Pan lai nun ka ngai zual thin..

Vawikhat tal nunhluiah hian let leh thei tehreng ila aw!

Kan naupan ve lai kha tunhnu hian ka ngaihtuah chhuak thin. Sikul kan han bang a, inah kan han hawng a. Chhungten min au ang tih hlau fahranin ipte kan dah zawk a, a lut lam aimaha chakin kan han lim chhuak leh puat a; hla fe kan thlen hnuah a ralmuang ta maw tihin kan han tlan zawi deuh a. Thaw hlawp hlawp chungin thiante kan va fin a. Tunah chuan kan zalen ta!

Kan han inhmukhawm a, a changleh tuichengin kan kal a, a chang leh tlangsam hmunah a hmaa kan bawh-en bak zawng chu ralte vahai no la aimaha bengchheng tur khawpin kan han bawh leh a. Tifuh loh changa hmawlh zum velin kan dul velte a chhun rin riai pawh khan kan tap ngai lo. Ni e, tunlai naupang han tahna awma tah kha chu pa lohnaah ngaiin kan insum hram hram a, kha khan tawrhchhelna pawh a lo zirtir ve reng zu nia!

Sephung kan han lai a, kan han insiktir thin laite kha aw.. “Mihring ek ami a huai duh” tiin mihring ek vung tharlam zawngin tlai hun hmanliam changte kha a awm thin. Kan han hmu ve a, midang kan ngam zawngte khan an lo hauh ve ngei a. Vau pahin engtin tin emaw kan han chhuhsak thei hram a. Ngamloh kan tawn chang erawh kha chuan hreh tak chunga kalsan a ngai si..

Kawlbulah ni chu suk chen vel a la awm a. Inah haw a han ngai tlat thin te kha aw.. A chakawm loh thin mang e. A changchuan nu leh pa phallohin kan lengchhuak kha a ni thin si a. Min lo hmuaktu tur kan chiang thin si. Tunlai naupang anga in atanga chhuah thinrim nachang kan la hre ve si lo. Tlai lamah hlim viau mah ila, haw dawn hnaiah kha chuan “ka lo leng ta kher kher kha aw..” tih rum rum chang kan nei thin. Sim erawh a har thung.

Zanriah eikhamah pawnto turin kan han chhuak khawm leh thin te kha a va nuam thin em. Tunlai thangthar chuan pawnto awmzia pawh an hre tawh mang lo emaw a ni anga. Keizawng, heng pawnto hlate hian ka lung a tileng thin.

Kan pawnto zo tur aia ute’n min han sawithaih a. Hlau chung chunga hawn a ngai si. Hla tawk tak atangin nute kan han au a. Min hruaitura sumhmuna rawnchhuak hmuh veleh theihtawpa kan han tlan te kha mitthlaah a cham reng thin.

Ni e, khang purun te, khairek te, inthum kar te kha a hunlai kha chuan an hlauhawm dan kha tunlaia chiang mang lova ramhuai hmuh ai hian a nep chuang awm love..

Zana kawmthlang chingpirinu a han thizûn te kha a hunlai kha chuan kan hlau thin teh e.. Tunhnuah erawh zawng, chingpirnu pawh a tak hmuh tur a lo vang ta a, a thizun ri ngat hre tur phei chuan vanneih a ngai tawh a ni. Aw, lui kan han kal changa Tuitu hram ri vanga hming kan sawi thap thap laite khan khawvel hi a la mawi a sin.

Hun kohkir theihlohna leh nakin hun pawh hmuh thiam theihlohna ramah hian KAN NAUPANLAI KHA ngaih changni a tam mang e..

Kei ka tan chuan e.. Lunglen a na e...

Keizawng, ka nunhlui ngaihna hian kianni a nei dawn lo a nih hi..

Kha kan naupanlaia kan nun dan kha tunhnua naupang nun dan nen hian ka han khaikhin a. Tunlaia mi tan chuan a mawlmang viau pawh a ni thei e, mahse, khang hun laia kan nun kha chu a mawi a sin.

Sava veh te kha tunlaiah chuan thil thing a ni tawh a. A hun lai kha chuan kan hna pui ber a ni thung. Khuangthli rah tlan han chan a, tukhumvilik leh tlaiberh vel chiar nak nak lai sairawkherhin kan han tin a, kan han kuai kur a, sava perh thlak ngei tumin mahni kutzungpui duhlai ngei mai kan han perh pawh thin te kha aw..a hunlai kha chuan a va na duh em!

Kan te thawmah sava an han thlawk darh chum chum te kha kutzungpui fawp vawng vawng pahin kan han thlir liam te kha aw.. A chang leh a ngulah ngei mai kan han perh thin kha chu a uihawm duh ngei mai.

Saihlum kan han hrual a, a lian deuh perhna tur te, vate mawng dawmna tur kan han tizum deuh te kha tunlai naupang hian hrual thiam ve tak maw? Mu perhna tur saihlum kha chu a lian thei bik teh e.

Tunlai naupang angin eirek nei ve vak hek lo le. Thingzung te, thingrah leh hnah te nen lam khan kan ei thin kha a ni a. Kan kam a hlei viau e ti lo chuan kan ei leh in avanga na em em han neih erawh a awm ngai lo thung.

Kan naupang laia sa kan han rawp theih zia te kha aw. Krismas a sa kan ei kha tihfuh changin a kar lakah vawi hnih khat kan ei zauh a, chet fuhloh kum deuhah chuan a kum leh krismas kha sa ei lehna hmasa ber a ni thin. Tunlaiah chuan tuktinin vawksa pawh lei tur a awm ta. Kan naupanlai, tute’n emaw vawk an talh dawn tih khaw khah a a khah hunlai, naupanghoin ei ve hram tuma kan hel laia sa anga tui khan engtikah mah ka eitui leh tawh lo’ng e.

Tawlailir kan han siamchawpa, kawngchhuka kan han chuang thin te kha. A hunlai chuan kha aia nuam kha a awm kher lovang. Kan lirthei hmuh chhun a nih miau avangin chuan inchuh a han inkhuainuai rap rap awm thin te kha a lo awmlo chuang lo e.

Inrinni hi duh aiin a awm zing thin. Kan u ten bual turin tuikhurah min han pawtthla a. Khang hunlai kha chuan inbual aia vuak thlan chang kha a va tam em! Tuikhurah chuan tuipui kama sapho pawhin “em em a..” an tihtur khawpin min han phelh a, min kuai kun a, chhip atanga tuikhur tui vawt tha tak maia min han leihlaia tah loh kha chu a va har thin em..

Tun hunah te hian khang tuikhur kha la awmin, a tuite kha a la vawt angem aw? Khang tuikhur hnar ngaw a sava te khan nunchan an la zir ngai angem le? Chuta chiang ber chu engmah a chiang lo tih chauh a ni.

Khang kan naupanlai hunah te khan let leh thei dawn ila chu kum khat sal tan nen pawh ka thleng phal ngei ang. Mi thenkhat tan chuan atthlak pawh a ni maithei. Mahse, duhamna leh nawmsipbawlna atanga hlimna zawn tum aia a atthlakna ka hre bik lo e..

Zan lungngaihthlak!!!

Harsa taka lehkha ka zir khan tawrhchhelna min pe a. Tunah erawh kha tawrhchhelna khan engmah a thawk theilo.

Theihtawpa lehkha ka zir laia rinawm taka min lo nghak tang tang tu khan tunah chuan ka bul khumah a mu a, ka kiang velah chuan chhungkhat laina hnai in an kil bial taih a.. an hmelah chuan hlim hmel hmuhtur a vang a, lungngaihnain chu inchhungah chuan thla a zar a ni tih a hriat theih a. Ni e, ka bul khuma mu, ka hmangaih em em chuan kumkhuain min mutthilh san tawh dawn a ni.

Ka tap thei lo a, rilru mumal ka pu thei hek lo. Pachang taka tuar ka tum a, pangchang taka tah hawm hawm a awlsam zawk si. Min hnem tura lo kalkhawm ka thlir a, kan thil tawn chu a namai loh zia ka hrechiang telh telh thung. Mittui tla zawih zawihin a hmel ka thlir a.. kan nunhlui ka han chhuikir a..

20/03/1996

College chawlh lai a ni a, kan khawlama ka haw chu ka thiante ina ka leng chu an chhungte hmundang ami awmpui an lo nei a. A tir lamah chuan engvakah ka ngai lem lo a, mahse kan han inkawm fo tak hnuah kha chuan kan innel ta em em a. A hnu deuhah phei chuan thian satliah ang mai chuan kan inen tawh lo, kan inkarah chuan midang hriat ve loh thil inthup chu a awm tan ta.

Vau thla chawhnu lam a ni a, ni a kang thain khua pawh a lum kher mai. Kan thianho chu luiah tuichenga, intihlim pah turin kan kal a. Ka lo ngaihzawn ruk ve deuh pawh chu a lo kal ve a.

Lui kan thleng chu a lo nuam kher mai. A duhin tui an cheng a, a then chu tiau phoah kan lo infiam bawk a. Chutia hlim taka kan inkawm karah chuan mitmei ka hmuh zauh zauh avangin ka thut hnaih a, kan kalsan ta daih a.

Chutia kan kalsan chu midang chuan engvakah min ngailo a, keini erawh chuan kan rilru chhungril inhrilhtawn tur kan ni tih kan chiang thung. Hla vak loah chuan kan thudun a, engemaw te sawiin kan titi vei luam a. Chutah kan thutak telh telh a, kan rilru chhungril ber thlengin kan phawrh fai ta vek a. Chumi ni atang chuan thian mai kan ni tawh lo..thian aia thuk zawk inzawmna chuan nghet taka suihzawm kan ni tawh.

Hlimlai nite chuan..

Ani chu a felin a hmeltha bawk a, mi pawh a ngaihsak thiam em em a. Ka tan chuan sawiselbovi a ni ber mai. Ka thatna tur leh ka lawmna tur a nih dawn phawt chuan engpawh tuar turin a inpeih reng thin.

Zirna ka chhunzawm a lo hun leh pawhin tha takin min fuih a, tha taka a lo awmtur thu leh nupui fanau chawm thei ka nih huna hlim taka chhungkaw din thei tura rinawm taka a awmtur thute min hrilh a.

Ka zirna ka zo a, hna te ka han zawng ve a. Vanneihthlak takin ka hmu ve ta hlauh mai a. Khami ka hna hmuh thu a hriata a min lawmpui thiamzia te kha mitthlaah a lo lang thar leh a. Lung a va leng em!

Thihna kawr ruamah chuan..

Kan chanchin leh kan inkar thute chu ka thiante chhung chuan an lo hre ve vek tawh a. Chutianga hna ka neih tak hnuah chuan chhungkaw din tura ka inpeih tawh avangin palai tirh te ka tum ta a.

Ani chu an khaw lamah a haw anga, chutah chuan palainena umzui turin kan intiam ta a. Chumi a haw tur ka thlahte pawh chu a hlim kher mai. Kan inkai phei a, kawngbula kumtluang par lo awm chu thliakin min pe a. Motorah min lawn san ta a.

Kha a pangpar min pek kha a thil min pek hnuhnun ber tur a ni ang tih ka ngaihtuah ngai lo. Ka haw a, ka dawhkanah ka dah a. Room vel ka tihfai lai chuan ka phone a lo ri a. Chuta ka han chhang chu ka thil hriat duhloh ber mai ka hre ta. Ka nupui hual nimai tur chu motor insu avangin a boral a maw??? Aw, i pangpar min pek pawh a la viau lo a sin..

Phone ka dah a, engtik laiin nge an chetsualna hmun pawh ka thlen ka hre lo. Ka hmangaih em em chu thisenin a bual nuaih mai ka hmu chu thlir a va hrehawm tehlul em!

An khawlam pana kan kal kha ka va hre tam lo tehlul em! An in kan thlen a a chhungten min tahkhum atang khan ka harh zawk a ka tap theilo, a na a ni!

Chungkaw din kan tumna chu vawm bo a ni ta a, kan hlimna pawh chu thlan khurin min lak sak ta. Naktuka ka hmangaih an phumna tur thlanmual lei chu kumkhuain ka tan chuan lei satliah a ni tawh lo ang.. ka hmangaih taksa a tel ve tawh avangin!

Aw, ZAN LUNGNGAIHTHLAK tak a va ni em!

Cathy Zunzam...II

Khatianga keini pahnih kan inzui tih kha ka thian lei veng zo lo tak takte khan ka chhungte an lo hrilh ni tur a ni.. A tuka ka lo mu rei deuh chu chaw ei turin ka chhungte chuan min lo kaihthawh tir a. Ka mu min kaihthawh pawh chuan min khak nghe nghe a.

Chaweikham chuan kan insiama, an unaunu chei turin an thlen inah ka hruai a. Kei ka thianpate inlamah ka kal ve leh a. An chei zawh hnu chuan min rawn phone a, ka hman huna amah lama inkhawm tura insiam a duh thu min hrilh a. Ka hman veleh ka lama, kan insiama, inkhawm tur chuan kan inzui chhuak ve leh a.

Inneih inkhawma an thuchham laite chuan ka beng bulah fiamthuin "Nakinah chuan kan la chham ve awm si a, ka zak lawk" a rawn ti a. Ka nuih a za viaunaa Biak Ina nuih chi ni hek suh! Ka zu en a, a lo nui suk a.. ka insum zo lo teuh khawp mai.

Inkhawm banah a lawmna kan han nei leh a. Kan thianho zinga thusawi thiamlo ber mai chu thian aiawha thusawi turin min han ko thut mai a. Ka sawi laklawh laiin ka zu en a, min lo nuih suk a. Buai tawh sa nak laiin ka buai nasa telh telh a. Khatia ka buai dan em em kha aw.. Hrui ni ta ila, ka hnawk kha then a har ngawt ang.

Engtin tin emawin ka zo hram a. Ka zu thu leh chu nui sen sen pahin, "i sawitha khawp mai" min ti a. Ka nuih za bawk si, ka zak tawh bawk si chuan " a nih chu a.." tiin ka chang a. Ka kut a rawn vuan a, a rawn hnai a "ka duh ber i ni a, i thusawi kha ka tan chuan ka thusawi ngaihthlak tawhah a la tha ber" a ti ta reuh a.

Thenna tuni chu...

Inneihni a ral a, mo unaute chu kar khat vel an cham hnuah chuan an haw dawn a. Chungte chu kan kutah an awm avangin ka thian pakhat nen kan thlah leh ta a. An inah kan thleng a. Zanah kan pahnihin inchungah kan awmdun a. Kan lung a leng hle a. A tukah ka haw anga, kan inhmu tam tawh dawn lo tih chu kan hre tlat si a!

Reife kan inkawm a, thil tam tak kan sawidun a. Khaw hranah kan awmdawn avangin a lungngaih thute a sawi a, ka darah a rawn bei a. A ngawi reng a, ka han en chuan a mittui a lo tla nasa tawh khawp mai. Ka kuah bet vat a. Khaw hranah awm mah ila rinawm taka ka awmtur thute, a zirna ngaihsaka, nakina kan hlimna tur a nih thute ka sawilai chuan a ngawi reng a. A hnuah a tana ka rinawm tur thu min tiamtir a. Chu thlaeng hnuai boruak rit tak hnuaiah chuan duhthawh takin kan infawp vawng vawng a. Kan chhuk a, midang an lo mu vek tawh a. Ka thianpa pawh a lo mutui tawh khawp mai. A la mut duhloh vangin kan meng leh reng a. Zinglam dar 2 velah chuan tukthuan eikhama haw tur kan nih vangin mut a rawt a. Kan inmangtha tur chu min kuai kun a, min rawn fawp ve leh a. Mu turin kan inthen a.

A tuka ka tho chu zan lamah a mu lo tih ka hrethiam nghal a. Chaw kan ei a, a ei theilo. Kan insiamlai pawh chuan a mittui a hru zauh zauh a. Kan haw tur chu mittui nen min thlah thei hram a. Ka ngaihtuah a ngaizawng a neih vawikhatna a ni a, a lak thutak zia ka ngaihtuah chuan keipawn ka vei hle tih pawh ka hrethiam nghal a.

Zirna a chhunzawm leh a, kan inngai em em a. Kan inkarah chuan inngaihzawnna mai a ni lo, hmangaihna chu a lo awm reng tawh tih chu kan hrethiam ta a. Nitin kan inbia a, kan infuih tawn a, kan rinawm thute kan intiam nawn tir ziah thin.

Ka hmu leh che.. mahse..

Zankhat chu tlai tawh takah min lo phone a. An chawlh avangin a haw dawn thute, a patea a tuka an khuaa a zin dawn avanga a haw nghal tur thu a sawite chuan kan hlim hle a. An khuaa zin turin mi sawm a, ka 'aw' rang kher mai. Kan helhhawlh bawk aniang, kan mu lo dun ve ve hial a.

A tuk tlai a ni a, ka dawr atanga ka haw laiin number hriatloh atangin phone ka dawng a. Ka han la a, hmana kan infawplai min hmutu a unaunu kha a lo ni a. A thusawi erawh ka thin a va thawng em! Ka nupui atana ka hual, ka hmangaih em em chu motor chetsual avangin damdawiin khumah thih sualin a awm mek tih ka hriat chuan ka awmdan ka chiang tawh lo. Ka hriatchin chu kawngsirah motor ka side a ni tih chiah a ni a. Ka hriat leh chuan kan inah kal turin ka insiam a, ka thianpain motor khalhin ka thian dangte leh a unaunu, ka thianpate nupa nen kan inzui a.

Kan hmanhmawh bawk a, kan tlan reilo khawp mai. An khua kan thlenga, damdawiin kan pan nghala. Mi pawh an lo tam khawp mai. Ka chhuk chiah chu a unaute chuan min lo tahkhum a. Pachan a ngai khawp mai!

A khum bulah ka phei a, doctor leh nurse te an beidawng tih chu an chezia atangin a lang reng mai. A kut ka vuan a, a hmel ka en leh a. Ni e, ka hmu leh ngei mai.. Mahse, thlan khurin a lem pil tep tawh hmel bak hmuhtur a awmlo!

A hmelthatna kha a tawhsual tawh khan a laksak a, a vun nalh em em thinah te khan hliam tam tak an awm a. Hmana ka ngaihzawng hlim em em, harh vang tak kha a tha a zawi vek tawh a. Thihna kut chuan a tham hneh ta!

A ruang chu inah an la thlaa, a bulah ka zui zel a. A nuin min tahkhum nasa ngei mai. Ni e, a nuin, "mamte, hei i thianpa pawh a lo kal a sin.. I rawn kawm dawn lo'm ni?" tiin a tap hawm hawm a. "Ni e, Cathy, ka lo zin a sin.. Min kawm turin i ka rawn ang dawn lo'm ni??"

Cathy zunzam...

Thil tam tak ka hringnunah hian ka lo tawng ve tawh a; tam tak ka la tawng bawk ang. Ka thil tawn thenkhat chu rei pawh hre zui lovin a ka theinghilh zui mai a, thenkhat erawh ka la hre reng mai ni lovin nimina thleng ang maiin ka la chiang thung!
Ni e, he khuarel hian thil tam tak min tawn tir ve tawh a. A changin hlimna leh lawmna min pe a, a changin lungngaihna chirhdup hmunah min hnuk lut thin. Thenrualtha min pe a, min lak sak a; ngaihzawng min pe a, hmangaihna min den tir a. Chu ka hmangaih chu min pawh then sak leh si.. Hmangaihnain a den sil tawh hnu a pawh then leh zet tluka na hi awm ang maw?
Khawilam lanu nge maw i nih le?
Kha ni kha ka la hrereng.. Kan thianpain khawdanga mi nupui a nei dawn a, kan tawiawm ve a. Kan thianho chu mi zakzum vaklo awmkhawm tih takah kan thlen tirh atangin kan ngampa nghal hle a. A nupui turte inah chuan kalin kan hlim hle a. Thil tihfel ngaite kan tihfel pui a. Chutia kan buai nuai nuaina karah chuan thil danglam ka tawng ta! Kum lamah a la upa vaklo tih a hriat a, mi ngawichawi leh zakzum a ni tih pawh a hriat khawp mai. A hmel leh chezia vel chu sawisel tur zawng ta ila ‘hmeithai zinga zang zawn’ ang maia vang a ni ngei ang. Chu thil danglam- Tleitiri chu..
Chutia kan zinga lo awm ve chu kei thianho zinga nula ngaihsak lo ber pawh chuan hmu mai mai thei lovin ka va kawm ta a.. Ka han kawmchian chuan a hmelthat ang bawkin a lo felin kawm a lo nuam em em a. Eng engemaw kan sawi vei luam a, kan nui nasa dun hle a. A hnuah phei chuan thiante buai chu mahni buai ve loh chuan a ziaawm deuh avangin dawrah thil leiin kan kalsan ta daih a.
Ka vawikhat hmuhna atanga ka ngaihzawn nghal dan leh ka ngainat dan em em kha tun thleng hian mak ka la ti hial thin! Ka thil hriat tawha ka la hriatthiamloh ber chu kha nula (ti tawh mai ang..tleirawl atan chuan a upa deuh hlek si a) hmel ka hmuh atanga ka duh em emna kha ka la hrethiamlo ber awm e!
Khatia dawr kan kal tak daihah khan ka thiante chuan min lo phone nghal a, kan let leh min han hmu chu an ngaihdan a ni lo tih chu zawlnei sawi ngai kher lovin ka chiang a, mahse, lalhmelthai vang a ni tih ka hriat erawh chuan pawi tihna ka neilo thung!
Kan tihtur kan tihfel hnu chuan khua pawh a lo ngui tan tawh a. Kan haw darh dawn chuan lalhmelthai chu ka thlah leh ta a. Lalhmelthai vang chuan thiante ka phatsan leh ta! Kan tlanchak vaklo bawka an in kan thleng har hle a. Mahse kha an in kan pan kawngah khan kan rilru erawh hnaiteah kan inpawhsak tawn thung. An in kan thleng a, a chhuk dawn chuan “zanah ka rawn lam ang che aw?” ka ti zauh a. A hnial em em bik chuang lo a. Kan intiam hnuah ka tlansan leh ta a..
Man inhlan zan leh nunthara bul tan zan…
Zanah chuan kan intiam tawh angin ka va lam leh a. Ani pawhin nel pawh min nel ve tawh hle a. Man inhlanna zan ngei chu keini pahnih tan pawh nunthara bul kan tan zan a ni tih tunhnu hian ka hre thar leh a..
Man inhlannaah pawh chuan kan inkawp chawt a ni ber mai. Kan pahnihin kan thudun a, midang kan ngailo. Reipawh inchhunga thu lovin inchung lamah kan chho ta daih a. Inchunga naupang infiam nak nak sira thutna awmah chuan kan thudun a, thil tam tak sawiin nunhluite pawh kan sawi hnem hle a.
Ani chu ka thianpa nupui tur pa u fanu a lo ni a. Inkutsuihna velah pawh kal a tum ve thu a sawi chuan ka bula kal turin ka sawm a, a hnial biklo a. A chanchin a sawi zel a, a zirna lama chawlh an neih vanga inneih hmang theite a nih thu a sawi chuan vannei ka inti rilru khawp mai.
Ngaihzawng chungchangte kan han sawichho a, a neih ngailoh thu leh a neih chuan rinawm tak leh pasal tur law law neih a duhthu te a sawi a. Chutia a sawi chuan a ngaihzawng nih ka duh thu fiamthuin ka sawi zauh a.. a nui a, na lote hian min han chum a… he nula hian min haw biklo em ni dawn le??
Chutia kan titi hnu feah chuan midangin min rawn chimbuai a, thian dangte nen chuan kan titi ho leh ta a.. a fala la awm ka duh tehlulnen thiante an awm ve tawh si.. Tuilo zetin kan titi ho ta a.
Zan a rei a, haw zai te kan han rel a. Ka thian..ni lo ka hmangaih chu ka thlah a. Kan haw kawngah chuan thil tam tak kan sawi leh a. Ka rilru ka han sawichuan a nui a, a awihloh thu a han sawi a, a rilru takin a sawilo tih erawh ka chiang thung!
An in kan thleng a, ka lut zawk a. Thingpuite in in ka inzawh chuan a tuka ka lam hun turte ka sawi hnuin kan inmangtha a, ka thlenin lam ka pan ta a. Ka va thlen chuan thiante ka atanga fiamna ka dawn chu phat mawi har tak a ni.
A tukah chuan a hun ka tiamah chuan ka han lam a. Mak tih deuh ka nei tlat! Chu ka mak tih chuan ka duhna a tizual bawk a. Ka huntiamah chuan a lo inpeih tawh nia mawle… Hmeichhe dang chu nise nghah a ngai ngei anga, ani erawh hun a vawngdik hle thung. A chezia atang chuan chhuah phal chi a ni lo tih chu ka chal ka hriatchian tluk zetin ka rilruah a lo lang nghal a. Kan hlan fel hnu chuan mothar turte inlam panin kan kal leh ta a.
Kan zu thlen chuan an lo insiam tan mek a. Chutia ka motor ken atanga kan chhuk dun an hmuh chuan a unau dangte chuan an fiam nasa hle a. Kan nui nasa hlawm khawp mai.
Kan inpeih fel a, chhuanna tur kan han insiam fel chuan midang tan han chuh ve chi ni tawh hek suh. Tumahin chuan ve an rawn tum tak si lohah chuan ka sawm lui ta hlawm a. Kan pahnih bakah a unau dang pathum te nen ka motor kenah chuan kan haw ho ta a.
Kan khua kan han thleng a, thlenna tur an han siam vela. Ka mi phurh te chu kan inah an dah ta hlawm a. Zah erawh a zak ru ve khawp mai. Mahse, a fel hrim hrim a, a tilang lem lo a. A puitlinzia ka han hmuh lehzel tak hnuah phei chuan rilru a luah nghet ta khawp mai.
An han intifaia, an hman hnu chuan kan khua vel chu fangkualin kan lengkual vel a. Park-ah kan lenga, midang chu kalsanin tlai nitla tur thlir kan thudun a. Tahchuan ka rilru tak tak ka hrilh fai ta vek a. Ani chuan,”Hmeichhe nikhualo deuhah min ngai maithei, min ngai mah la ka sawitheih a awm chuang lo! Ni e, ngaihzawng ka la nei ngailo a, mipa pawh nangmah ang em em a kawm leh ngainat ka neilo! Hmangaihna hi engnge a nih ka la hrethiamlo a, hriatthiam pawh ka la tum vak ngailo. Amaherawhchu, ka rilrua i awmdan hi chu a danglam khawp mai. Ka ngaina che tih pawh i hria a, hengtiang hian midang ka rilruah an awm ngailo” a ti a. Keipawhin ka hmuh tirha ka ngaihzawn nghal thute ka sawi a. Ani chuan,”Tunah hian lo chhang ta che ni ila, ka la naupang ve a, bakah nizana ka sawi ang khan ngaihzawng ka neih chu ka pasal ni theitur ka duh a. I rinawm thei dawn mi?” tiin min zawt a. Ka rinawm tur thu leh ka duhzia ka sawichhuan ani chuan,”Ni e, keipawn ka ring ang che. Ka rin ang ngei pawh ni ang che aw.. KA DUH CHE.. Ka rinawm reng ang..” a ti chu HALELLUI pek mai pawh a chakawm khawp mai. A hmel ka en a, ani pawn min lo en a. Nuih suk pahin “lerh viauah min ngai suh aw..” a ti hram a. Keichuan keimah zawk min lerh tura min ngailo turin ka dil a. Kan “AW” dun ve ve a..
Ral lehlam ka thlir a, kan inngaihzawnna tur thu kan tiam dun laia min hriatpuitu ni pawh chu a liam dawn tawh a. Khua a tlai tawh avangin haw turin motor lam kan pan a. Kan va thlen chuan a unaute chuan min lo nghak reng tawh a. Kan lut tur chu an lo nui thaw a, thildang erawh a sawi chhunzawm lem chuanglo a.
Zanah chuan kan thian dangte ho leh ka thiante nen chuan kan thianpate pahnih nula tlangval nihna tawp zan tur chu kan sûn a. Thil sûn nei e tilo chuan kan hlim hle a. Kan pahnih chuan hmun dangah kan kalsawn a.. Kan inkawm ta daih a. Eng engemaw kan sawi a, ka dar a rawn ngheng a, ka lo kuah a. Ka han en a, a rawn hawichhuak a. A hmui no nalh em em chu ka fawp dawn a, a zah avangin a kun daih a. Ka kuai dak a, ka fawp ta tho a ani pawhin a thiam ang tawk tawkin min lo chhanglet ve a. Ngaihzawng a nei ngailo tih takah infawh pawh a thiam lem lo khawp mai.. Mahse, a thiam ang anga min lo chhanlet khan a rilru zawng zawng erawh ka fawh chhuahsak a, min rawn pe bawk a ni tih chu ka hrethiam nghal a.
Mahse, thil pawi a thleng ta.. Kan inzuichhuak min lo mitmei rengtu a unaunu pakhat leh kan thianpa an han khuh khak mai chu kan lai dun teh a sin! An rawn hnaia, a zak lutuk chu a kun char char a, ka kuah bet a, a la hawi chhuak ngam chuang lo a. Ka thianpain mei nei taka a han tawng velte chuan nuih pawh a nui ngamlo a, ka khawngaih chuan ka thianpa pawh chu ka mitmei nghal a. Min luhsan leh hnuah pawh a la zak khawp mai.
Chutah kan thian dangte kan va pawh chu kan pahniha kan bo daih avang khan fiamna pawh kan dawng leh nak nak a. A puitlin em avangin a insiamrem thiam ve leh mai a. A hmelah erawh a zak tih ka la hmu thung. A tuka tihtur nei kan nih vangin kan haw darh ta hlawm a.
In kan thlenga, kan insila, kan intihfai hnuah thingpuite kan in a, mu turin kan inthen ta a..

Kan Thawnthu-II

Khatianga kan inzui tak rengah kha chuan kan inkarah chuan thian mai nilo, a aia thuk zawk thil a lo awm thuai a. A mitmei pawh vawitam ka hmu a, mahse, ka hai der lui tlat a. Ani ngaizawng tur chuan ka tlinglo a, keimah ka inhmu hniam tlat si a.

Class khatah kan awmlo ka tih tawh kha. Kan class-a hmeichhe pakhat hian min lo ngaizawng chu niin! Engtinnge ka phone number a hriat pawh ka hrelo ka class kal tur ka insiamlaiin min lo bia a, a hnua class kan off chu ka bulah a lo kal a, a thiannu birthday party-a kal puiah min rawn sawm a. Chu min sawm thu chu a rawn hriat hman avangin a awm a nuamlo hle a. "Kal suh" chu min ti dawt ngamlo nain a chezia velah chuan kalpui lo turin min duh tih chu a hriat hle a. Chutianga ka thian ve ber leh keimah avanga amah pawh inti hrehawm hial thin a nih avangin kal luihna chiah ka ngailo a, ka kal ta biklo a. Mahse, ka rilruah zawhna tam tak a lo lang a; zawhna langsar ber chu - Ka thiannu hian min hmangaih em ni? tih hi a ni. Ka han inena, ani ang tan chuan hmangaih tlak niin ka inhre lova, mah se.. midang ngaihzawng atan ka phal bik si lo.. Ka hmangaih ve tho tihna em ni?

Chutianga midang sawmna amah vanga ka hnar chu a hma aiin kan inpawhna pawh a thuk telh telh a, tunah chuan thian ang mai mai a inkawm a theih tawhloh! Kan inkarah sawichhuah ngamloh kan nei ve ve tih chu kan chezia atangin tihlan chang kan nei fo mai le!


Zankhat chu ka phone-ah sms heti hian min lo thawn a. 'Rose par hi a mawi i ti ve em? Khawvela rose par mawi ber pawh pe che ni ila rei an daih ngai lova, an til leh vat thin. Mahse, ka rilrua rose par awm erawh hi chu a til ve mai mai dawnlo a nih hi..' tiin a lo thawn a. Chutah zawng ka rilru sawiloh theih ni tawh biklo le. Ka lo vei ruk thin zia leh a bula ka awm chuan nuam ka tihzia te, ka hmangaih thute ka hrilh fai vek a. Amaherawhchu, kan dinhmun inthlau lutuk avangin ka sawi ngamloh thu ka hrilhzui a. Chhungkaw dinhmun lam a en loh thute, a pate pawhin fanu neihchhun a nih avanga a hlimna ber tur nei tura an tihthu te a sawi chhunzawm a. Kan inngaizawng chu a ni ta der mai! Kan inmangtha hnuah chuan ka muhil mai thei lova, ka ngaihtuah nasat poh leh mak ka ti tulh tulh a. Hmangaihna lo mak zia leh ropuizia te, a ril zia te ka hriatchhuah phah ta a.

A tukah chuan college-ah pawh a ngai tein kan inkawm leh a, a thian dangte chuan thian mai mai emaw min la ti a. Kan inkarah hmangaihna lo parvul mek chu tuma hriatpui lovin kan pahnih chuan mawi taka par chhuah turin kan chawm mek a ni si!

Tlaikhat chu min lo phone a, kan thiannu pakhat birthday lawmnaa kal turin lo insiam turin min ti a. A hnu deuhah chuan a lo thleng a. Kan thiannute inlam pan chuan kan kal ta a. Kan va thlen chuan thian dangte pawh an lo awm nual tawh a, kan thut hahchawlh hnu chuan inchungah kan pahnihin kan chho ta a.

Inchungah chuan kan thudun a, thil tam tak kan sawi a. A pate hnena kan chanchin a sawi thute, a pate pawhin kan inhmangaih a nih chuan pawi an tihloh thute, fapa pakhat nei belh tur anga an inngaih thute a sawi a. Ni e, a pa khan keimahah khan 'tumna ka nei a ni' tih kha a hmu thiam tlat si a. Chutia kan titi lai chuan kan thiannu chuan min rawn ko a. Kan chhuk tur chu ka kuaidak a, duhthawh takin ka fawpa, ani pawhin tha takin min chhanglet a. Kan infawp satliah mai a ni lo, rilru zawng zawng kan inpe tawn a ni. Kan thiannu birthday pawh chu hlim takin kan hmang a. Zanrei tak thleng awm lovin kan haw dun ta daih a.

Kumtawp exam a lo ni a, tha takin kan chhuak ve ve a. Ani chuan a zirzawm lova, dawrah chuan a rilru chu a sawr bing ta zawk a. Keichuan zir chhunzawm ka duh a; amah chuan inneih a, dawr enkawl dun a duh a. A pate pawhin chu chu an remti a, mahse keimah berin ka duhloh vangin a thu ka hnial a. Inhauh buangbar vel a duhloh vangin ka rilru chu a pawm ve ta a.

Ka zir chhunzawm a, ani'n a zir chhunzawm ve si lo a, inhmuhna hun pawh kan nei tam theilo hle a. Chutichung pawh chuan ka tan a rinawm a, ka tana a rilru min pek chu tlem a hnekin a zual telh telh zawk a. Hetiang khawpa min hmangaih avang hian ka tan chuan khawdang hawi san chi pawh a ni lo!

Zirna ka zo a, ka kalna line a fuh vang pawh aniang, hna tha tak ka hmu ve ta a. Khami ni, hna ka hmuh nia min lawmpui thiam zia leh a pate thleng thlenga min lawmpui kha phulo pawh ka inti khawp mai. A pa chuan kan thianho chu chaweikhawmna hun tur min siam sak a. Nawm pawh a nuam hle a.

Keini pahnih chu a room lamah lutin kan awmdun char char a. Ka zir chhung zawnga ka tana a rinawm reng avangin lawmthu ka hrilh a. Chumi pah chuan ka nupui ni turin ka sawm nghal bawk a. Ani chuan min pawt hnaia, min fawp a, palai lo tir turin min ti ta a!

Tunah chuan chhungkaw pangngai tak niin kan fa te ber pawh nikhaw hre rual a ni ve ta. Ka nupui chuan theihtawpa enkawlin keimah anga mahni kea din tum tur leh amah anga midang ngaihsak mi ni thei turin a fuih thin a.

Fate enkawl a thiamin ka chhungkaw tan a inpe zo em em a, chhungkaw awhawm ber pawlah kan chhungkua a chhuah thei hial a ni.

Ka hun kal tawh ka ngaihtuah let thin a. Thil pahnih ka neih kha ka lawm thin. Chu thil pahnih chu- mahni inrintawkna leh mahni kea din tumna rilru ka neih a, tumruhnain ka rilru a luah tlat thin kha a ni a. A dang pakhat leh chu tuna ka thuziah laia ka bula thu, ka ziah hma hmaa kan thawnthu lo sawi zawt zawttu, ka pachhiat ber lai pawha min hmangaih tlattu, mi tha tak ka nupui ka tawng hi a ni!!

Kan thawnthu-I

Puk chawp tak meuh meuhin khawpuiah chuan college kal turin ka lut ve ta rawih a. Thiante min puihna zarah mahnia inluahna tur min hmuh sakah chuan ka han invawmlut ve ta rawih a. Ka ei leh in te, ka inluahna man vel engkim chu chhungte hnena chah ngai lo turin leh tlai lama class kal ka nih dawn vangin inhlawhnatur awm ang ang chu dap kualin, a awm ang ang chu ka thawk thin a. Chung ka inhlawhna atanga ka pawisa hmuh chu ka thlantui far zawih zawih atanga ka hmuh a nih avangin a hlu a, ho mai maiah ka hmang ngailo.

Kan college chu zan lam a nih vang nge pawh ka hrelo kan thahnem ang reng phian a. Kan luhpui thenkhat chu mi hausa fa, awmtha duhlo tih hriat tak an awm nual a. Nuam tawl ringawt buaipui an ang hle thin. Ka rilru tete chuan "Keinin kan zirtheihnan hna rim takin kan thawk a, college tha pawh kal thei lovin kan phak tawk ang a nih vanga hetianga kal ka ni si" tia ngaihtuah chang ka ngah thin.

Vawikhat chu kan awmna vengah chuan veng danga awm, chhungkaw awmthei deuhin in an sa dawn a. Inhlawhturin ka inluah neitute chuan min lo sawisak a. Hnathawhtur ka hmuh avang chuan ka lawm hle a.

Kan hnathawh chu hahthlak teh mah se ka thawhloh chuan ka nghei mai a ngaih dawn avangin phur takin ka thawk thei zel a. Ka hnathawh vel an en chuan kan hnathawhna pa te pawh chu an lawm ve ni tur a ni; duhsak pawh min duhsak ve hle a.

Nikhat chu kan hnathawhna hmunah chuan kan pu chuan a fanu a rawn kal pui ve a. A hmel han en ringawt pawhin kan phulo tih a hriat nghal chu thuhran, biak pawh kan biak ngamloh tur a ni tih a chiang hle a. Mahse, chu nula chu rinai takin a lo fel a. Kan han hahchawl chu ka thawhpui dangte hnamdang an nih avangin ka bulah lo kalin min rawn be vei luam a. Kha kan inbiak ringawt pawh kha ka tan chuan hriat a nuam a, hah pawh a dam sawng sawng hialin ka hria.

Zankhat ka class kal chu kan lecturer pakhat a lo kal loh avangin class kan off a. Thian dangte canteen velah te, room vela an titi luih luih laichuan keichu pawnah thlifim thaw heuh heuh mai chu dawn ka duh vangin ka chhuak a.

Chutia pawna khawhar taka mahni chauha ka din lai chuan ka hnunglam atang hian hmeichhe aw, ka hriattawh hnu hian "va lungleng awm ve?" a tih ri hi ka hria a. Ka hawilet chu kan insak lai mek neitu kha a lo ni a. Ka phu zawk nghe nghe a. Ka bulah chuan lo pheiin kan titi dun a. Kan college a a kalna chhan ka zawh chuan dawr an nei a, amah chiah fa an neih avang leh a nu leh pain hnadang an neih avanga enkawl a ngaih vang niin min chang a. Thil tam tak kan sawi a, a changleh kan nui a, a changleh kan thutak a. Class kan tan leh dawn avangin ka kalsan a, banah inhmu leh turin kan intiam a.

Class kan bang a, kan inhmuhna tur hmun ka thlen chuan ani chu a lo awm tawh a. Ka thlen chuan min ngah rei tawh thute a lo sawi vei bawrh bawrh a. Motor a ken avangin a ruala haw turin min sawm a, ka inluah thleng chu min thlah ta a.

Chumi zan atang chuan kan inkawm tan a, kan pahniha kan awm tawh chuan kan hlim em em a, midang pawh kan ngai biklo. Min ngaihsak em em a, ka tana a nawmlohna deuh tur a nih chuan amahin hrehawm a tuar mai thin a. Chutiang khawpa ka tana inpe zo a nih vang chuan a thiante lo kawm thinte pawhin min kawm ngaih ve em em thin.

Kan inkawm rei telh telh a, kan innel telh telh a. Ka class kal leh haw lam chu min hruai ziah a. Ka mei a ni a, keipawh a mei ang mai ka ni a. Kan class inanglo mah se hunawl apiangah chu pawh then theihloh ang mai kan ni a. Kan inkawp chawt a ni ber mai.