a chhan pawh kan teacher zinga kan hlauh loh berin class a rawn la dawn a. Tui ti taka kan thial lai tak chuan thlenglo mah se pawi kan tih miahloh tur a lo thleng ta tlat mai! Kan teacher zinga a thawmna ber leh hlauhawm bera kan ngaih zawk a rawn lut hlauh mai a. Ka chhung tihfai ngaihna a awm tawh si lo, ani lahin hmuhloh der tum tawh heklo. Classmate ho hmaah a period chhung lêi chhuahin kan han ding mai chu kan sim chiang teh a sin!

Khatiang kan chetchhiatna ka ngaihtuah apiang khan kan thianpa pakhat kha ka ngaihtuah chhuak ziah thin. Raja(sahdah) hi a hmuam reng thin a; kan miss pakhatin a man ta alawm le. A ko phei a, “enge i hmuam” tia a zawh chuan kan thiana chuan tihngaihna hre tawh heklo le.. “sachin ka rawt dip a, ka hmuam” a ti ta ringawt a. Kan miss awihlo lutuk chu a ner sawk nghe nghe a. Miin “sachin ka hmuam” ti na na na han inrinhleh vak ngawt theih ni hek suh a thuttir leh ta ringawt a. Kha kan thianpa kha khawvela sachin rawt dipa, hmuam ka hriat hmasak ber leh a awmchhun a la ni!

W-meizial!

Kan thian pakhat erawh a talent a dang deuh thung. Lehkhabua thil lem ziah lam kha a thiamna leh a tuina lam a ni a. A tuartu ni lo tan chuan a nuihzathlak duh viaunaa han tawrh ve chiah kha chuan nuih a har thin khawp mai.

Vawikhatchu kan thianpa chuan a thiam thil chu a bula mi lehkhabu hmangin a tilang ta a. Eng emawni hi a thai nauh nauh reng a. Sister-in a rawn hmufuh ta hlauh a. A rawn pan ding nghal chat a. A thiam thil chu sisterin a hmu ang tih a hlauh vangin a bula thu lehkhabu chu a hup tang tang a. Sister lah chuan en tumin lehkhabu chu a pawt tang tang a, an inchum dawn takngial tihah chuan kan thianpa chuan a ban an la san mai chu(h)! Mipa hmanrua hi a lo inziak tuar mai chu niin… an inchum nasa teh a sin aw!

Kan thianpa kuthnu, a lemziah hnu kha lehkhabua chuang atan chuan a itawm vak lo reng a. Kan thian pakhat lehkabua ramsa lem chi hrang hrang pawh ‘a pa’ vekah a lo chhuah sak pek a! A tuartu tihngaihna hrelo chuan ramsa ho chu zan lampang a thlalak ang mai hian an taksa lo zawng chu a cheidum ta ringawt a.

Kha lem kha lemziak thiama chuan a hming a phuah lehnghal a. A hmingah ‘w-meizial’ a ti a. Ka ngaihtuah chianga awm ang pawh ka tikhawp mai. Tunhnuaah pawh mipa hmanrua hi ‘w-meizial’ ti hlirin kan sawi thin!

Annual sport leh kan pawl!

Kan thianpa lemziak thiam chu kan pawl leader a ni a. Amah kha a lianin infiam pawh a thei ve hrim hrim a. Kan pawl pawhin kan thlamuanpui khawp mai. Chutah sport kan tan a. High jump kan nei hmasa ber a. Pakhatna kan hauh pawh kan ring tlang khawp mai. An han zuang sap sap a, tam an awm tawhlo, a sang tawh tihah chuan kan thianpa chuan tullo deuh mai hian a rawn ‘inla vaitingtang’ alawm le. Nalh zetin hrui chu a rawn zuan mai pawh ni lo, a rawn inkawh khum zak mai a. A chak ber hmeichhe kutbeng thawm pawh a ring ngang mai. Amaherawhchu a tlakna lamah khan duh angin a lo dup si lova kan han inchum tak laih laih kha!

High jump-ah chuan engmah kan ni ta lo. Tunah football ve thung le. Kan han inthlang sap sap a, field chhungah chuan thiamber awm ang vek hian kan han lut a. Kan inkhel ta alawm le.. A tir lamah chuan kan khel a pangngai fu a, kan thianpa pakhatin advantage a laka, a dive derna lama a tluhnang erawh a bula awm a, thil hrechiang tan chuan buaipui aiin hmun hrana kal a, va nuih kha a finthlak zawk!

A tir lama kan khelh that tehrengnen kan khel rei tulh tulh a, kan nawi tulh tulh a. Half time hma deuh phei chuan khawvela football formation-ah chuan a la mak ber ang tihtur khawpin kan khel ta! Central Back ah mi paruk ngawt mai an awm a, chuti chung pawh chuan a la tlang tho thei zu nia! Chumi tuma midfield position a mahni chauha ka awm chu rinaiin thawl a lo awl khawp mai!

Ramsa rual awmkhawm!

Khami kuma kan class kha chu ‘inhlei’ tih thumal hian a sawifiah zo awmlo e. Mihring chetdan atana mak pui pui kha a tam ngawt mai! Kan thianpa pakhat khan kan class vai pakhat kha class pumpui hmaa a han solo tir mai thin kha chu nuih a za duh teh e. Mizo tawng pawh thiamlo kha mizo hla ngei mai a saktir tlat a. Vawikhat lam diklohah vawikhat pen a la hlawh lehnghal!

( a thui lutuk dawn tlat. Chhunzawm atan khek mai ang…)

Kan khuaah Hockey!!!

Heng mite hi khawi atanga lo kal nge? Kan khuaah hockey khel turin an lo kalkhawm alawm! Ni e, kan khuaah 'Istiri Kap' a awm dawn!

An inkhel dawn ta!

Mikhual team tha pawl leh kan khaw team an inkhel dawn a. Kan khaw teamah khan Pu Liana khan sawrkar tiangkawm a neih kha a chhuang a ni tih hriat tak leh intithei fe hian a rawn chhuahpui a. Mikhual team tantute lamin an han hmu ta ngei a le; amah a thiam hmel bawka an huphurh ru nghal hle a.

A hnu deuhah chuan kan khaw team lam chu field chhungah an tiangkawm 'mautam lo ram' a mau tha chi bul uluk taka suih tih hriat tak mai nen chuan an rawn lut ta phak phak a. An jersy erawh mahni remchan ang ang a ni thung. Mahni khuaa khel anni bawk a tantu thawm pawh bengngawngte hriat khawpin a ring a, mual a kur lo chauh a ni ber mai.

Mikhual team erawh an la rawn lang lova, an tlawm mai a nih ka ring hman a. A hnuah chuan mikhual team lam chu an tiangkawmnen an rawn lut ve leh a. Away team an ni bawk a kawr an rawn phelh thung a. Mikhual team lam tan tute pawh an thawm a ri ve ta! Chhei raw! An inkhel dawn e...<!--more-->

An thai tep tihah buaina a awm tlat mai le. Kan khaw team chuan mikhual team ho tiangkawm an han enchianga kan khaw team chuan mau bul an rawn hmang a, mikhual team chuan râw bul chhah telh tawlh, hlai tak tak an rawn hmang tlat mai le! Engtin nge ni zel dawn le?

Mikhual team kha an phakar ti ngawt dawn ila a tiangkawm awmdan turah dan an siam bawk si lo. Tihngaihna a vang ang reng fu mai! Chutah Pu Vala ngaihdan a ni ta lo! A tlanchhuaka, field sira a chempui dah chu a la lawk a. Mikhual team tiangkawm chu "a theihloh..a theihloh" tih pahin a duhna lai laiah a hlawi sak ta pawp pawp mai a. Tumahin sawisel ngam heklo, tiangkawm hman tlak alawi an nei ta lo a. An chakloh phah hial ta a.

Tactic chi hrang hrangte kha!

Kha Istiri Kàp ah khan tactic chi hrang hrang hmuhchhuah thar a va tam tak em! Khatiang tactic kha professional tak tak pawhin an la hmang kher lovanga, a entu mipui pawhin tih ve nachang an hre kher lovang! Kan khaw team motto chu 'MAWI DEUH A CHAKLOH AI CHUAN MAWI VAKLO CHAK A THA ZAWK!' tih a ni a.

Kan khaw field a phut zia kan hriat tawh kha. Kha field phut kha Pu Vala tan khan a va pawimawh em! A ball chan apiang khan a han chawk khu vaka, ball kha a ak ta daih a, ball awmna midangin hre tawh heklo, an uichuang hawi mai mai lai khan Pu Vala chuan lehlam pawl line chhungah a lut a, a chawk khu leh vak a a vaw goal ta mai thin a. Refree tan goal lova pawm chi ni heklo, mawi vak lovin kan khua kha an chak leh nge nge thin.

Pu Kapa, tlanchak leh thahrui ngah tactic kha lehlam pawl khan an hah pui thin mang e. Ball a chang a,field a chawk khu vak a, a tlan ta vak a. Lehlamin an um luih luih a, thui fe a tlanpui hnuah a ding a "saw laia saw ball a awm" tih pahin a tlanlet pui leh thin!

Pu Chungnunga inbuan chakin hun tawp dawn lam, chakloh laia ball a chan apianga "kan khaw sual huaiin ka rawn khalh e. A ngam chuan min rawn chuh ru... IN NGAL KHA A NI MAI" a han tih tawh chinah kha chuan a va vaw goal nalh thei tak aw!

Vawikhat chu kan khaw team te an la indraw a. Hun tawp dawn tepah penalty corner an hmu hlauh mai. A goal chuan final kan lut thei dawn a. Mipuiin kan bial hnai tuau tuau a, kan haw haw dur dur a. An han thai ta a le, Pu Rema chuan a thai chu a thai goal lo na a, a khuk em avangin refree khan a goal leh goal loh a hmu thei dawnlo tih hre tu kotlang team Pu Zuala chuan a ball dang ah chu goal chhungah a lo dah a, a goal leh goal loh hriatnana an dah thingphel a lo khawng ri a. Refree chuan goal-ah pawmin kan khuain final kan lut ta!

The Greatesh Show on Kan khua!

Istiri Kap final chu kan khua leh khaw thenawm chiahin an khel dawn a. Entu mipui pawh kan thahnem hle mai. Putarhoin hnang hlai tur nen an han inchhawp rup maite, pitar la her turte nen an han ni nuk mai kha chu 'THE GREATEST SHOW ON KAN KHUA' tih loh chi a ni nang!

Chutah player te field chhungah an han lut a. An han thai ta.. thawm a tha ham ham khawp mai. An tangdun ve ve bawk a, an inchuh tak tak mai chu a khu lutuk kha an inchuh ber ball a awm tawhloh pawn an la thai khu chum chum zel!

Goal inpe lovin a innawr tawn zak zak a. Hun a tawp tep tihah chuan Pu Chhawna te thian pali chuan ro eng emaw relin a ding khawm ta thap mai. Eng tak rel ang maw?

Chutah le, Pu zama chuan ball a chang a. A khalh phei ta.. khalh tlang a tum em ni? Aw, Pu Chhawna a pass ta! Pu Chhawna khuan engtin nge a tih dawn? Rinkual chhunga Pu Ruma leh Pu Ngaia chiah an awm si! Chutah le, Pu Ruma chu a han pass a, a vuak dawn veleh chuan goalie bula awm Pu Ngaia chuan goalie ngal chu a lo hem pawp mai a! A tlu vial nghal tawp a. Refree in hmu thei heklo Pu Ruma ball vuak man tu tur ber lah a lo vial tawp tawp tawh si... a vaw goal ta! Hun a tawp zui nghal a. Thawm a va tha ham ham em!

Tichuan Istiri Kap ah chuan kan khua chu MAWI VAK LOVA CHAKIN Istiri chu kan hawn thei ta a!