Chhingkhual lenmawii

Nipui a ni a, khua chu a lum kher mai. Kan thianho chuan zinkawng zawhin bike in kan tum ram chu kan pan a. Khawlum uap churh mai leh ni sa vawl vawl mai chu tawrh a hrehawm duh khawp mai. Thli thaw te pawh a lum vek hialin ka hria.

Kan tlan zela. Thui fe kan tlan hnu chu kawng bul lawkah chuan lui nawm hmel deuh mai a lo awm a. Kan han dinga, chu luiah chuan kan han inphih harh a. Khawlum laia lui tui dai nuam taka inchiah chu a nuam duh ngei mai. Kan eitur ken te chu eiin kan chawl a. Theih chu nise kha lui kha phurh tel ve mai a chakawm khawp mai. Lum tih deuhin inchiah leh zawk thin ila zinkawng chu a hrehawm lohvang mawle…

Chutia kan han inphih harh lai vel chuan chhungkaw pakhat kan kalna lam tur atanga rawn kal hi an rawn thleng a. Anni pawh chuan chu lui chuan a lo hip ve aniang, an dinga, an rawn chhuk ve a. A hnung atanga rawn chhuak nula chu hmuh thianglo ang mai a ni, a hmeltha kher mai. A vun lah a no nalhin a var em em mai a, silhloh pawn a eitlak hialin ka ring. A hmaifang lah chu hmelthatna zawng zawng nei tura khuavang siamluih ni duhawm tak a ni. A sam lah chu Rimenhawii sam aipawn a nalh loh ka ring miah lo! A..hmelthatna leh duhawmna zawng zawng nei tura he leilung siam bik hi a ni ber ang. Chu chuan kan awmna lam a rawn pan nia! Mumang pawh a ang rum rum alawm le.

Chu luiah chuan an chhungkua pawh chu an han inphih harh a. Nuam an tihhmel khawp mai. Sir khatah keini ho chu kan lo thu khawm tal a. Chu hmeltha-i chuan a rawn en zawk a. A mitmeng a va mawi em! A vawikhat melh zauh pawh khan khawlum a dai sawng sawngin ka hria. Mahse, a hming leh veng erawh kan hre tlat lo.. Chhingkhual lenmawii tih chauh lo chu!

Rei vaklo an awm hnu chuan kal turin an insiam a. Motor-ah chuan an lut leh ta a. Keimahah danglamna a awm ta tlat mai! Ka vawikhat hmuhnaah ka vei titih ringawt mai ni mawle. An kal dawn..aw, an motor khi a ke thep vek se aw..siam ila, han inhmelhriat ila ka va chak em! An liam dawn.. lo hawi leh lawk teh..mawh..ka lo bye bye tal teh ang che.. aw, an liam ta!

Khawiah nge maw a kal dawn le? Khatiang khawpa hmeltha kha mizo thlahah hian an lo awm thei a ni maw? Aw..thil ka hrechhuak ta..mahse a tlai tawh lutuk. An awmlai khan lo va biak tur a ni aw. Mahse, tunah chuan a tlai tawh si. Lo va a chanchin vel chu ka hre teuh awm si a. An kal tur te han thlahin han bye bye ila, nui sen sen chungin min han chhanglet ve awm si a!

Ni e, tunah chuan an tlan liam daih tawh. Hmuh tur a awm tawh lo. Tlai khawhnua ka thil ngaihtuah chhuah pawh a hunlaia ka hman loh avangin awmzia a awm tawh lo. A pawi ta ber chu a awmlaia a hmelthatnain min zem nasa lutuk kha a ni.

Keini pawh chu kan kal veleh ta a. Ni chu la sain, khua pawh la lum uap churh mah se kei ka ngaihtuahna erawhin ni a sa a ti lova, khua pawh lum a ti hek lo! Ni e, ka ngaihtuahna chu kha hmeltha-i te car chhungah khan a awm daih alawm!

Ka pi tan....

A khuhhawnna

Keichuan he khawvelah hian “Pi” tia koh tur dik tak ka nei tawh lo. Thianten an pi te an koh te hian ka pi kha ka ngai thin. Tunah chuan he khawvel hi chhuahsanin a chatuan hmun a pan tawh a. A damlai khan engmah tihsak theih ka neilo nachungin min hmangaih zia ka hre reng thin. A damloh lai ber pawha min ngai em em thin te khan min hmangaih zia a va tichiang em. Pi, ka ngai che! Tunah chuan Pi dik tak ka nei tawhlo a sin..i tupa hi min khawngaih lo em ni?

Zing dar 4 bawr vel a ni a, ka pi chu a natna avangin a muhil theilo thoin tukverh a hawng a, he hla hi a sa a sin

He dam chhung buaithlak takah hian,

Ka phunnawi lo, phurrit mah se;

Ka hmaah chawlhna a awma,

Luipui mawi tak piah lamah chuan.

Ni e, pi, i natna khan a tibuai chein mutmu pawh tuah thei lova tlaivar kha i ngah thin reng a ni. Mahnia tuar tlawk tlawkin chhungte tihharh hlau takin choka lamah te i phei a, kha i na kha inhneh tir i duhlo a. Mahse, mutheilo khan a va siam hnem che em. Khatia hrehawm taka i nun i hman pawh khan phunnawi lovin kha i ritphurh khan lei piahlam thlen hunah a tibuai tawh dawn lo che a i hriat avang khan van kawtthler hmun kha i thlir tlatte kha a ropui ka ti a sin.

Thlipuiin min nuai vel mah se,

Hlauhawmten min tibuai bawk se;

Chung thilte chu ka pel thuai ang,

Luipui mawi tak ka kai hunah.

Khang i han sak ka ngaihtuah leh hian kha i natnain a tihbuai nasat dan che kha ka hre thar thin. Ni e, he khawvel hi chu buaina, manganna leh lungngaihna mai a nia. Kan hlim ber laipawhin lungngaihna chirhdup chuan min hual reng thin. Kha khawvel nun khan lei piahlamah a rawn zui dawn lo che tih hriain i pel thuai anga, lawng chawlhna tlang thianghlima i kal hun kha i nghakhlel a ni tiraw?

Ka hmabak chu ka hlen hunin,

Chawlhna hmun tiam chu ka chang ang;

Krista hnena cheng reng turin,

Luipui mawi tak piah lamah chuan.

Pi, he khawvela i zinkawng kha a bum boh hle a, hah takin, mangan leh lungngaihna chhum zingah i kal a. Mahse i zawh tawp huna i chawlhna tur hmun Ralmuanna tlang, nat leh hrehawm tur tawh lo tura Beramno nunnema kianga cheng turin i inpeih tawh hle tih a tilang a sin. Chatuana Beramno fak tura luipui mawi tak piah lama hmun i thlir khan i na khan a kalsan lo che a, mahse, Inkhawmpui tiak tawh ngai lohna hmunah a rawn zui tawh dawn lo che tih chu i chiang a ni tiraw?

Chu luipui mawi tak piahah chuan,

Chhandamtu’n lawmah min nghak e;

Ama hnena cheng reng turin,

Khawvel buaina tuar tawh lovin.

Ni e, pi, kan la ngai chein kan la thlahlel che tih chu i hria alawm. Mahse, i natnain a tihhrehawm che avang khan Lawng chawlhna tlang thianghlim kha i thlir a, chu hmun nat leh hrehawm tuar tawh lohna hmun chu i natna khan a ngaihzual tir che tih erawh kan hai lo.

Ni e, tunah chuan kan hnenah i awm tawh lova, kan rilruah chuan ila awm reng a sin. Ama hnena cheng reng turin, khawvel buai nat leh hrehawmna hmun i chhuahsan tawh si a.

Ni chu tla rawh se....

A khuhhawnna
Ni chu kawlah a herliam tep tawh a. Nungcha tinrengte chuan zan hun an hmanna tur zawngin an hmanhlel hle tawh a. Mihring zi nuai nuai mai pawh chu hmanhmawh takin an in lam panin ni tlak hma, thimin a tuam hma ngeia inlum thleng hman turin a an kal dawr dawr a. Hnathawk an bang a, mipui khawlaia awm an vang tan a… ni chu a tla ta! Thimin khawvel a rawn tuam ta a..
Thim zingah thuin..
Thim hi chu a nelawmloh a ni. Khua a han thim dek dek tawh hi chuan ka thauah a man titih tlat thin nia mawle. Chhuna ka tihngam reng kha thim hnuaia a han awmchiah chuan ka ti tlat tawh thin.
He thim hi mihring tan chuan hahdamna hun tha tak chu a ni tehmeuh mai. Mahse, rilru hahnain a tuam, lungngaihna chhirhdupa tang tan erawh hahdam a hnekin manganna belhchahtu mai a ni zawk si a. Chhun khaw eng hnuaia an rilru tihahtu em em kha vei zuiin muttheihloh phah nan an hmanga, an taksain a tuar phah thin.

I hringnunah ni a tla maw?
Han inen teh ang u le. Humsual daiin, kan rahna a phet a, kan lawmna chu lungngaihnain min tlakbuakin hlimna chu mittuiin a rawn zui fo a nih hi. Hmangaih tak i neia, in inhmangaih a maw i tihlaiin a rinawmlohna i hre ta a. Chutah chiah chuan lungngaihna chhumin rawn zin hnan chein, ni eng hmu lo turin a sim thin che a nih kha.
Ni e, thenkhat chu an nun phet laklawk tawhna chu hmanruaa hmangin an nun chu thimin a rawn bawh tan a. Chu thim chuan an rilrua hnathawkin eng hawisanin thim lam an hawi tlata. Manganna vawrtawp lo thleng chu hmachhawn ngam lovin an nun hloh ta tam tak an awm. Beiseina nei thei tawh lova thimin a tuam tak tak tawh hi chuan hmachhawn ai chuan vak vakin tluk hun an nghak mai thin. Chutia an tluk tawh chu tho leh thei lovin an tlu hlen tlangpui thin.
Ngaihtuah teh..
He hringnun hi ngaihtuah teh le. Manganna leh lungngaihnate tawk lovin hlim reng ta ila dam hlutna i hria angem? Thih duh hial khawpa rilru mangan chang i nei thin maw? A nih lungkham nei lovin awm reng ta la, he hringnun hlutna hi i man thiam dawn em ni?
Ni hi tla lovin eng reng ta sela he thim hlutna, hahdamna leh rilru sawrbingna hun hi a awm dawn lo tihna a nia. Nun a hman nawm theih a rinawmloh a ni tiro. Chuvangin thim hnuaia i awm ve zeuh khan beidawng lutuk duh suh, a eng zawngin thil thlir rawh.
Ni chu tla rawh se..
I nun atang chuan ni tlain, vawi tam tak thimin a tuam tawh che pawh a ni thei e. A changchuan dam duhlo khawpin lungngaih chang i nei ngei ang. He hringnun kalphung hi a ni tlat si a. Hmangaihtu leh lainattu nei tawh lo khawpa inngaiin i nunah chuan ni pawh a lo tla ve tawh pawh a ni thei. Tunah pawh a tla mekin, nakin lawkah pawh a tla maithei. Chutianga ni a tlak chuan hei hi hrereng ang che- NI A TLAKIN A LO CHHUAK LEH THIN tih te mai hi!

Mizoram hmasawnna kalpui dan khi tha tawk inti maw?

( He thu hi debate naa ka sawi a ni a, inthlahrungtakin ka rawn dah a ni. he thu ka rawn dah chhan chu he thu atang hian kan ramin insiamthatna tur a neih chuan insiamtha turin ka duh em a ni. mahni intih engemaw tum vanga dah ka ni lo tih ka thiante hian min lo hriatsak hram dawn nia. Tin, he thuah hian mithiam/thuthiam tawngkam tam tak ka la tel bawk e)

Khuangchera hlauh neilo, Vanapa tlawmngai leh zaidam, Ropuiliani nu ropui a ram tana martar thlahte ram Mizoram khian hma kan sawn dan khi a tha tawk kan ti maw? I han bihchiang teh ang ule..

A hmasain in leh lo lama hma kan sawm dan that tawklohzia ngaihtuah ho ta ila. Van a khar khup thei awm mange tia sangin bilat leichar hmangin kan sa a. hmanlai nena tehkhin chuan hma kan sawn tehmeuh mai. Amaherawchu kan insakdan hlauhawmzia khi chu kan hre vek awm e. Missionary nuaikhat tirhchhuah tum ram hian mi nuaikhat pulh phuk theihna mangkhawng kan nghahzia khi inchhut ngai em? Kan hmasawn dan chu tha kan la ti cheu ang maw? Keichu ka hai e.

Rambuailai nen kha chuan tehkhin lul lo teh u..a siamthatna turin pawisa min pek hnem zia kha. Khatiang pawisa pawh hmang thiamlo Mizo hnam nih hi a zahthlak..tehkhin lul lo teh ang u. Kha pawisa kha hmangthiam ila chuan tunah chuan kan hmasawnna chuan Babel in sang a chen dawn mai ang.

Chutiang kara cheng Mizoram mihring nunphung khi en teh ang u. Khawvel incheina a inthlak rualin kan incheina pawh a inthlak ve ta zel a, hmasawnna pakhat chu a ni.. Kan incheinate khi en ila, kan hmeichhiaten vawkin kawmthlang feren an ang maiin an meng dur ham a, chhura hlauh tham fe khawpa senin an hmui an hnawih a nih khi. Tribal vun an pholan tak taka, kan mipaten bawihchhuak ho thawmhnaw ang kan hak tak vak chinah chuan Mizo nih kan zahpui tan a, balu chunga uibawk ang main kan ram kan pelh hlat telh telh leh kan Mizo nihna a dal tial tial a nih tak khi. Keizawng chawmhlawm state mipuite incheidana hma kan sawn leh lutuk khi chu mahni inchawmzo state zahna ka nei tlat a sin.

Chu kan incheina changkang chuan tuipuiral hnam ngaihsanna min neihtira, an tih ang tih ve tumin he chawmhlawm state hi a lo buai ve ta.. kan changkan tum luatah kan zai neih that ber ber chu hnamdang tihdan lachhawngin kan suk pui nghawng nghawng a nih kha. Khang kan hnam thil dahlau ta zel kha hmasawnna tha tawkah kan ngai ang maw? Kan hnam thil a dahlau ai chuan tuipural hnam ngaihsanloh ka thlang e.

Chutiang nunphung siamtha tura kan beisei, ram hruaitu thaa kan ngaih, ram hmangaihtu tak tak nia kan ngaihte chuan ram hruaiturin kan han thlang chhuaka. Kan michak khan rangva aiah papawr a lo ei ang tih ang deuhin Reiloteah thlam thianghlimna min tihchhiatsaka, ram hmasawnna tur chu an chenna in leh thlam tih ropuinan an hmang ta si. Ram thatna leh hausakna tur chu an pumpui puarnan min hmansak a. eirukna te a lo hluar ta. Hengte hi Khuangchera thlahte hmasawnnan chuan a tha tawk kan ti ang maw? Ka tel ve lo mai ang e…

Chung kan ram siamtha tura ram tana thawktute chuan siamthat a hnekin ram an ei da mek a nih khi. Khingte khi mak ka ti a,simikhu aia a mak tih lehna chuang ka nei tlat lo. Dan hmangin ro chu an rel..amaherawhchu chu an dan hman chuan mirethei chungah chiah hna a thawk thei a, milian chungah erawh engmah a ni si lo. Hmeithei funte zuar tan tira, ram hmasawnna tur mahni sahmim ipte tih puar nana lo hmangte man theilo tawk vel lekin hma kan sawn a ni mai lo maw? Hetianga mirethei leh hauhsa dan hmaa inthlau ta lutukte khi hmasawnna tha tawk kan ti ang maw? Zahmawh an sawi ngai love!!

Chutiang mite hnuaiah chuan kan kawngte khian thatlam a pan theilo a nih khi. Kawngpui chu ahming chuan a ni ve,mahse fur khat daih tawk vel lek a ni hlawm. Hma chu kan sawn the e..fur khat daih tawk tura Lal Isua zuitute’n kawng kan siamthiam khi khawvelah kan ram ka chhuan ve na a ni a, thang kan chhuah ve na pawh a ni awm e.. Kawng thenkhat han tlan ila kan chhuk chiah chu laih chhuah hlim ni awm takin vaivutin min zial tup tup thin a nih hi. Hei ai chuan hmasawn leh deuh ila chu ka ti khawp mai.
Zirna lam in hawi daih teh ang.

Zirna lam I han hawi leh teh ang. India ramah ziak leh chhiar thiam tam lamah chuan kan sang hle a, amaherawhchu kan thiam ziktluak lo tih erawh kan hre thei ang. LEHKHATHIAM HNA HMULO PAWL kan din tlat si a. engvang nge ni ang? Nge hna hmulo tur tawkin kan thiam zawk? Nge thawhtur a awm lo? Thawhtur awmlo se vai ho hian kan ramah engnge an tih ang? A thatchhe tawk lekin thiamna lamah kan sang a ni zawk lo maw?

Thenkhat erawh thiam sang tak tak an awm a, mizo min ti hmingtha khawp mai. Hmasawnnachu a ni. A pumpuia lak erawh chuan hnam tawng thiam lo tawk lekin kan zirsang a ang khawp mai. Ka hmaa thu rawn sawi leh, ka hnua rawn sawizel turte pawh hian kan duhlian tawn diklovin an rawn sawi nasa ngawt ang. Hei hian a entir chu kan hnam tawng aia hnamdang tawng kan ngaihsan vangin kan hnam tawng a chhe hle tawh tih a entir daih a sin. Chutianga mahni hnam tawng pawh thiam tha thumloa “zirna lama hma kan sawn e” kan ti ve ngawt hi chu tu pa zukhawn changlo titi tawk vel lekah keichuan ka ngai e.

Hmanlaia kumkhat eitur thawka rim taka kawla nichhuak chhiara thawk thinte thlah khan tunah chuan thawhchhuah aia sawichhuah awlsam zia kan hre tawh a. “sem sem dam dam, ei bil thi thi” tih changthlan a hmang thin thlahte ngei chuan petu nih aiin dawngtu nih kan duh tawh zawka. Mahni intodelh tumtute thlah kal zelte chuan silchar kawngah kan hrawkhrui kan nghat tawh a nih hi. Chawmhlawm state nih zahthlak zia hre lovin kan chapo a, hnamdang kan hmusit thin maw?? Ngaihtuah a ngai e..

Hma chu sawn ang u. amaherawhchu a khingbai chuah hian hma I sawn lo ang u. hmasawnna man phak lovin man luih kan tum hian kan chhiatphah thin a ni. Pa pakhat ram vak pawh kan ang khawp mai,’ka ramvahnaah ngau chhehrawp chunga thu a mei lo uaithla ka hmu a, ka pawt ringawt a , min tlanpui tak tak mai chu chhehrawp chung ka tawng pawng zawk zawk’ a tih ang deuhin hmasawn theihna tur kan hmua, keimahni inenchiang hmasa lovin kan han man ve ringawta, hmasawnna mumal tak nei lovin kan tem ve vuai vuai a, keimahniin kan tuar phah thin a nih hi.

Nakinah chuan mihring tam luat avangin kan tlangpang hringdup hmunah te khian in a la ding khat mup anga, vanlaizawla D’ chhaia mu leng a bo zo tawh ang. Chu hun chu kan thlahten an la tuar dawn. Chutih hunah chuan keini kawlphetha pawh duhtawk hman tur neilo chunga Switzerland of the east a siamtum.. siam zawh hmaa cheng nuai khat duhzawktute hunlaia cheng, thhirchhia bak thawnchhuah la neilote hian tuna kan ram hmasawn dan hi tha tawk kan tih mai chuan kan tu leh fate, kan thlahte hian kan thlan chungah anchhia min la lawh mai ang tih pawh hi ka hlauhlel love!!

Sam ang ka then hnu....

Hmanni chu kan school hlui ka tlawh leh a. A hmunhma chu kan luhlaia mi nen danglamna a awm tamlo khawp mai. Mahse, a mihringa te erawh kan lo danglamin kan awm darh tawh hle a ni tih erawh a chiang ngang mai.

Ka han fang vel a, thing pakhat a kawt zawla lo ding, lian tha tak, amaherawhchu hnah pakhatmah nei miah lo chuan ka ngaihtuahna chu kan luhlai hunah min let tir leh a.

Ni e, kha thing kha! A hnah awmlai khan a hnuai kha a hlim nuam em em a. Khatah khan ka khawvel hmeichhe duh em em nen khan inhaw lo takin kan thua, kan thiante infiam thlirin kan awm thin a. Kan inkawma, rinawmna thu tiamin kha thing khan min hriatpui thin a ni. Chu thing chu kan pahnih tan kha chuan thingkung satliah a ni lova, kan thiantha ber, thuruk engkim min hriatpuitu.. kan ‘puarak’ a ni.

Tiamthu sut hmang mi u..

Khatih hunlai kha ka ngaihtuah let thin. Kan induh tawn em em a, kan inkarah engmah a tla zep theilo a ni ber mai. Nikhat lek pawh inbe lovin kan awmthei lova, class pawh kan kal that phaha, kan kal theilo a nih chuan phone hmangin kan inbe hram hram thin. Phone bill pawh a hek thei ngei mai.

Khatiang khawp khan kan inthlahlelin kan inngai a ni tih min hriatpui duh miah lo niawm takin ni vawi tam a lo chhuakin a tla leh thin a. Chu chuan kumtawp min hruai thleng ta reng mai. Kumtawp exam zawh chuan tha tak chuan kan pass ve ve a. Mahse..mahse a awm tlat mai! Kan luhna a inang thei tawh dawn lo! Hmun hranah kan awm a ngai tlat mai. Hreh hle mah ila he leilung rorel dan a nih avangin kan dang thei si lo! Rinawm reng tura intiam chungin kan zirna tur hmun kan pan ta a.

Rei tak kan inbe zui a. Mahse a hnu deuhah a reh telh telh a, nikhat chu sawiloh kar khat dawn te inbiakloh kan nei tan ta a. Kan awmdan chu hriatthiam a harin tawrh a hrehawm duh khawp mai.

Zankhat chu min rawn phone a, ka han la chu ka duhloh leh ka lo ngaihtuah ngai miahloh ngaihzawng dang a neih thu leh inthen a duh thu min rawh hrilh a. Ni e, keichu mirethei fa ka nih vangin atan chuan mi hausa kha chu thlan a chakawm zawk em a ni. Ka duhthu vang reng ni lovin inthen a ngai ta si! Ka hmangaih em em leh ka nupui atana ka duh em em chuan min then ta!

Ka ngaizual thin!

Kum tam a liam ta. Kan thutdun thinna hmun ngei kan tlawh chu lunglen a kaitho tha kher mai. Tunah chuan engtinnge ka hmangaih kha a awm ang? Chhangchhenu a ni tawh ang nge nula hmeltha leh duhawmnain a tuam hlawm a la ni zawk? Chuta chiang ber chu engmah a chianglo tih chiah a ni!

Siahthing hnahnem par tilin lo uai e,

Sam ang ka then hnu ngaihlai tizualin,

Theihchang ve se aw, zamual liam tawh hnu,

A sulhnu chhui reng ka nuam ngei e..

Ni e, thing chu thlasikah a hnah te chu lo tlain a lo uai thin a ni. He hmangaihna pawh hi a hmangaiha khan a hmangaihtu hmangaih anga a hmangaih ve loh chuan hmangaihna a dawn kha theihnghilhin a hmangaihtu rilru tinatu mai a ni ta thin a. Chutiang a taka hretu leh tuartu tan chuan kha ka hmangaih em em kha then tawh mah ila a sulhnu han hmuha, nunhlui han ngaihtuah kir chang chuan hun hi kal thei lova kan hlimlai huna tawp reng atan a itawm thin. Mahse, chu thil chu khuarelin a remti si lo. Kan sulhnu chiah chu ka chantawk a ni ta si!

Sam ang ka then hnu, ngaihni bang lo!

Tlangtin bawm romei a zam kai chiai e,

Tlaitla lenkawl eng a sen riai e..

Kei ka tan chuanin lunglen a na e,

Sam ang ka then hnu ngaihni bang lo.

Tunlai nula leh tlangvalin hmangaihna an tih hi eng hmangaihna nge ni ngai le? Hmangaihna tak takah chuan engtikah mah theihnghilh ni a awm ngailo a, theihnghilh a hnekin a zual telh telh si. Tlang lehlam romeiin a bawh pawt chiai leh tlai ni tla mai tawh turin kawl bul mawi taka a han chhun sen phut te hian kha ka hmangaih em em kha min hriatchhuah tir a, pangpar mawi tak ka hmuh te hian ka hmangaih hmel nen khan ka tehkhin thin. Nui ri mawi tak ka hriatte hian ka hmangaih nui ri min hriatchhuah tir thin a. Engkim mai hian min hriatchhuah tir hi a ni ber mai. Ni e, sam ang ka then hnu ka hmangaih kha ngaihni reng hi a bang dawn lo a ni e..

Kan hna thil avangin kei leh ka thian pathum nen lo zirchiang turin khawdangah kan kal a. Hna thil vanga zin kan nih avangin leh thiltihna reng renga ka hming a lan tawh chuan ka theihna zawng zawnga thawk mi; a tha thei ang bera tih duh tlat mi ka nih avangin han len khawthawn hun a awmlo khawp mai.

Tlaikhat chu kan tihtur chin kan zawh hma avangin len ka rawt a. Kan lirthei ken chuan khua chu kan fangkual vel a. Ka rinloh deuh maiin ka lehkha zir pui thin, ka thian pakhat hi chu khuaah chuan hnathawkin a lo awm hlauh chu niin! Kan inhmu chu mak kan tidun ngei mai.

Ka thianpa chuan amahin in a lo luah a. Kan thianho chu thleng turin min sawm a. Inthlahrunna em em pawh nei lem lovin kan han fin ve ta rawih mai a.

Ka thianpa in thlangah chuan dawr a awm a; chu dawrah chuan chakkhai vel kan lam thin a. Tlaikhat meizial lei tuma dawra ka thianpanen kan zuk kal chu angel hawlthlak emaw tih mai theihtur khawpa duhawm hian thil a lo lei ve a. A chhuak leh lam chu ka en zui nasa khawp mai.

Khatia ka thlir zui vawng vawng kha ka thianpa chuan min lo hmu chu niin.. amah chu a hriatthu leh a u nupui nen an thawhho thu min hrilh a. Chuta ka sawi zawm hmasak ber chu “Rim tur” tih a ni.

Kan thil lei haw pawh chuan ka ngaihtuah zui nasa hle a. Ka thianpa chuan a u nupui chu bia in zana kan len tum thute a han hrilh a; a len theih dawn a ni tih ka chian hnua a nuam ka tihzia kha aw.. Zan lama lenna tur tha tak neih chuan tlai rei zia pawh ka hrechhuak chiang khawp mai.

Zanriah kan eikhama, kan han thut khawmuan hnu chuan ka thianpa nen chuan kan insiama, lirthei chuan kan pahnih chauh chuan kan chhuak ta a.

Kalkawngah chuan ngaihtuahna a kal thui duh khawp mai. Inleng dang an lo awm angem? A nih loh pawn ngaihzawng neilai a ni zawk ang a? Nge ni anga, sava thlawk lai zawk?(tunlai tawng takin). Chuta chiang ber chu engmah a chianglo tih chauh a ni.

Ka ngaihtuah mek lai chuan ka thianpa chuan ding turin min ti a. Ka lirthei ken chu ka hung rem a. Dawrah eitur te kan lei hnuin step-ah thuilote kan chhuk a; in pakhatah chuan kan lut ta!

Chu inah chuan nu valai tak pakhat hian chokaah thil a lo ziak a, chu chu ka thianpa thawhpuinu chu a lo ni a. Inkawmna pindanah kan lut a.. Tah chuan CHUANKITE KAU ANG SEIH a hmeltha chu a lo awm a. Ka thianpa chuan biain min inhmelhriattir a.

Eitur te chu eiin hlimtakin kan inkawm a. Zan a lo rei tan tih chuan haw turin kan tho a, Kawngka thleng min thlah a leng fo tura min sawm hnuin kan inmangtha ta a.

Chutia kan inhmelhriat hnuah chuan zan lamah ka leng ta tlut tlut mai a. Vawkchaw bel so vil ang vut vut a ka awm tak hnuah chuan kan inkarah chuan thian mai nilovin induh tawnna a lo piang ta a. Kan inngaizawng chu a lo ni ta reng mai!

Ngaihzawng lama tawnhriat kan la neih duh loh avangin mi inngaizawng ai hian kan inngaizawng bik emaw tihtur khawpin kan inzui nasaa, khuaah pawh chuan kan thang chak khawp mai. Mahse, pawi tihna erawh kan nei lova, pawi tih ahnekin kan inzui nasat phah hial zawk a.

Chutianga kan inzui nasat viau lai chuan hun pawh a lo kal chak hle a. Chu khuaa thla 5 tehmeuh kan awmhnu chuan kan hna pawh chu a lo zo dawn ta reng mai.

Ka haw dawn zana ka va leng chu kan lungngai dun khawp mai. Kan thil tawn tur chu kan tuar nasa dawn tih a lang si. Mahse, hunin a thlenpui dawn a..kan dang thei si lo. Rinawm reng tura intiam chungin kan inmangtha ta a.

Kan hnathawhna dik taka ka kir leh chuan lung a leng duh em em a. Nitin kan inbiaa, kan inngaih thu kan inhrilh bang theilo. Rei tak tak kan inbiaa, sawitur kan ngah thei khawp mai. Chutianga kan inbiak chuan lunglen pawh a hnem ve deuh hialin ka hria.

Hun a ral zel a, nikhat chu ka thianpa khan min rawn phone a, ka ngaihzawng nena kan la inbiak leh biakloh min zawt a. Kan inbe zeuh zeuh tih ka hrilh hnuah chuan ka thianpa chuan tlangval pakhatnen an inzui nasat thu min hrilh a. Awih a har duh khawp mai. Mahse, thudik nia ka rin tlat avangin ka zawt chiang ta a.

A tirah chuan pha nasa viau mah se a intawng awk ta tlat mai. Ka thinrim chuan insum zo lovin inthen ka rawt a. Ngaihdam min dil nasa hle mah se ka ngaihdam duh tlat loh avangin chumi ni atang chuan kan inbe ngai tawhlo a.

Kum thum vel a liam hnuah nikhat chu ka thianpa hnathawhna khuaah chuan hna ka neih leh vangin ka zin leh a. Nunhlui ngaih a na duh khawp mai.

Kan office ah hna ka tih fel zawh hnuah, tukverah ka dak a. Chhun vanglai Ni a sa hle mai. Kan kawmthlang Biak Inah chuan innei an awm a. Thlalak hun a nih chuan an chiar nak nak a. Kan office nen a inhnaih em avangin “tute nge niang aw?” tia ka hawk dak zuk en chu ka mit sulh a, ka vai rum rumin ka hre hial a. Ni e, mo khu ka hria alawm.. Ka hmangaih em em, atan ka rinawm rengna; mahse, ka hmangaihna hnawla min rinawmloh san ta PHATSANTU TENAWM kha a ni.

Vawiin chungturni thangvanzawla a her laii,

Hmana ka D’ siang lawi ka hmu.

Hmana ka D’ siang a lawi e, tleidang run belin,

“Mo thar” tiin an sawi.

D’ hlui tleidang siang i lawi ta maw?

- Lawi ka hmu (vulmawi)

Chepahakhata thawnthu atangin....

Chepahakhata hi tunge a pa a nih a, tunge a pu.. Israel thlah a nih leh nih loh lam te. A hmel eng ang nge a nih a, a vun rawng eng ang nge a nih lam ka chhui ve lova. Ka hriat zawng chu a nupuiin Lalah a siam tih mai a ni.
Lal a nih hma chuan a awm nuamsa vaklo niin a rintheih a. Lal a nih hnua a khawsak dan en khan mitha fa erawh a ni kher lovang. A leng a haw lawk theihloh avangin vakvai turin a nupui leh a fanu chuan an tlanbo san a nih kha. Nawmchen duh luat vang hian a lo tlakchhiat theih hle tih min zirtir ni berin a lang.
He kan nun theuh hi i bihchiang teh ang u. Tlemin kan khawsak a lo ziaawm a, hah lutuk lova kan lo awmtheih chiah hian thenkhat chuan nuamchenin an hun an hmang tan thin. He thil hi thil pawi tak a va ni tehlul em. Talent khat dawngtu anga tihpun tum lova kan thil neih kan dah chiah hian a ni kan retheihna a intan thin ni!

Tunlai kan ram hi han en teh ang u. Thawhrimna atanga hausakna hi lo awm a ni tih hre lo kan tamin in hre ve thin em? Fate duh dan dana herkual theih nu leh pa kan tam dan te hi kan khawlai nun atang hian kawng tam takin a hriattheih a ni. Hetianga kan awm reng chuan lungngaihna ruam kan thleng thuai dawn e.
Vahvaihna ruam atangin..
Khatia nuamchen ringawta chepahakhata a awmlaia a nupui leh a fanuin an tlanbosan atang khan a thil neih chu vawmbo ang duak a ni a. Ani pawh vakvai a lo ni ta.
Chutia vakvaia a awm chu a fanu chuan khawngaihin ‘Belte phai theilo’ a pe a nih kha. A vahvaihna ruam atanga chhuah theihna turin malsawmna a dawng ta..
Nangmah han inngaihtuah teh le. Mangang leh lungngaiin, lungngaihna chirhdupah tangin i inhria a maw? Engtikah mah hlim thei tawhlo turah i inngai a ni maithei. Mahse, thinghnah chu thalah a tlakawlh a, nipuiah zik a rawn chhuah leh thin. I nuna harsatna leh manganna awm kha i tuarchhuah theihna turin i rilruah khan Pathianin englai maha chhe ve theilo ‘TUMRUHNA’ a dah reng a sin.
Tuarna pawh hlawkna..
Chepahakhata chuan a Belte hmang chuan a rahbi tleuh tawh chu siamthain a nun chuan ngai a awh leh tan ta a. Hma lam panin lungngaihna ruam atangin a chhuak ta.
A vah velnaah hawtu a neih avangin thingkungah zeh a ni a. A tawrhna chu hrehawm hle mah se amah mai ni lo, midang tana hlawkna a ni hial a. Vakul nupa titi a tanin atanga a ngaihthlak avangin mizoten vaiho lakah fing zawk nih kan hlawh phah ta a ni.
Nangpawh eng emaw harsatna lian takin a tlakbuak che a ni thei e. I tawrh kha i nunah hnual rawihna tur khawpin i nun a khawih a ni maithei e. Mahse, ngaihtuah chiang teh.Kha i tawrhna ata kha midang thleng pawha hlawkna ni thei turin a eng lam thlir la. I tan mai ni lo, midang tan pawha kawng pawimawh tak sial tu i ni thei dawn a ni.